Igisirikare cya Sri Lanka cyakozwe ku mutima n’ibikorwa by’Ingabo z’u Rwanda

Yanditswe na Cyprien Niyomwungeri
Kuya 10 Kanama 2017 saa 04:51
Yasuwe :
0 1

Itsinda ry’abasirikare 16 baturutse mu ishuri rikuru rya gisirikare ryo muri Sri Lanka, bashimye ibikorwa by’ingabo z’u Rwanda mu kongera kubaka igihugu no kunga abanyarwanda, biyemeza ko aya masomo bazayakoresha iwabo.

Iri tsinda ryageze i Kigali ku wa 9 Kanama rizasoza uruzinduko rwaryo ku wa 22 Kanama nyuma yo gusura imishinga yagizwemo uruhare n’ingabo z’u Rwanda, iri mu ntara zitandukanye z’igihugu.

Kuri uyu wa 10 Kanama ryasuye urwibutso rwa Jenoside rwa Kigali rikomereza kuri Minisiteri y’ingabo aho ryakiriwe n’umugaba w’ingabo zirwanira mu kirere, Brig.Gen. Charles Karamba zisobanurirwa imikorere n’inshingano by’igisirikare cy’u Rwanda na Brig.Gen Chris Murari ushinzwe ibikorwa bya gisirikare n’amahugurwa.

Col GMCKB Ekanayake uyoboye iri tsinda, yabwiye itangazamakuru ko ibikorwa by’ingabo z’u Rwanda nyuma ya Jenoside birimo gutanga umusanzu mu kubaka igihugu cyari kimaze gusenyuka ari isomo ryiza bazasubirana mu gihugu cyabo.

Yagize ati “Uko igisirikare cy’u Rwanda kirimo gukora akazi keza mu kunga abanyarwanda no kongera kubaka igihugu, ni ikintu cyiza kuri twe kwigira ku gihugu nk’iki kuko natwe turi igihugu kirimo kongera kwiyubaka no kwiyunga turizera ko amasomo tuzakura hano azatubera ingirakamaro mu gihugu cyacu, ni ubunararibonye budasanzwe kuri twe.”

Yongeyeho ko u Rwanda ari ishuri ryiza kuri Sri Lanka kuko ibihugu byombi bifitanye umubano mwiza mu bya gisirikare kandi bikaba bisa n’ibisangiye amateka yo mu bihe byahise.

Ati “U Rwanda na Sri Lanka bisangiye amateka y’ibihe byahise by’amakimbirane, kandi turimo kubona ko mwihuta mu rugamba rwo kongera kubaka igihugu. Kuba rero twaranyuze mu bihe bimwe kandi mukaba murimo kubisohokamo neza ni ikintu twabigiraho.”

Brig.Gen Sfari Ferdinand ushinzwe politiki n’igenamigambi muri Minisiteri y’Ingabo, yashimangiye ko umubano w’ibihugu byombi ari nta makemwa kuko uretse abasirikare bakuru bizeyo, hari n’abandi 20 barimo kwigayo amasomo y’ibijyanye n’ubwubatsi (engeneering).

Yavuze ko uru ruzinduko rugamije gutanga amasomo azafasha igisirikare cya Sri Lanka.

Yagize ati “Baje hano mu Rwanda ngo bigire ku bunararibonye dufite kugira ngo bibafashe nabo gutegura ibya gisirikare by’iwabo. Ni urugendoshuri bagiriye mu Rwanda mu rwego rw’ubufatanye dufitanye.”

Sli Lanka ni igihugu kiba mu majyaruguru y’u Buhinde, gikunze kujya mu butumwa bwo kugarura amahoro ku Isi aho gihurira n’u Rwanda bagasangizanya ubunararibonye.

Itsinda ry’abasirikare baturutse muri Sri Lanka basuye urwibuts rwa Jenoside rwa Kigali
Iri tsinda ryasuye Minisiteri y'ingabo rigirana ibiganiro ku bikorwa by'ingabo z'u Rwanda
Col GMCKB Ekanayake uyoboye iri tsinda, yabwiye itangazamakuru ko ibikorwa by’ingabo z’u Rwanda nyuma ya Jenoside birimo gutanga umusanzu mu kubaka igihugu
Abasirikare mu ngabo z'u Rwanda n'abo muri Sri Lanka bafashe ifoto y'urwibutso

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza