Ikigo Land O’Lakes kigiye guhugura abahinzi n’aborozi ku micungire y’amakoperative

Yanditswe na Habimana James
Kuya 18 Gicurasi 2019 saa 01:23
Yasuwe :
0 0

Ikigo cy’Abanyamerika Land O’Lakes, cyatangije ku mugaragaro umushinga, Cooperative Development Activity 4 (CD4), uteza imbere amakoperative ukazamara imyaka itanu, ufasha abahinzi n’aborozi bo mu turere twa Bugesera, Rwamagana na Gicumbi.

Ni umushinga iki kigo kizaterwamo inkunga n’Ikigega cy’Abanyamerika gishinzwe iterambere mpuzamahanga (USAID). Abahinzi n’aborozi bazagenerwa amahugurwa arimo kwicungira amakoperative agahatana mu Rwanda no ku isoko mpuzamahanga.

Ubwo hatangizwaga uyu mushinga, Umuyobozi wa Land O’Lakes mu Rwanda Nyirigira Willy, yavuze ko uyu ari umushinga uharanira iterambere ry’amakoperative ukaba waratangiye mu mpera za 2018 ukazarangira mu 2023.

Yavuze ko bazakorana n’amakoperative y’abahinzi b’ibigori mu karere ka Rwamagana, abahinzi b’imboga mu karere ka Bugesera n’aborozi b’inka zitanga umukamo mu karere ka Gicumbi.

Nyigira yagaragaje ko Land O’Lakes ubwayo ari koperative ikomoka muri Leta Zunze Ubumwe za Amerika ariko ikaba ifite ubunararibonye mu gukora ibikomoka ku mata n’ibyo kurya by’amatungo.

Yavuze ko uyu mushinga uri mu Rwanda kuva mu 2007, aho bamaze gukora imishinga itandukanye irimo uwo bakoze mu bworozi bakorana n’amakusanyirizo yo mu Burasirazuba mu turere twa Nyagatare na Gatsibo.

Muri uyu mushinga mushya, Nyirigira yavuze ko Land O’Lakes n’abandi babonye ko mu iterambere ry’ubuhinzi n’ubworozi umubare munini w’amakoperative leta yayahaye ibikoresho, yubaka amakusanyrizo y’amata n’ibindi, ariko ibyo byose bidashobora kubagirira akamaro cyane mu gihe baba badafite imicungire myiza.

Yagize ati “Muri iyi gahunda y’imyaka itanu tuzakora cyane mu kubaka ubumenyi bw’abayobozi ba za koperative mu bijyanye no kuzicunga, kuziyobora, gucunga imari ya koperative, gucunga umutungo, guhangana ku isoko, gushaka amasoko, gukorana n’ibigo by’imari n’ibindi.”

Yavuze ko bazasuzuma imikorere n’ubumenyi bwa koperative, barebe imiyoborere ya koperative, imicungire myiza, ibikorwa bya koperative, guhangana ku isoko, ibi byose bikazafasha amakoperative kuba intangarugero mu byo bakora.

Yagaragaje ko bazajya baganira na koperative bababwire ibibazo bafite, noneho ibyo bazajya bahabwa nibyo bizajya bitanga ishusho nabo bahereho bamenya ubufasha bari butange kuri izo koperative.

Yakomeje agira ati “Mu myaka itanu iri imbere iryo suzuma mikorere ntabwo rizaba rimwe ahubwo rizajya riba buri mwaka. Turabanza tukamenya aho koperative ikeneye ubwo bufasha nyuma y’umwaka tukongera tukagaruka tukabakorera isuzuma ku buryo iyo shusho ariyo dushingiraho tuvuga ngo ya koperative yavuye aha igeze aha, iyi ikwiye gucuka reka dufate iyi.”

Muri utu turere bazakorana n’ihuriro rya koperative ariko banakorane n’amakoperative.

Hakizimana Pierre Célestin, Perezida wa koperative IAKIB ihuza aborozi ba kijyambere mu karere ka Gicumbi, yavuze ko biteze amahugurwa meza mu gihe cy’imyaka itanu iri imbere ku buryo bazavanamo umusaruro mwinshi.

Yatangaje ko bifuza ko koperative yabo itera imbere ikava kuri koperative ikagera ku kigo, ariko imicungire y’ikigo bakaba batayizi, bityo uyu mushinga wa Land O’Lakes ukaba uzabafasha mu micungire no kumenya imigabane umuntu ashobora gushoramo.

Yagize ati “Na mbere twakoranye n’iki kigo kidufasha mu buziranenge bw’amata, ubu amata bayazana ameze neza kandi batwigishije kuyanywa kuko mbere wasangaga abantu bagemura ariko nyuma bakajya nkunywa ibigage.”

Umuyobozi Mukuru w’Urwego rw’Igihugu Rushinzwe Guteza Imbere Amakoperative Prof. Harelimana Jean Bosco, yagize ati “Twiteze ko iyi gahunda ya Land O’Lakes izatuma amakoperative arushaho gucungwa neza kandi ibi bizatuma umusaruro wiyongera, iyi gahunda nshya izamara imyaka itanu izakora neza kandi mwabonye urugero rw’aborozi bo mu karere ka Gicumbi bakora neza, turashaka ko koperative ziba umusemburo w’ubukungu.”

Yavuze ko abenshi mu makoperative wasangaga badafite ibikoresho ndetse nta mahugurwa ahagije bamwe babonye bagitangira.

Iyi gahunda y’imyaka itanu izarangira amakoperative 220 yungutse ubumenyi buzayafasha gukomeza kuba meza mu byo akora.

RCA yavuze ko mu Rwanda hari amakoperative arenga ibihumbi icyenda n’abanyamuryango barenga miliyoni eshanu.

Umuyobozi Mukuru w’Urwego rw’Igihugu Rushinzwe Guteza Imbere Amakoperative Prof. Harelimana Jean Bosco, avuga ko bizafasha amakoperative guhangana ku masoko
Umuyobozi wa Land O’Lakes mu Rwanda Nyirigira Willy, yavuze ko uyu ari umushinga uharanira iterambere ry’amakoperative
Ikigo Land O’Lakes kigiye guhugura abahinzi n’aborozi mu myaka itanu ku micungire y’amakoperative

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza