Iburasirazuba: Uko Perezida Kagame yesheje imihigo (Igice cya gatatu)

Yanditswe na Philbert Girinema
Kuya 1 Ukuboza 2016 saa 08:52
Yasuwe : XX
0

Mu bice bibanza by’iyi nkuru twabagejejeho uko Perezida Kagame yesheje imihigo mu ntara y’Amajyepfo n’Uburengerazuba, aho abaturage b’izo ntara bavuza impundu kubera ibikorwa binini birimo imihanda, inganda, amazi, amashanyarazi, inyubako n’ibindi bahawe bikazamura imibereho n’iterambere ryabo.

Muri iki gice turakomereza mu Ntara y’Iburasirazuba ari nayo nini cyane ku buso bwa kilometero kare 9813.3617, ikaba ituwe n’abaturage benshi ugereranyije n’izindi zose z’ u Rwanda. Igizwe n’uturere turindwi aritwo; Bugesera, Gatsibo, Kayonza, Ngoma, Kirehe, Nyagatare na Rwamagana.

Ibarura rusange ry’abaturage ryo mu 2012 ryagaragaje ko intara y’Iburasirazuba ifite abaturage bagera kuri 2,660,814.

Mu bihe bitandukanye Perezida Kagame yagiye yemerera abaturage b’intara y’Iburasirazuba ibikorwa binyuranye nk’amavuriro, imihanda n’ibindi.

Nkuko bamwe mu bayobozi b’uturere tugize iriya ntara babibwiye IGIHE, abaturage b’iyi ntara barishimira ko imvugo ya Perezida Kagame ariyo ngiro kuko mu masezerano yabahaye amenshi yabashije gushyirwa mu bikorwa, atarabasha kurangira na yo bakaba bafite icyizere ko mu myaka ibiri azaba yarangiye.

Byinshi mu byo Umukuru w'Igihugu yemereye abaturage b'Iburasirazuba barabihawe

Ibikorwa Perezida Kagame yemereye Iburasirazuba

Bugesera

Perezida Kagame yemereye Akarere ka Bugesera umuhanda ugahuza n’Akarere ka Ngoma. Kugeza ubu waratangiye ku gice cya Kibungo n’icya Ramiro kikaba cyarakozwe igice cya mbere. Yabemereye kandi Stade y’umupira w’amaguru, kugeza ubu aho kuyubaka hakaba harabonetse n’inyigo yarakozwe ku buryo hasigaye gutanga isoko umwaka utaha igatangira kubakwa.

Rwamagana

Akarere ka Rwamagana niwo mujyi nyirizina w’Intara y’Iburasirazuba. Perezida Kagame yakemereye imihanda y’ubuhahirana irimo uwa Fumbwe-Gasabo ureshya na kilometero 50 ukaba waratangiye kubakwa ugeze ku kigero cya 30%. Hari umuhanda Kabuga-Bugesera watangiye kubakwa n’iyindi.

Umunyamabanga Nshingwabikorwa w’Akarere ka Rwamagana, Kakooza Henry, yavuze ko imihanda y’ubuhahirane bahawe n’Umukuru w’Igihugu izafasha abaturage ba kariya karere gakungahaye cyane ku buhinzi.

Yagize ati “Akamaro k’iyi mihanda ni uguhuza abaturage n’amasoko, ahakungahaye hagafasha ahandi, bakabasha kugeza umusaruro ku masoko. Bifite akamaro ku bukerarugendo bujya ku biyaga n’ibindi.”

Ubwo Perezida Kagame yiyamamazaga mu 2010, yanemereye abaturage b’Umurenge wa Rubona ishuri ry’imyuga,TVET, ryubatswe na miliyoni 800 z’amafaranga y’u Rwanda.

Hari kandi no kugeza amazi muri Rwamagana bizatwara miliyari 1.8 bikarangirana n’uyu mwaka.

Kakooza yemeje ko ibyo Perezida Kagame yasezeranyije abaturage bizarangirana n’uyu mwaka w’ingengo y’imari.

Gatsibo

Ubuyobozi bw’Akarere ka Gatsibo bwemeza ko muri rusange ibyo Perezida wa Repubulika yemereye abaturage byatangiye gushyirwa mu bikorwa ndetse harimo n’ibyarangiye.

Aha bavuga umuhanda Ndatemwa- Muhura warangiye, amashanyarazi mu murenge wa Gitoki yatangiye gushyirwamo, umuyoboro w’amazi uva Gihengeri ujya Kabarore watangiye gushyirwa mu bikorwa umwaka ushize, ukaba uri no mu mihigo y’uyu mwaka ariko ukaba uzarangirana na 2018.

Uyu muyoboro ngo urimo gukorwa mu byiciro, aho icyiciro cya mbere uzava Gihengeri ukagera Gatsibo, bikazarangirana n’ingengo y’imari y’uyu mwaka. Icyiciro cya kabiri kizava Gatsibo kigere Kabarore kirangire mu mwaka w’ingengo y’imari wa 2017-2018.

Hari kandi ibiro by’Akarere imirimo yo kubyubaka igeze kuri 80%, mu mwaka utaha muri Gicurasi bikazaba bikorerwamo.

Hari ibitari mu masezerano y’Umukuru w’Igihugu nyirizina ariko abaturage ba Gatsibo bamugaragarije mu 2012 ubwo yabasuraga, birimo imihanda Finance-Rwimbogo, uwa Gabiro- Ngarama, na Muhura-Gasange- Kiramuruzi yose hamwe ireshya na kilometero 200.

Akarere ka Gatsibo gafite icyizere ko muri Gashyantare umwaka utaha izakorwa kuko ni kamwe mu turere umunani tuzakorwamo imihanda y’ubuhahirane (Feeder Roads).

Umuyobozi w’Akarere, Gasana Richard, yagize ati “Ibyo Umukuru w’Igihugu yatwemereye biri ku kigereranyo cyiza. Nibura umwaka utaha ibyinshi bizaba byarangiye.”

Nyagatare

Mu karere ka Nyagatare Umukuru w’Igihugu yasezeranyije abaturage ibikorwa byinshi birimo amazi meza, imihanda, amavuriro n’ibindi.

Umuyobozi w’Akarere, Mupenzi George, yabwiye IGIHE ko ibyinshi mu byasezeranyijwe abaturage byakozwe ku kigero gishimishije, uretse ikigo nderabuzima cya Gatunda cyagombaga guhinduka ibitaro ariko bikaba bitarakorwa.

Avuga ko umuhanda wa Gatunda-Ngarama urimo kurangira, gukwirakwiza amazi mu mirenge ya Musheri, Rwimiyaga, Karangazi, Rwempasha, Matimba, hasigaye kurekura amazi gusa kuko muri iki cyumweru hakorwa igerageza.

Ku bijyanye no kubaka Stade y’umupira w’amaguru yagize ati “Kubaka Stade y’umupira w’amaguru biri mu nyigo ariko amafaranga yamaze kuboneka y’icyiciro cya mbere ku buryo inyigo nirangira bizahita bitangira.”

Perezida Kagame yanemereye abaturage ba Nyagatare uruganda rw’ibiryo by’amatungo, iki gikorwa ngo cyakererejwe n’uko i Rwamagana hari urundi rukora ibyo biryo bityo hakaba haririnzwe ko zaba nyinshi ntizikore ku bushobozi bwazo.

Kirehe

Mu Karere ka Kirehe, Perezida Kagame yemereye abaturage umunara wa Radiyo ukaba wararangiye umwaka ushize. Yemereye koperative y’ikawa ya Musaza imodoka nayo ikaba yaratanzwe.

Umukuru w’Igihugu yemeye kandi kububakira umuhanda Nyamugali- Mpanga-Nasho, Umuyobozi w’Akarere, Muzungu Gerald, yavuze ko igice kimwe cyawo kigera Nasho cyakozwe naho ikindi kikaba kiri mu nyigo kikazatangira muri uyu mwaka w’ingengo y’imari.

Kayonza

Mu karere ka Kayonza, Perezida Kagame yabasezeranyije umuhanda uva muri pariki y’Akagera ukagera Nyamugali ureshya na km 23 no kongera amazi meza mu mirenge ya Murama na Mwili.

Ngoma

Mu karere ka Ngoma yabasezeranyije Sitade y’umupira w’amaguru na Hotel. Muri Mata uyu mwaka iyo Hotel leta yari imaze kuyitangaho uruhare rungana na 75% kugira ngo inyubako yayo igere ku kigero cya 85% yariho icyo gihe.

Byinshi mu byo Umukuru w'Igihugu yemereye abaturage b'Iburasirazuba barabihawe
Kuya 20 Mata 2012 ubwo Perezida Kagame yasuraga abaturage ba Gatsibo
Kuya 14 Ugushyingo 2014, Perezida Kagame yagendereye abaturage ba Kirehe
Aramutsa abatuye i Kirehe
Abaturage ntibahwemye kugaragaza ishema baterwa no kuyoborwa na Perezida Kagame

Inkuru bifitanye isano:

- ​​Amajyepfo: Uko Perezida Kagame yesheje imihigo (Igice cya Mbere)

- Uburengerazuba: Uko Perezida Kagame yesheje imihigo (Igice cya Kabiri)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza