Ibyacitse si uko ba meya birukanywe, ibyacitse ni uko batakoze ibyo bagombaga gukora-Perezida Kagame

Yanditswe na Ferdinand Maniraguha
Kuya 14 Nzeri 2019 saa 03:35
Yasuwe :
0 0

Perezida Paul Kagame yavuze ko kuba hari abayobozi benshi b’uturere bamaze iminsi begura ku myanya yabo nta kibazo kirimo, ahubwo ikibazo ni uko batakoze ibyo bari bashinzwe gukora.

Yabitangaje kuri uyu wa Gatandatu ubwo yafunguraga inama ya biro politiki y’Umuryango FPR Inkotanyi, yabereye ku cyicaro cy’uyu muryango i Rusororo mu Karere ka Gasabo.

Imbere y’abanyamuryango basaga 2000 bahagarariye abandi, Perezida Kagame yavuze ko abanyarwanda bifitemo ubushobozi bwo gukora ibifatwa nk’ibidashoboka mu gihe bashyize hamwe.

Yatanze urugero rw’ubukungu bw’u Rwanda bwazamutseho 8.6 % umwaka ushize, mu gihembwe cya mbere cy’uyu mwaka buzamuka ku kigero cya 8.4 % naho mu gihembwe cya kabiri buzamukaho 12.2 %.

Perezida Kagame ashingiye kuri iyo mibare, yagaragaje ko ubushobozi bwo kugera ku byo abanyarwanda bifuza buhari ahubwo budakoreshwa uko bikwiriye.

Ati “Ibyo biratwereka ibishoboka rimwe na rimwe tutageraho kandi tubishoboye tukabyibuza. Iyo urebye hirya no hino ku isi ni hake bishoboka. Wenda birashoboka ariko ni hake babigeraho. Bisa n’igitangaza ariko biratwereka ko bishoboka. Niba bishoboka kuki tutakomeza kubigeraho?”.

Yavuze ko u Rwanda rukeneye gutera imbere haba mu bukungu, mu kwihaza mu biribwa no gusagurira amasoko ariko bitazagerwaho hari abantu badakora neza ibyo bashinzwe.

Perezida Kagame yahise akomoza ku bimaze iminsi bivugwa ku bayobozi b’uturere beguye mu gihiriri, bamwe bakegura ku bushake bwabo cyangwa bakeguzwa.

Ni ibintu byaciye igikuba mu baturage, bamwe bibaza impamvu begurira icyarimwe.

Kagame yavuze ko kuri we atabibonamo ikibazo kwegura ari benshi ahubwo ngo ikibazo gikomeye ni uko badakora ibyo bashinzwe.

Ati “Kuri njye ibyacitse si uko birukanywe cyangwa ibirenzeho, ibyacitse ni uko batakoze ibyo bakwiriye kuba bakora. Kuvaho ni ibintu byumvikana. Ibyacitse ni uko wagira umubare munini wa ba meya badakora ibyo bakwiriye kuba bakora. Iyo ibyo ubikemuye ubukungu burakura, utabikora ibyo abanyarwanda bifuza ntibigerweho cyangwa bigatinda.”

Yakomeje agira ati “Ntitugatinye kugira ngo abadakora bagende bajye gukora ibindi bashoboye babise abandi. Ntabwo dukwiriye gutinda.”

Abanyarwanda nta soni bakwiriye kugira

Perezida Kagame yavuze ko icyo FPR Inkotanyi yashingiwe ari uguha ishema abanyarwanda aho bagiye hose, aho kugendana ipfunwe nk’aho hari ikosa bakoze.

Yavuze ko ibyo bishoboka iyo abantu bakora ibyo bashinzwe kandi bagakorera hamwe.

Ati “Twahisemo umurongo dukurikiza kandi turabikora, nizo zari intego za FPR. Imiyoborere myiza, guteza imbere abanyarwanda no kugira umwanya dukwiriye mu bandi. Uzi kujya mu bandi ufite isoni, bigasa nk’aho ufite ubusembwa utinya icyo abandi bagutekerezaho. Icyo nicyo FPR Ibereyeho. Abanyarwanda nta soni bakwiriye kugira.”

Yavuze ko ibyo u Rwanda rwanyuzemo bikwiriye kuba isomo rituma rudasubira inyuma kugira ngo ubukungu burusheho gutera imbere.

Ati “Ibyo tutaranyuramo ni ibiki? Isomo tutabonye ni irihe? Igisigaye ni ugukoresha ibyo tumaze kwiga. Ntabwo igikuza ubukungu ari ugukora gusa ahubwo ni no gukora bijyanye n’imikorere n’imico myiza. Iyo abantu bakorana bituma ubukungu butera imbere.”

Yavuze ko umuyoboke nyawe wa FPR Inkotanyi ari uwanga gukora ikibi ariko yanabona aho gikorwa akacyamagana cyangwa akakirwanya.

Inama ya biro politiki ya FPR Inkotanyi ihamagazwa n’Umuyobozi Mukuru w’umuryango, ikitabirwa n’abayobozi b’inzego z’Umuryango kuva ku Ntara kugeza ku Mirenge, abayobozi b’ingaga zigize umuryango, abikorera, abahagarariye abanyarwanda baba mu mahanga n’abandi.

Muri biro politiki yo kuri uyu wa Gatandatu, haganiriwe ku miyoborere myiza, guteza imbere ibyakorewe mu Rwanda no kugira isuku.

Perezida Paul Kagame ubwo yari amaze kugera kuri Intare Conference Arena i Rusororo
Perezida Kagame (hagati) ubwo yari amaze kugera ahabereye inama ya biro politiki
Perezida Kagame yavuze kuba hari abayobozi beguye ari benshi atari ikibazo mu gihe batujuje ibyo basabwe
Perezida Kagame yavuze ko abayobozi bakwiriye gukora ibyo bashinzwe kugira ngo u Rwanda rugere aho rwifuza
Umuyobozi Mukuru w'ishami ry'ubukungu muri BNR, Prof Kigabo Thomas (iburyo) ni umwe mu bitabiriye biro politiki ya FPR Inkotanyi
Senateri Tito Rutaremara, umwe mu banyamuryango ba FPR Inkotanyi
Abanyamuryango ba FPR Inkotanyi bitabiriye ku bwinshi inama ya biro politiki
Umuyobozi w'Umujyi wa Kigali, Pudence Rubingisa
Minisitiri ushinzwe imirimo y'inama y'abaminisitiri, Kayisire Marie Solange mu banyamuryango bitabiriye
Guverineri w'Intara y'Amajyepfo CG Gasana Emmanuel (ibumoso) na Rwakazina Marie Chantal wari Meya w'Umujyi wa Kigali wagizwe ambasaderi mu Busuwisi.
Komiseri Mukuru wa Rwanda Revenue Authority, Bizimana Ruganintwari Pascal (iburyo) umwe mu bitabiriye
Uwacu Julienne wahoze ari Minisitiri w'Umuco na Siporo (iburyo) yitabiriye biro politiki ya FPR Inkotanyi
Minisitiri w'urubyiruko Rosemary Mbabazi ni umwe mu bitabiriye inama
Umunyamakuru Ingabire Egidie Bibio (iburyo) ni umwe bitabiriye
Umunyamabanga Uhoraho muri MINALOC, INGABIRE Assumpta aganira na Minisitiri w'ibikorwa remezo, Gatete Claver
Abanyamuryango bitabiriye biro politiki ya FPR Inkotanyi bacinya akadiho
Francis Kaboneka wahoze ari Minisitiri w'ubutegetsi bw'igihugu ni umwe mu bitabiriye
Gatare Francis, Umuyobozi w'Ikigo cy'Igihugu gishinzwe Ubucukuzi bw'Amabuye na Peteroli (ibumoso) hamwe n'Umuyobozi mukuru w'Itorero ry'Igihugu Edouard Bamporiki
Ambasaderi w'u Rwanda mu Bufaransa, Ngarambe François Xavier (ibumoso) yitabiriye inama
Umunyamabanga uhoraho muri Minisiteri ishinzwe ibikorwa by'ubutabazi (iburyo), Kayumba Olivier
Abanyamuryango ba FPR Inkotanyi basaga ibihumbi bibiri bitabiriye inama ya biro politiki
Minisitiri w'ubutegetsi bw'igihugu, Prof Shyaka Anastase asuzuma bimwe mu bigize ikiganiro yari agiye gutanga ku miyoborere myiza
Minisitiri w'urubyiruko Rosemary Mbabazi aganira na Minisitiri w'ubuzima, Dr Diane Gashumba
Bamwe mu banyamuryango bacinya akadiho
Visi Perezida wa FPR Inkotanyi, Bazivamo Christophe (ibumoso) asuhuza Senateri Dr. Sindikubwabo Jean Népomuscène
Umujyanama wa Perezida mu by'umutekano, Gen James Kabarebe ni umwe mu bitabiriye
Bazivamo Christophe aganira n'Umunyamabanga Mukuru wa FPR, Ngarambe François
Umuyobozi w'Umuryango Water Acces Rwanda, Christella Kwizera
Komiseri mu muryango FPR Inkotanyi akaba n'umuvugizi wayo, Gasamagera Wellars niwe wabaye umusangiza w'amagambo mu nama

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza