Ibyo u Rwanda rwagezeho mu 2016 mu mboni ya Faustin Twagiramungu

Yanditswe na Philbert Girinema
Kuya 7 Mutarama 2017 saa 10:00
43 29

Twagiramungu Faustin wabaye Minisitiri w’Intebe w’u Rwanda nyuma ya Jenoside, akaza no kwiyamamariza umwanya w’Umukuru w’Igihugu nk’umukandida wigenga mu 2003; yagaragaje uko abona ibyo u Rwanda rwagezeho mu 2016 ashima ko bizakomeza kuba indorerwamo y’igihugu mu mahanga.

Iyi mpirimbanyi y’umunyapolitiki washinze ishyaka ritavuga rumwe n’ubutegetsi bw’u Rwanda akaryita RDI Rwanda Rwiza, yakunze kumvikana mu itangazamakuru risebya Leta y’u Rwanda, uko imyaka yagiye ikurikirana nta na rimwe yigeze yumvikana agira icyo ashima mu byo u Rwanda rwagezweho mu myaka irenga 20 ishize, ariko mu minsi ishize yatunguye benshi.

Twagiramungu mu mwaka wa 2013 wigeze kuvuga ko ishyaka rye hari ubufatanye rifitanye n’umutwe wa FDLR ugizwe n’abasize bakoze Jenoside mu Rwanda mu 1994, aherutse gutungura benshi mu basomye inyandiko aherutse gushyira ahagaragara.

Mu butumwa aherutse gucisha ku rukuta rwe rwa Facebook rukurikirwa n’abantu basaga 14,500, yifurije Abanyarwanda aho bari hose umwaka mushya, aboneraho no gutangaza ko uwa 2016 hari byinshi wasigiye u Rwanda bizakomeza kuruhesha ishema mu ruhando rw’amahanga.

Aha yakomoje ku nyubako ya Kigali Convention Center igizwe na Hotel y’inyenyeri eshanu ifite ibyumba 292, icyumba cy’inama cyakira abantu basaga 2500, ibiro byo gukoreramo n’ibindi. Ni inyubako ifite agaciro ka miliyoni 300 z’amadolari abarirwa muri miliyari 223 z’amafaranga y’u Rwanda.

Avuga kuri yo, Twagiramungu yagize ati “Inyubako yiswe “Kigali Convention Center” (KCC), n’ubwo idahiga ubwiza “Kenyatta Conference Center” y’i Nayirobi ; ariko ku gihugu gikennye nk’icyacu, ni igitego mu bihugu bitatu byahoze biyoborwa n’abakoloni b’Ababiligi (Burundi, RD Congo, Rwanda).”

Yakomoje kandi no ku iterambere ry’ikompanyi ya RwandAir iherutse kugura indege yahawe izina ‘Umurage’, Airbus 330-300, igiye gufasha u Rwanda kwinjira ku isoko ryo mu Burayi na Leta Zunze Ubumwe za Amerika. Ni indege ifite imyanya 274. Iyi yaje ikurikira iyiswe ubumwe ( Airbus A330-200) yaguzwe miliyoni 250 z’amadolari (asaga miliyari 200 z’amafaranga y’u Rwanda).

Twagiramungu asanga izi ndege zizahesha isura nziza u Rwanda aho zizajya hose mu mahanga. Ati “Indege ebyiri za Airbus 330-320 na 330-300 zizaba indorerwamo y’u Rwanda mu bihugu zizajya zitwarira abagenzi.”

Yanakomoje kandi ku kibuga cy’Indege mpuzamahanga cya Bugesera kigomba kuzura umwaka utaha wa 2018, avuga ko cyari kimaze imyaka isaga 50 gitegerejwe bityo ko kigiye gutuma u Rwanda rujya ku rundi ruhando mpuzamahanga.

Ati “ Hafashwe icyemezo cyo kuzubaka “Ikibuga Mpuzamahanga cy’Indege” (Aeroport International) mu Bugesera, hakaba hari hashize imyaka 50 irenga iki kibuga gishakwa n’Abanyarwanda ndetse n’Abanyamahanga.”

Yavuze ko ‘ibikorwa by’amajyambere mu Rwanda byaba imihanda, ibitaro bya Leta, n’izindi nyubako z’ingirakamaro bigomba gushyigikirwa, mu gihe bifitiye akamaro Abataturarwanda muri rusange’.

Imvugo nk’iyi icyeza ibyo Leta y’Ubumwe imaze kugeza ku banyarwanda ntabwo isanzwe kuri Twagiramungu Faustin nk’umwe mu batavuga rumwe na Leta bakunze kurangwa no gupfobya byimazeyo ibyo u Rwanda rwagezeho kuva mu myaka isaga 20 ishize.

Twagiramungu yabaye Minisitiri w’Intebe w’u Rwanda kuva mu 1994 yegura mu 1995, ahita yerekeza mu buhungiro mu Bubiligi aho amaze imyaka isaga 20.

Mu 2003 yiyamamarije umwanya w’Umukuru w’Igihugu nk’umukandida wigenga gusa aza gutsindwa aho yagize amajwi 3.62% mu gihe Perezida Paul Kagame yagize 95.0 %.

Twagiramungu yashinze ishyaka ritavuga rumwe n'u Rwanda ryitwa RDI Rwanda Rwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE