Ibyishimo bivuye ku gusubizwa kwa Ezra Mpyisi ku itabarizwa ry’Umwami Kigeli V

Yanditswe na Evariste Nsengimana
Kuya 5 Mutarama 2017 saa 02:36
Yasuwe :
0 0

Nyuma y’aho urukiko rwo muri Leta Virginia muri Amerika, rwanzuriye ko umugogo w’Umwami Kigeli V, watangiye muri iki gihugu utabarizwa mu Rwanda, Pasiteri Ezra Mpyisi wabanye na we igihe kirekire yavuze ko yashimishijwe n’iki cyemezo dore ko byahoraga mu masengesho yaturaga Imana.

Mu Ukwakira 2016, nibwo abagize Umuryango w’Umwami Kigeli V Ndahindurwa bari mu Rwanda n’abari muri Leta Zunze Ubumwe za Amerika (aho Kigeli yabaga kuva mu 1992), batangiye kujya impaka y’aho uyu mwami wa nyuma mu bayoboye u Rwanda azatabarizwa.

Igice kimwe cyifuzaga ko umugogo w’Umwami Kigeli V washyingurwa mu Rwanda nk’igihugu cye, mu gihe abandi bari batsimbaraye ku kumutabariza muri Amerika, bavuga ko na mbere yo gutanga yari yatangaje ko atifuza gutabarizwa mu Rwanda.

Izo mpaka zose zashyizweho akadomo n’urukiko rwo muri Leta ya Virginia, bari biyambaje ngo rubakiranure, rwemeza ko umugogo w’Umwami Kigeli V uzatabarizwa i Mwima ya Nyanza aho yimikiwe, nyuma y’uko abifuzaga ko atazanwa mu Rwanda babuze ibimenyetso bigaragaza ko Umwami yasize avuze ko atazatabarizwa mu Rwanda.

Pasiteri Ezra Mpyisi, umwe mu babanye n’Umwami Kigeli yabwiye Ijwi rya Amerika ko ari mu banyuzwe n’icyemezo cy’urukiko bitewe n’uko yahoraga abisaba Imana ngo Umwami atabarizwe mu Rwanda.

Yagize ati “Ndi mu ba mbere, kuko ni jye wamuzanye muri Amerika mukuye mu kaga I Nairobi, tugezeyo biratugora, tugira umuruho utarabaho[…]ikibazo cyari cyaje ko atabarizwa mu mahanga, agwe ku gasi, nti ‘Mana uko wampaye kukumenya, ngutuye iki kibazo; none ubu ndanezerewe bireshya n’uburyo nanezerewe menya Imana iyo ari yo kandi n’ubu ngubu ni yo ibikoze.”

Pasiteri Mpyisi abajijwe ubutumwa yagenera umuryango w’Umwami usa n’uwacitsemo ibice, yagize ati “Ndacyakora umurimo. Mfite kuzicarana n’umuryango w’Abahindiro nkababwira ngo ‘bakure umuvumo mu muryango’. Nibanyangira bazaba bahemukiye umuntu.”

Pasiteri Ezra Mpyisi ni umwe mu bari baraherekeje umuryango wa Kigeli muri Amerika mu rwego rwo kujya kumvikana aho agomba gutabarizwa.

Umwami Kigeli V yatanze mu ijoro ryo ku wa Gatandatu rishyira ku Cyumweru tariki 16 Ukwakira 2016. Yaguye mu Mujyi wa Oakton muri Leta ya Virginia, muri Leta Zunze Ubumwe za Amerika.

Mpyisi (ibumoso)avuga ko ari mu ba mbere bishimiye icyemezo cyo gutabariza Umwami Kigeli V mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza