Kwamamaza

Ikiganiro na Mukarutamu wagize uruhare mu gushyiraho Umunsi w’Umugore wo mu Cyaro

Yanditswe kuya 24-10-2016 saa 17:07' na Prudence Kwizera


Daphrose Mukarutamu utuye mu murenge wa Save, mu karere ka Gisagara ni umwe mu bahagarariye u Rwanda i Beijing mu Bushinwa mu 1995, ubwo hashyirwagaho Umunsi Mpuzamahanga w’Umugore wo mu Cyaro wizihizwa tariki ya 15 Ukwakira.

Uyu mubyeyi w’imyaka 69 y’amavuko yagiranye ikiganiro na IGIHE agaragaza byinshi ku ishyirwaho ry’umunsi Mpuzamahanga w’Umugore wo mu cyaro, avuga n’ibindi bikorwa yagiye akora bifitiye benshi akamaro.

Mukarutamu ni umupfakazi wa Jenoside yakorewe Abatutsi, kuko yamutwaye abana barindwi n’umugabo ndetse n’abandi benshi bo mu muryango we.

Avuga ko nyuma ya Jenoside yitegereje uko abagore bagenzi be bayirokotse babayeho, bituma agira igitekerezo cyo kubabumbira hamwe muri ‘Association’ yitwa Duhozanye, ngo bashake icyo bakora kibakura mu bwigunge n’ubukene.

Ibi ngo byatumye abayobozi ku nzego zitandukanye bamumenya, ari nabyo byatumye atoranywa mu bagiye guhagararira u Rwanda mu ishyirwaho ry’umunsi Mpuzamahanga w’Umugore wo mu Cyaro.

Yagize ati “Nakoranyije bagenzi banjye b’abapfakazi mbagira inama yuko twakwikorera ibyo dushoboye kugira ngo tubashe kwigondagondera uducumbi dushobora kubamo. Ni muri urwo rwego abayobozi bamenye baje mu cyaro, barampamagara mbabwira ibyo aribyo ndetse n’ibindi bibazo umugore wo mu cyaro afite”.

Arakomeza ati “Haje kuba inama mpuzamahanga i Beijing mu Bushinwa, numva nanjye barampamagaye bati ‘ngwino tugende uzahagararira abagore bo mu cyaro’, naragiye rero njyana n’abandi bagore bo mu Rwanda, bahagarariye inzego bwite za Leta n’abandi batandukanye”.

Mukarutamu asobanura ko mu nama i Beijing hatangiwe ibitekerezo bitandukanye hagamijwe kureba uko umugore wo mu cyaro yakubakirwa ubushobozi, inama isozwa hafatiwemo imyanzuro 12, irimo n’ishyirwaho ry’umunsi Mpuzamahanga Ngarukamwaka w’Umugore wo mu Cyaro.

Ashima uko Leta y’u Rwanda yubahiriza imyanzuro ya Beijing

Mukarutamu avuga ko nyuma yo kuva i Beijing, bageze mu Rwanda bashyikiriza Leta imyanzuro yafashwe, nayo irayishyigikira kuko n’ubusanzwe hariho Politike yo guteza imbere umugore no kumwubakira ubushobozi.

Ati “Twagize amahirwe yo kugira Leta itwumva, ndetse n’iyo myanzuro uko ari 12 ya Beijing iyumvwa, abagore batangira kuyishyira mu bikorwa, ku buryo navuga ko duhereye icyo gihe na Leta idufashije, ubu rwose navuga ko abagore dufite nka 70% yaho tumaze kugera dutera intambwe mu iterambere”.

Akomeza avuga ko hasabwa ingufu za buri wese kugira ngo 30% isigaye nayo igerweho kuko ibyo abagore bo mu cyaro bamaze kugeraho bigaragaza icyizere cy’ibishoboka.

Ibindi bikorwa by’indashyikirwa Mukarutamu yakoze

Daphrose Mukarutamu azwi cyane nk’umubyeyi wakoze igikorwa gikomeye cyo gushinga Association Duhozanye ibumbiye hamwe abagore n’imfubyi za Jenoside yakorewe abatutsi.

Asobanura ko kugeza ubu Duhozanye ibumbiye hamwe abanyamuryango bagera ku bihumbi bitatu (3 000), kandi bose bamaze kwiyubaka kuko bafite amatsinda agera kuri 60 abahuza.

Ati “Ayo matsinda rero turayakurikirana, buri tsinda riba rigomba kugira konti yaryo n’amafaranga runaka azigamyeho, ku buryo umunyamuryango ashobora kwaka inguzanyo akiteza imbere cyangwa agakemura ikibazo”.

Mukarutamu avuga ko abanyamuryango ba Duhozanye bakora ibindi bikorwa by’amajyambere, nko kuba aribo bashinzwe gukwirakwiza ibinyobwa bya Bralirwa mu Karere ka Gisagara no mu gice kimwe cy’Akarere ka Huye.

Ibi bikorwa bituma abana bagizwe imfubyi na Jenoside babona akazi kabaha amafaranga kuko abagera kuri 15 bakora kuri Depots za Bralirwa ziri hirya no hino mu Karere ka Gisagara no mugice kimwe cya Huye.

Aba bana kandi nibo bafasha Duhozanye kwiga imwe mu mishinga itandukanye y’iterambere no kuyishyira mu bikorwa.

Mukarutamu basigaye bamwita ‘Padiri Mukuru’

Kubera ibikorwa bitandukanye yagiye akora by’umwihariko nko gushinga Associtation Duhozanye byatumye bamwe bamwita “Mama Duhozanye”, abandi bamuhimba “Padiri Mukuru” kubera igikorwa akora cyo guhumuriza abahungabanye bagakira.

Mukarutamu agira uruhare mu bikorwa bitandukanye, aha yari mu gikorwa cyo gutera inkunga abakobwa babyariye iwabo

Mukarutamu avuga ko nyuma yo gushinga Associtation Duhozanye no kugira inama abapfakazi ba Jenoside, byakomeje kumukurikirana kuko na nubu abantu bafite ibibazo bamugana ku bwinshi baje kugisha inama.

Ati “Abantu bacye nakira ni babiri ku munsi baje kumbwira ibibazo bafite nkabagira inama kandi nyuma bakambwira ko bakize. Impamvu rero banyise Padiri Mukuru ngo ni uko nkiza abantu bahungabanye, ngo ungeze iruhande yahungabanye tukaganira arakira. Mba mfite abakecuru baza bakarara iwanjye tukaganira, bakambwira agahinda kabo, noneho iyo tuganiriye kuri za nama nyine mbagira nkabahumuriza barakira bagataha bamerewe neza”.

Yatoranyijwe nk’Umurinzi w’Igihango

Hagendewe ku bikorwa yakoze byubaka sosiyete Nyarwanda, Mukarutamu yatoranyijwe mu Karere ka Gisagara n’Umurinzi w’Igihango.

Kugira ngo umuntu abe Umurinzi w’Igihango biterwa n’ibikorwa byiza aba yarakoze, ndetse n’uko abaturage bamuzi. Ni muri urwo rwego Mukarutamu yatowe n’abaturage mu murenge atuyemo.

Avuga ko kuba yaratowe byamwongereye imbaraga zo gukomeza gukora ibyiza byubaka sosiyete.

Ati “Jyewe mba numva ngomba kubikora kuko Imana yansigaje kuri iyi si, ntacyo natanze kugira ngo nsigare, ntacyo natanze kugira ngo tubone ubuyobozi bwiza, ni yo mpamvu nkora mu gihe cyose numva mfite imbaraga, kugira ngo mbane n’abandi neza nubake igihugu kandi binamfashe kwihangana mu bikorwa nagiye mpura na byo”.

Imibereho ye mu rugo nk’umupfakazi

Nubwo Jenoside yamumazeho umuryango wose, Mukarutamu ntiyaheranwe n’agahinda kuko afite abana arera, aho kuri ubu mu rugo rwe hamaze kurererwa abana barenga 10, hakaba hari abo yamaze gushyingira n’abandi bakiri mu mashuri.
Mu rugo iwe mu mudugudu wa Gasambu, Akagari ka Gatoki, umurenge wa Save, hakunze kuba hari abana n’umukozi umufasha gukora imirimo yo mu rugo no kwita ku matungo.

Icyamushimishije n’icyamubabaje mu buzima bwe

Daphrose Mukarutamu avuga ko mu buzima bwe ikintu kimwe cyamushimishije cyane ari uko yabashije kubaho nyuma ya Jenoside akabona impinduka mu gihugu aho Leta itavangura abaturage bayo, ahubwo bose bahabwa uburenganzira bungana.

Mukarutamu avuga ko icyamubabaje cyane mu buzima bwe ari uko abantu bishwe bagashira batabonye ko hari Leta nziza itavangura ifata abanyarwanda bose kimwe.

Yagize ati “Ikimbabaza nonene ni icyo ngarukaho, iyo ntekereje ukuntu abantu bashize bagiye batabonye ko abantu bashobora kubaho. Iyo mfite telefone mvugana n’abantu ndavuga nti abantu bapfuye bakiri batoya muri iki gihugu, numva hari akantu gasa n’akambabaje”.

Mubijyanye n’ibyo kurya, Mukarutamu avuga ko akunda ibiryo byose atavangura ariko cyane cyane akunda guteka Kinyarwanda, nk’imyumbati igeretse ku bishyimbo, igitoki kigeretse ku bisyimbo n’ibindi nk’ibyo.

Kugeza ubu Association Duhozanye Mukarutamu abereye Perezida,ni yo mufatanyabikorwa ukomeye mu karere ka Gisagara, kuko ifatanya mu bikorwa bindi bigamije iterambere ry’abaturage, birimo uburezi, imibereho myiza n’ibindi.

Mukarutamu mu gikorwa cyo kwizihiza umunsi mpuzamahanga w'Umugore wo mu cyaro, aha yashyikirizaga inka umuturage
Mukarutamu ubwo yari mu gikorwa cyo koroza inka abatishoboye mu Murenge wa Muganza mu Karere ka Gisagara

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved