Ikorosi mu mikorere y’amaradiyo mu Rwanda: Amikoro aratuma zipfunyikira amazi abazikurikira

Yanditswe na Mukaneza M.Ange
Kuya 14 Gashyantare 2017 saa 08:59
Yasuwe :
0 0

Radiyo ni kimwe mu bikoresho bisakaza amakuru bikurikirwa na benshi ku Isi. Ku bakora ingendo ndende zisaba gutega imodoka barabizi, si bishya kumara igihe kinini shoferi ahindura urushinge aho ashyize hose asanga hatambuka ibiganiro ahanini by’imikino n’imyidagaduro.

Uretse mu rugo cyangwa mu modoka; radiyo isigaye igendanwa kubera ikoranabuhanga ry’ikoreshwa rya telefone. Ikigaragara ni uko buri munsi abaturage bakomeza kumva ibiganiro bisa ku maradiyo byiganjemo ibitabungura ubumenyi mu mibereho ya buri munsi ijyanye n’ibyo bakora.

Iki ni kimwe mu bibazo itariki ya 13 Gashyantare 2017 yizihizwaho umunsi mpuzamahanga wa radiyo yasanze mu Rwanda. Uyu munsi wizihijwe ku nshuro ya gatandatu kuva washyirwaho n’Ishami ry’Umuryango w’Abibumbye ryita ku Burezi, Ubumenyi n’Umuco (UNESCO) mu Ugushyingo 2011.

Ku nshuro ya mbere mu Rwanda,mu kiganiro nyunguranabitekerezo cyahuje abayobozi ba radiyo za leta, izigenga, iz’abaturage, abanyamakuru n’abandi bose bafite aho bahuriye n’itangazamakuru; hibanzwe ku kijyanye no kuba ibiganiro bica kuri radiyo usanga byose bisa, bigategurwa nta gutekerezwa ku muturage.

Umuyobozi wa Radio Rwanda, Havugimana Aldo, yagaragaje ko bigoye kumva ibiganiro by’ubuzima, ubukungu, imibereho myiza y’abaturage kuri radiyo zitandukanye ko ahubwo usanga bibanda ku mikino n’indirimbo kandi byose biri mu mujyo umwe.

Umuyobozi wa Radio Ishingiro ikorera mu Karere ka Gicumbi, Ildephonse Sinabubariraga, we yavuze ko kugira ibiganiro bimwe kandi ahanini bidashingiye ku byo abaturage bakeneye bituruka ku mikoro make ya za radiyo.

Ati “Kugira ngo Radiyo zikore zisabwa kugira amafaranga, iyo utabonye amafaranga ntujya mu baturage ngo ukore ikiganiro. Wa wundi ducuruzaho arakubwira ati ndashaka siporo, imyidagaduro, nta kubwira ko ashaka ikiganiro cy’ubuzima cyangwa ubuhinzi.”

Radiyo ni bumwe mu buryo bukomeye mu Rwanda bwifashishwa mu kumenya amakuru. Igipimo cy’uburyo itangazamakuru rihagaze mu 2016 (Rwanda Media Barometer, RMB 2016) cyakozwe n’Urwego rw’Igihugu rw’Imiyoborere (RGB) kigaragaza ko 80.2% by’ingo zifite umuntu umwe mu muryango utunze radiyo mu gihe 75.2% zirimo umuntu umwe utunze telefoni ngendanwa irimo radiyo.

Bamwe mu banyamakuru baganiriye na IGIHE bo bagaragaje ko ikibazo cy’ibiganiro bidafite umwihariko kidaturuka ku bushobozi ahubwo ahanini biterwa no kuba hari abashinga radiyo batarabanje kwiga neza ku biganiro bazajya batambutsa, n’abumva ko bagomba guhita batangira kunguka batarashoye.

Radiyo nyinshi zirwanira ku isoko rito

Ku bijyanye n’amikoro, radiyo zose usanga zihanze amaso isoko ryo kwamamaza ridapfa kubona uwo ariwe wese ahanini biturutse ku mubare muto w’abamamaza ibikorwa byabo.

Ibi bituma amikoro agabanuka ndetse bamwe bagafata umwanzuro wo gufunga imiryango, aha twanga urugero rwa KFM yafunzwe mu 2016 kubera amikoro atari yifashe neza hagendewe kubyo yinjiza n’ibyo isohora.

Urwo ruhurirane rw’ibibazo abasesengura babona arirwo rugira ingaruka ku mibereho y’abanyamakuru bamwe badahemberwa igihe, abandi bagahembwa intica ntikize.

Igipimo cy’uburyo itangazamakuru rihagaze mu 2016 cyerekanye ko 67.4% by’abanyamakuru bo mu Rwanda aribo bemera ko bakorera ahantu hatari ikibazo cy’amikoro.

Ku kijyanye no kubona amikoro kugira ngo radiyo zibashe gukora ibiganiro koko bifitiye akamaro abaturage, Salim Mwamboni waturutse muri Kenya yavuze ko iwabo radiyo z’abaturage zishyiraho uburyo bwo kubona amafaranga zikeneye binyuze mu gutegura ibikorwa byishyura nko kwishyuza abaje mu ngendoshuri n’ibindi.

Umuyobozi w’Inama Nkuru y’Itangazamakuru (MHC), Peacemaker Mbungiramihigo, yavuze ko kugira ngo radiyo zibashe gutegura ibiganiro bibereye abaturage hakwiye kubanza kumva ko ibyo bakora aribo bigenewe.

Mbungiramihigo yavuze ko abafite ibitangazamakuru bakwiye gutekereza ku kijyanye no kwishyira hamwe kugira ngo isoko rito riri mu Rwanda babashe kurisaranganya.

Amateka ya Radiyo mu Rwanda

Nubwo amateka atavugwaho rumwe ku bijyanye n’igihe radiyo ya mbere yatangiye kuvugira mu Rwanda, bamwe bavuga ko ari mu 1961 abandi mu 1963, ikidashidikanywaho ni uko kugeza mu myaka ya 2000 hariho radiyo imwe rukumbi ariyo Radiyo Rwanda.

Uko igihugu cyagendaga kiyubaka itangazamakuru ntiryasigaye inyuma maze mu 2004 radiyo zigenga zabimburiwe na Radio 10 yakurikiwe n’izindi nyinshi zirimo Flash FM, Contact FM…

Imibare itangwa na MHC igaragaza ko mu Rwanda habarurwa radiyo 34; Televiziyo icyenda, ibinyamakuru byandika ku mpapuro bibarirwa muri 50 n’ibikorera kuri internet birenga 100.

Uko Radio zumvikana mu bice by’igihugu, RBA niyo ibasha kugera kure


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza