Ihurizo mu gukurikirana Abarundi bakekwaho uruhare muri Jenoside yakorewe Abatutsi

Yanditswe na
Kuya 15 Gashyantare 2017 saa 07:56
Yasuwe :
0 0

Ubushinjacyaha bw’u Rwanda buvuga ko bugiye kwifashisha umwanya bufite mu nzego mpuzamahanga buhuriramo n’u Burundi, hagamijwe gukurikirana abaturage babwo bashinjwa uruhare muri Jenoside yakorewe Abatutsi mu 1994, ariko bakaba badakurikiranwa.

Guhera mu myaka ya 1972 na 1989 u Rwanda rwahaye ubuhungiro impunzi z’Abarundi, mu gihe cya Jenoside yakorewe Abatutsi mu 1994 bamwe muri bo baza kuyigiramo uruhare basubira i Burundi, ntibaryozwa ibyo bakoze.

Nyamara ngo amakuru yatanzwe mu nkiko zirimo n’iza Gacaca z’aho bikekwa ko bakoreye ubwicanyi, n’imyirondoro yabo irandikwa.

Muri Nyakanga 2015, Umuyobozi w’Ishami Rishinzwe gukurikirana abakekwaho uruhare muri Jenoside yakorewe Abatutsi mu 1994 baba mu mahanga, Jean Bosco Siboyintore, yavuze ko ku bufatanye n’imiryango iharanira inyungu z’abacitse ku icumu, hari gukusanywa imyirondoro y’abo Barundi n’ibimenyetso bifatika byatuma iperereza ritangizwa neza.

Ubushinjacyaha bugaragaza ko mu gukurikirana abakekwaho Jenoside yakorewe abatutsi mu 1994 bahungiye hanze y’igihugu, guhera mu 2013 kugeza mu gihembwe cya kabiri cy’umwaka w’ingengo y’imari wa 2016-2017, bwohereje mu mahanga impapuro zisaba guta muri yombi abakekwaho ibyaha 578.

Umushinjacyaha Mukuru Jean Bosco Mutangana, mu kiganiro n’abanyamakuru kuri uyu wa Mbere, yavuze ko ikibazo cy’Abarundi bakoze Jenoside mu 1994 cyatangiye gukurikiranwa kera, ariko ubufatanye bukenewe hagati y’u Rwanda n’u Burundi bukaba busaba ibintu byinshi.

Yagize ati “Bisaba igihugu [u Burundi] ubwacyo kubigiramo ubushake, bisaba Interpol niba abo Barundi bashobora gukora ingendo, ariko twakoze impapuro zo guta muri yombi abo dukekaho ko bakoze ibyo byaha.”

Yakomeje agira ati “Ntabwo dufite gushyira igitutu ku gihugu ngo gishyire mu bikorwa amategeko yacyo kuko buri gihugu kirigenga, ariko icyo tuzi ni uko twebwe nk’Ubushinjacyaha tuvugana n’inzego z’ubushinjacyaha zo mu bihugu bitandukanye, tukareba ko ibyo twasabye byashyirwa mu bikorwa. Icyaha cya jenoside ni icyaha gifite umwihariko kuko cyo ntabwo gisaza.”

Yavuze ko iri perereza kugira ngo ryorohe biba bisaba n’ubufatanye bw’inzego zitandukanye zaba ‘Minisiteri y’Ubutabera, Minisiteri y’Ububanyi n’Amahanga n’Ubushinjacyaha bukuru bwo muri icyo gihugu nk’u Burundi, n’ibindi”.

Gufatanya k’u Rwanda n’u Burundi ntikoroshye

Muri iki gihe ubufatanye hagati y’ibihugu byombi burasa n’ubugoye mu gihe u Rwanda n’u Burundi bitabanye neza, aho u Burundi bushinja u Rwanda kuba inyuma y’ababuhungabanyiriza umutekano, ibintu u Rwanda rwamaganira kure.

Mutangana yakomeje agira ati “Kubera impamvu zitandukanye bishobora kuba bitarihuse, dutekereza ko ari ubusabe bukiri aho kugeza n’ubu. Hari n’ibindi bihugu bitari u Burundi nabyo twohereza impapuro hagashira imyaka umunani cyangwa itanu, itandatu bitarasubiza.”

Yakomeje agira ati “Icyo dukora ku bijyanye n’uko guceceka, hari ukujyayo kuvugana n’Ubushinjacyaha, icya kabiri, hari ukwifashisha inzego za dipolomasi kuko hakenewe ubushake bwa politiki ngo ibyo bintu bikorwe.”

Aha yavuze ko Ubushinjacyaha bw’u Rwanda buzakomeza kubishyiramo imbaraga, bukareba aho byadindiriye niba hari amakuru yaho babasha kumenya, kuko ari ikindi gihugu gifite ubwigenge bwacyo.

Ati “Ntabwo ugihoza ku nkeke ngo gira gutya na gutya, ahubwo bica mu nzira za dipolomasi.”

U Rwanda rushobora guca indi nzira

Mutangana yavuze ko u Rwanda rufite imyanya yo ku rwego rukomeye mu Ihuriro Nyafurika ry’Abashinjacyaha ku mwanya wa Visi Perezida, rikaba ihuriro ruhuriramo ‘n’abo barundi’, rukagira n’umwanya wa Visi Perezida mu ihuriro ry’Abashinjacyaha muri Afurika y’Iburasirazuba, n’Abarundi bakaribamo.

Ati “Ni ukuvuga ngo tuzabegera duciye muri ayo mahuriro, turebe ngo icyo mushobora gukora ni iki kuri abo.“Hari ihame rizwi mu mategeko, uburanisha umuntu cyangwa ukamwohereza aho yakoreye icyaha, ntabwo ushobora kwicara warasinye amasezerano mpuzamahanga yo gukumira icyaha cya jenoside yo muri 1948, ngo uceceke, ntabwo bibaho, ugomba gushyira mu bikorwa kimwe muri ibyo.”

Yanagarutse ku bandi bakekwaho ibyaha bya jenoside yakorewe Abatutsi mu 1994 ariko bahunze ubutabera nka Felicien Kabuga, avuga ko kugira ngo bafatwe bisaba ubufatanye bw’inzego mpuzamahanga, kuko hari abakekwaho ibyaha baba barihinduranyije ku buryo biba bigoye kubageraho.

Ati “Hari byinshi bikorwa kubera ko aba ari iperereza, tudashobora gushyira hanze”; Gusa yizeza Abanyarwanda ko ikibazo cy’abantu bashakishwa, Ubushinjacyaha bw’u Rwanda bukivuganaho n’izindi nzego mpuzamahanga kandi amaherezo bazafatwa, imyaka yahita uko izaba ingana kose.

Mu bihe bitandukanye, Abarokotse Jenoside yakorewe Abatutsi mu Rwanda bo mu bice bihana imbibi n’u Burundi bakomeje gusaba ko Abarundi bari bahacumbitse bakoze Jenoside bashyikirizwa ubutabera na bo bagahanwa.

Amateka yabo muri Jenoside agarukwaho cyane mu bice bya Nyakizu, Ntongwe, Kinazi muri Ruhango, Mugina muri Kamonyi, Rilima muri Bugesera no mu bice bya Gisagara ahahoze ari mu makomini ya Muganza, Kigembe, Kibayi n’ahandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244