Ibyo Minisitiri Nyirasafari na Evode Uwizeyimana bahishiye Abanyarwanda

Yanditswe na Philbert Girinema
Kuya 7 Ukwakira 2016 saa 07:53
Yasuwe :
0 0

Minisitiri w’Uburinganire n’Iterambere ry’Umuryango, Esperance Nyirasafari n’Umunyamabanga wa Leta muri Minisiteri y’Ubutabera Ushinzwe ibyerekeye Itegeko Nshinga n’andi mategeko, Uwizeyimana Evode; ni bamwe mu bayobozi barahiriye inshingano nshya bahawe kuwa 4 Ukwakira 2016.

Minisitiri Nyirasafari wasimbuye Minisitiri Gashumba Diane, yavuze ko ibibazo biri mu muryango Nyarwanda asanzwe abizi neza kuko uretse kuba Umunyarwanda, akiri umudepite yabarizwaga muri Komisiyo ya Politiki, Uburinganire, Ubwuzuzanye bw’abagabo n’abagore mu iterambere ry’Igihugu.

Yavuze ko afatanyije n’izindi nzego agiye guhangana n’ikibazo cy’abumva nabi uburinganire bigatuma havuka amakimbirane mu miryango n’imfu za hato na hato.

Yagize ati “Ngiye guhangana no kutumvikana kw’imiryango abantu bapfa amasambu bitewe no kumva nabi uburinganire no guha ijambo umugore.Hari abagifite imyumvire ya kera, tuzagerageza kubumvisha ubwiza bw’ubwuzuzanye dufatanyije n’izindi nzego”.

Umwanya Evode Uwizeyimana yahawe ntabwo wari usanzwe muri Minisiteri y’Ubutabera. Avuga ko bimwe mu by’ingenzi agiye gukoraho ari uguhuza Itegeko Nshinga n’amategeko yaba ay’imiryango u Rwanda rwinjiramo n’ayandi akoreshwa buri munsi hagamijwe ko byose bikorerwa mu byifuzo by’Abanyarwanda.

Yagize ati “Hari imiryango mpuzamahanga turimo kwinjiramo, ishoramari ririyongera, ibyo byose bisaba kuvugurura amategeko bikajyanirana kandi byose bigashingira ku Itegeko Nshinga kuko ari ryo ribumbatiye umurongo Abanyarwanda bihaye.”

Akomeza avuga ko mu rugamba rwo guharanira ko amategeko agendera ku byifuzo by’Abanyarwanda biri mu Itegeko Nshinga, hazabaho kuvugurura amategeko ashaje akajyanishwa n’igihe, gukora ayorohereza ishoramari n’ibindi.

Evode Uwizeyimana yari asanzwe ari Komiseri muri Komisiyo yo kuvugurura amategeko.

Evode Uwizeyimana yiteguye kujyanisha amategeko n'ibyifuzo by'Abanyarwanda
Minisitiri Nyirasafari mu muhango wo kugeza indahiro ye ku Mukuru w'Igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza