Kwamamaza

Rwamagana:Ikigo EAX cyakoranye umuganda n’abaturage kinaha imiryango 10 mituweli

Yanditswe kuya 29-10-2016 saa 18:36' na Jean Pierre Tuyisenge


Ikigo cy’Ubuhahirane cya Afurika y’i Burasirazuba East Africa Exchange (EAX) Ltd cyakoranye umuganda n’abaturage bo mu murenge wa Mwurire mu karere ka Rwamagana, kinaha ubwisungane mu kwivuza imiryango igera ku icumi.

Ni mu muganda usoza ukwezi wo kuri uyu wa Gatandatu tariki ya 29 Ukwakira 2016. Ubuyobozi bw’iki kigo butangaza ko bateguye iyi gahunda mu rwego rwo kwegera abaturage ngo bifatanye nabo ndetse bakorane nabo ibikorwa biganisha igihugu ku iterambere rirambye.

Umuyobozi Mukuru w’iki kigo, Joshua Rugema, avuga ko bifuza gufatanya n’abandi baturage gushyira mu bikorwa gahunda za Leta.

Yagize ati “ Turi abanyarwanda, nubwo dukora ubucuruzi ariko tugomba gukorana n’abandi Banyarwanda ni yo mpamvu dufatanya n’abo gukora ibikorwa by’iterambere ndetse tunaremera ubushobozi abatabufite, ari na yo mpamvu twishyuriye bamwe mituweli.”

Umuyobozi Nshingwabikorwa w’Umurenge wa Mwurire, wabereyemo iki gikorwa Chantal Mukashyaka, yashimye iki kigo ku bw’igikorwa cy’umuganda bakoze no gutera inkunga imiryango itishoboye, avuga kandi ko ashima igikorwa cyo gukusanya no gutunganya umusaruro bakorera abafatanyabikorwa babo kuko ngo mbere abaturage bari baribasiwe n’abamamyi.

Yagize ati “ Bakoze igikorwa cyiza cyo gukora umuhanda, ubu abaturage bazajya bagana isoko rya Ntunga bitabagoye, kuko ubundi byabasabaga kuzenguruka ariko uyu muhanda ukozwe urarushaho kuborohereza.”

Yashimye gahunda nziza iki kigo gifite yo guhunikira abaturage bakanabafasha kugurisha umusaruro wabo wageze ku giciro cyiza.

Ati “ Bafite gahunda nziza zifasha umuturage, ubundi hari igihe umumamyi yajyaga aza akabaka imyaka yabo ku giciro gito kugira ngo we aziyungukire imyaka imaze guhenda, ariko aba urabona ko bafasha umuturage akazaba ari we uzifatira inyungu.”

Gitifu yashoje asaba abaturage kugana iki ikigo bakirinda abamamyi baza bababeshya maze bakirira amafaranga yakabaye afatwa na ba nyir’imyaka.
Ikigo EAX gikorana n’amakoperative ahinga ibishyimbo, ibigori, soya, ingano, n’amasaka bakayitunganya, bakayihunika mu buryo bwa kijyambere hagamijwe kugabanya kwangirika kw’umusaruro, bakazayibagurishiriza igihe izaba yarageze ku giciro cyiza kandi atari mu Rwanda gusa ahubwo no mu karere.

Iyo umuntu, cyangwa Koperative imaze kubika imyaka mu buhunikiro bwa EAX ihabwa inyemezabubiko igaragaza ko yabitse imyaka muri icyo kigo, iyo ikaba ikozwe mu buryo bw’ikoranabuhanga. Ibi bimufasha kuba yanabona n’inguzanyo muri banki atiriwe atanga indi ngwate kuko iki kigo kivugana na Banki ya myaka yahunitswe akaba ari yo iba ingwate.

Abakozi ba EAX mu gikorwa cy'umuganda i Rwamagana
Nyuma y'umuganda abakozi b'iki kigo bagiranye ibiganiro n'abaturage
Abaturage na bo bari bitabiriye umuganda ari benshi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved