IEE yahuje imbaraga na Mastercard Foundation mu kubahisha umwuga wa mwarimu mu Rwanda

Yanditswe na Ishimwe Israel
Kuya 5 Kamena 2019 saa 08:55
Yasuwe :
0 0

Guverinoma y’u Rwanda yafashe ingamba nyinshi mu kuzamura ireme ry’uburezi, zirimo izishingiye ku kunoza imyigire n’imyigishirize, guteza imbere umwuga wo kwigisha n’izizamura imibereho ya mwarimu.

Ni urugendo rusaba inzego za leta n’ibigo by’abikorera ngo rutange umusaruro ufatika cyane ko umwarimu w’umuhanga kandi wishimye ahindura ubuzima bw’igihugu.

Ubusanzwe, Minisiteri y’Uburezi yahaga imbaraga amasomo ya Siyansi, Ikoranabuhanga, Engineering n’Imibare (STEM) aho abanyeshuri bafite amanota meza ariyo bahitagamo muri kaminuza.

Mu kuzamura ireme ry’uburezi, yashyize amasomo nderabarezi (TTC) muri kaminuza n’amashuri makuru mu yo leta izajya iha buruse n’amafaranga atunga umunyeshuri bitishyurwa.

Muri iki cyerekezo, Umuryango udaharanira Inyungu wunganira ireme ry’Uburezi, Inspire Educate and mpower (IEE) wahuje imbaraga na Mastercard Foundation mu guha ubumenyi abakobwa b’abahanga mu bya siyansi barimo abafite inzozi zo kuba abarimu.

Uyu mushinga wiswe Teaching Assistantship Project (TAP) ugamije gukundisha abakobwa 150 b’intoranywa umwuga w’ubwarimu hagamijwe kuwubakira ku beza bari mu gihugu. Wamurikiwe i Kigali ku wa 31 Gicurasi 2019.

Abakobwa batoranyijwe ni abatsinze neza mu mashuri yisumbuye mu 2018; bakora nk’abunganira ba mwarimu aho bakurikirana uko ategura amasomo, uko ayatanga kugeza ku gukosora amasuzuma bumenyi.

Ishimwe Ange Liza woherejwe muri GS Ste Famille mu Mujyi wa Kigali yavuze ko muri iyi porogaramu bizeye kuzakundisha abandi ubwarimu.

Yagize ati “Mbere ntarinjira muri iyi gahunda, nabonaga ubwarimu ari umwuga uciriritse ku bijyanye n’amafaranga n’agaciro abarimu bahabwa muri sosiyete. Nasanze rero ari byiza kuko gutanga ibyo wahawe, uzi neza bitera ishema. Nizera ko aho wajya hose waba mwarimu, mu byo nziga nzaharanira kwigisha abandi.’’

Uyu mukobwa w’imyaka 19 yize Ubugenge, Ubutabire n’Ibinyabuzima muri Groupe Officiel de Butare, ubu akora nk’umwarimu wungirije (assistant) mu Bugenge n’Ibinyabuzima mu mwaka wa Mbere n’uwa Kabiri.

Ineza Blandine wasoje mu Ishami ry’Ubugenge, Ubutabire n’Ibinyabuzima (PCB) muri Groupe Scolaire de Butare na we yavuze ko TAP izamufasha “Gutanga ibyo mfite nka mwarimu.’’

Ineza w’imyaka 19 yoherejwe muri Groupe Scolaire Kicukiro yavuze ko amaze kwiyungura ubumenyi mu bijyanye n’uko abanyeshuri bacungwa.

Mu mwaka TAP izamara yitezweho kubaka ubushobozi bw’abakobwa no gutegura neza abafite inyota yo kuba ba mwarimu.

Umuyobozi wa IEE mu Rwanda, Murenzi Emmanuel, yabwiye itangazamakuru ko uyu mushinga ari amahirwe meza yo gutegura abarimu b’abahanga mu masomo y’Imibare na Siyansi.

Yagize ati “Intego nyamukuru ni ukumvisha abana biga mu mashuri yisumbuye ko buri wese yakwiga Imibare na Siyansi. Mwarimu aba azi aho intege ze ziri ariko hashobora kujyaho ubundi buryo aba bakobwa bicarana na banyeshuri byumwhariko abakobwa bagenzi babo bakumva ahari intege nke zabo bityo bakafasha . Benshi babiyumvamo kurusha abarimu.’’

Yakomeje avuga ko bazanabera abanyeshuri ijwi kuri mwarimu mu gihe bafite ibibazo. Ati “Nihagira abakomeza ubwarimu tuzagira ab’abahanga, bizamure ireme ry’uburezi.’’

Ku ikubitiro abakobwa 15 bagaragaje ko bashaka kwiga ibijyanye n’uburezi muri kaminuza.

Ibigo by’amashuri byarasubijwe

Umuyobozi wungirije wo muri Groupe Scolaire Murambi mu Karere ka Rulindo, Swaleh Mayanja, yavuze ko abakobwa bahawe bafasha abarimu, na bo bakabamenyereza.

Ati “Abakobwa benshi batinya kwiga Siyansi ariko iyo babonye bagenzi babo babitinyutse kandi bari mu kigero kimwe, barabishima, na bo bakabikunda. Cyabaye igisubizo kuko badukorera neza, bakemuye ikibazo cy’abarimu bake ku buryo gukurikirana abanyeshuri bigorana.’’

Abakobwa 150 bafashwa n’abarimu b’abahanga [mentors] 15, babahuguye iby’ibanze ku myitwarire y’umwarimu mbere yo kumenyerezwa.

Kayirangwa Marie Assoumpta umaze imyaka 23 mu mwuga w’ubwarimu yavuze ko “Mu gihe bamwe bahitamo kujya mu bwarimu, twazagira abarezi bafite ireme rizima. N’abatazahitamo ubwarimu twizera ko aho bazajya bazabikora neza.’’

IEE yatangiye uyu mushinga ikorana n’ibigo 73 byo mu turere 15 twa Musanze, Gakenke, Rulindo, Rusizi, Burera, Karongi, Muhanga, Ruhango, Nyagatare, Gatsibo, Kayonza, Kicukiro, Nyarugenge, Gasabo na Bugesera.

Ibigo byose bikorana na TAP bizahabwa ibikoresho byo kwifashisha mu masomo ya siyansi n’ibyo muri laboratwari.

Uyu mushinga uri mu igeragezwa ujyanye n’icyerekezo cyo gushaka abarimu bashoboye gutanga ubumenyi bwa Siyansi mu mashuri yisumbuye bijyanye n’integanyanyigisho nshya. U Rwanda rwabaye igihugu cya kabiri ugeragerejwemo nyuma ya Nigeria.

IEE yatangiye mu Rwanda mu 2005, aho ikorana na Mineduc n’Ikigo cy’Igihugu gishinzwe Uburezi (REB) mubijyanye no guteza imbere ireme ry’uburezi.

Abakobwa 150 b'abahanga mu bya Siyansi bashyiriweho uburyo bwitezweho gutanga umusanzu mu kurema abarimu b'intiti
Ineza Blandine wasoje mu Ishami ry’Ubugenge, Ubutabire n’Ibinyabuzima (PCB) muri Groupe Scolaire de Butare na we yavuze ko gahunda ya TAP izamufasha gutanga ibyo afite nkuko mwarimu abigenza
Ishimwe Ange Liza yavuze ko binyuze muri iyi porogaramu bazakundisha bagenzi babo umwuga w'ubwarimu
Umuyobozi wungirije wo muri Groupe Scolaire Murambi mu Karere ka Rulindo, Swaleh Mayanja, yavuze ko ishuri rye ryungukiye mu bakobwa ryahawe bafasha ba mwarimu
Uyu mushinga watangiranye n'abakobwa 150 batsinze neza ibijyanye n'Imibare na Siyansi mu bizamini by'amashuri yisumbuye mu 2018

Amafoto: Kayiranga Victor


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza