Imbeba n’injangwe mu kiganiro na Habyarimana, ubucuruzi bw’ingunguru…Rucagu yavuze byinshi

Yanditswe na Philbert Girinema
Kuya 3 Kamena 2019 saa 11:39
Yasuwe :
0 0

Rucagu Boniface, ni ikimenyabose mu ruhando rwa politiki y’u Rwanda. Amateka ye ni maremare kuko yabaye umuyobozi muri repubulika za mbere ya Jenoside na nyuma yayo akomeza kugirirwa icyizere na Leta y’ubumwe bw’abanyarwanda, ayobora mu nzego zitandukanye, ubu akaba ari mu Nama Ngishwanama y’Inararibonye.

Rucagu yavukiye mu yahoze ari Chefferie ya Kibare (Burera y’ubu), ku wa 1 Ukuboza 1946, yinjiye muri politiki mu 1959 afite imyaka 13. Yabaye umwarimu aza kugirwa umuyobozi w’amashuri nyuma aba umukozi wa perefegitura ya Kibungo.

Mbere gato y’ihirikwa ry’ubutegetsi bwa Kayibanda yabaye Sous-Perefe, muri Byumba, Ruhengeri, akomeza gukorana n’ubutegetsi bwa Habyarimana kugeza burundutse. FPR-Inkotanyi ifashe ubutegetsi Rucagu yagiriwe icyizere kuko mu 1997 yagizwe Perefe wa Ruhengeri, aza no kuyobora itorero ry’igihugu.

Uyu musaza w’imyaka 73, ntiyorohewe no kuyobora ku ngoma ya Habyarimana kuko yanyuze mu mitego myinshi y’abashakaga kumuteranya n’ubutegetsi kuko atahuzaga ibitekerezo nabo kandi agakundwa cyane n’abaturage ari nabo batumaga aba umuyobozi.

Mu kiganiro kirambuye na IGIHE, Rucagu yagarutse ku bihe bitandukanye byaranze ubuzima bwe muri politiki n’uburyo yahuye n’imitego myinshi ariko yose akayisohokamo gitwari.

IGIHE: Wabaye Perefe, uba Guverineri ndetse n’Umudepite. By’umwihariko wayoboye Amajyaruguru y’igihugu mu bihe byari bikomeye birimo nk’iby’Abacengenzi. Ni iki wakoresheje kugira ngo abaturage bumve gahunda za leta?

Rucagu: Ntabwo navuga ngo hari iby’umwihariko nitwaje. Mbere na mbere nitwaje urukundo, gukunda abo nayoboraga. Abakirisitu Gatolika bajya baririmba ngo Yezu si agahato ahinduza, ni urukundo nya rukundo rubareshya.

Nagiye mfite amabwiriza ya leta y’ubumwe yanyohereje, yansabaga kwegera abaturage, tugashobora guhindura imyumvire y’abaturage ikaba myiza bakamenya ko ubuyobozi bubi bwavuyeho, bwasimbuwe n’ubundi.

Icya gatatu, hari amategeko y’igihugu nagenderagaho. Birambabaza iyo bavuga ko ziriya ndangagaciro zanditse mu Majyaruguru ari iza Rucagu. Rucagu ntabwo nagiye kuyobora Intara y’Amajyaruguru ngo nyiyoboreshe ibitekerezo byanjye.

Ziriya nyandiko zibayo nazikuye muri Bibiliya nari narahawe, iyo bibiliya yari itegeko nshinga. Amahoro, ubworoherane, ubumwe n’ubwiyunge, kurandura ingengabitekerezo ya Jenoside byose byanditse mu itegeko nshinga.

Aho niho navanye ibyo nigisha abaturage kandi kugira ngo batazanabyibagirwa, nkanabyandika.

Iyo njyayo batankunda cyangwa batanshaka, ntacyo twari kugeraho. Bari no kuducika bose bakajya mu bucengezi ariko bararebaga bakavuga bati ko leta idufashe neza turajya mu biki.

Rucagu Boniface yahishuye uburyo yagiranye ikiganiro na Habyarimana, akavuga ko umubano we na Minisitiri Nzirorera ari nk'uw'injangwe n'imbeba

IGIHE: Bijya bivugwa ko wigeze kujyana abaturage hafi y’umugezi, ukababwira ko ushaka kujya mu Bacengezi yakwambuka akagenda, utabyifuza agasigara hakurya yawo? Ni byo?

Rucagu: Byigeze kubaho! [Aseka] Ni mu mwaka wa 2001, abacengezi barateye, bagaba igitero gikomeye cyane. Abaturage ako karabacitse, bashaka kuyoboka abacengezi kandi nari narabatoje bihagije.

Mbonye bimeze bityo, nkoresha inama, koko amazi nayitwaje. Hari ibase n’akantu ko gusukisha ngo nkarabe, ndababwira nti narababwiye ariko ntimwanyumvise, kandi sinigeze mbayobora nabi, abacengezi bagarutse murabayoboka.

Mu 1994 abandi barahunze, ubutegetsi bumaze gutsindwa babasiga mwenyine, njye sinahunze nagumanye namwe kandi kuba naragumanye namwe hari icyo byabafashije, kuko bamwe baravugaga bati ubwo Rucagu ari muri iki gihugu natwe twagumamo kuko niwe wari umunyapolitiki.

Ndababwira nti, nagumanye namwe turwanya abacengezi turabatsinda ariko none mwongeye kubinjiramo. Nti mbamenyesheje ko niba mukomeje iyo nzira ndabasiga mwenyine.

Nti amaraso y’abana banyu, amaraso yanyu ubwanyu agiye kuzameneka kubera imyitwarire yanyu mibi, nyakarabiye imbere yanyu ntazambazwe, azababazwe. Ndakaraba koko ndangije mfata imodoka ndagenda, bahise bantumaho bati garuka tukurahire ko inzira twari twagiyemo tuyiretse.

IGIHE: Icyo gitekerezo wagikuye he?

Rucagu: [Aseka] Nari nibutse bya bindi bya Pilato. Nari nabuze ikindi nababwira, nsanga icyo aricyo cyonyine nababwira. Bagize ubwoba. Narababwiye nti mu biganza byanyu mubumbatiye amaraso yanyu n’ay’abana banyu, muragenda nabi, amaraso arameneka. Ni ko byagenze kandi n’ubu bagenda bigengesereye.

IGIHE: Bijya bivugwa ko wigeze kumara igihe kinini wihishe ucuruza ingunguru. Niko byagenze?

Rucagu: Ntabwo nihishaga, nari maze gukiranuka n’ibibazo bya politiki nahuye nabyo mu 1994. Icyo gihe sinatekerezaga gusaba akazi kuko nabonaga ntawe nzagasaba, natekereje rero kwihangira umurimo.

Namaze hafi nk’amezi atandatu, nshakisha ngenda nganira n’abantu kugeza igihe mbonye umuntu ungira inama yo gucuruza ingunguru ati kandi uzazicuruza nta gishoro utanze.

Ati wowe ujye ugenda mu nganda, ubaze niba bafite ingunguru, mwumvikane ku giciro ubundi uze mu Gakinjiro, ubabwire uti mfite ingunguru, ufite amafaranga naze mwereke aho azipakira. Niko byagendaga, ku ruganda bakayimpera nka bitanu, nagera mu Gakinjiro ushaka ingunguru kuri 6000 cyangwa 7000 nti naze ndazifite.

IGIHE: Wigeze kuvuga ko ibihe bikomeye wagize mu kazi ari igihe wari umudepite. Ni ukubera iki?

Rucagu: Icyo gihe nahuye n’amatiku arenze ukwemera. Nabaye umudepite manda ebyiri, imyaka icumi. Abantu benshi banyitaga ruharwa kubera ko muri icyo gihe cy’ubudepite nibwo nandagajwe cyane n’abayobozi twiyamamazaga hamwe kubera ko abaturage bankundaga bakampa amajwi menshi, arenze aya ba minisitiri bakarakara hanyuma bagashaka uko bansebya no kunteranya na rubanda. Nagiye ntorwa ku ngufu z’abaturage.

Icyo gihe Minisitiri yabanzaga kwiyamamaza, akaba umudepite, mu badepite Perezida akazakuramo ba minisitiri, ubaye Minisitiri agasimbuzwa uwari wagize amajwi make.

Byageze igihe agatsiko k’aba Parmehutu kamaze kubona […] mu 1993 nagotewe iwacu, Inkotanyi zari zatwugarije, zigenda zidusatira nemera gusiga byose nza n’amaguru n’abaturage nyuma nza kubona imodoka ingeza i Kigali.

Mpageze abanyamakuru ba CND nakoragamo, baje kumpa ikiganiro cyaje kunyura kuri Radiyo Rwanda, bambaza ngo uko mbona iyo ntambara, yarangizwa n’iki ?

Ibaze icyo kibazo, FPR iri kurwana na Leta y’u Rwanda. Narasubije nti [Imana yaramfashije] iyi ntambara icyayimara, ni uko leta yacu yakwemera kugabana ubutegetsi n’Inkotanyi nta yandi mananiza. Uratekereza iryo jambo icyo gihe ?

Imbere mu gihugu ntibyabashimishije, ariko aho Inkotanyi zari ziri, ndibuka ko nyuma abaturage b’iwacu nasubiyeyo bakampeka bati watumye tubana neza n’Inkotanyi, bati umaze kuvuga ririya jambo zaravuze ngo dushyikirane tubane neza, umutegetsi mwiza.

Ikindi uko kuvuga neza kwatumye Inkotanyi zinsubiza imwe mu modoka yanjye zari zaratwaye muri icyo gitero. Ziyinshubije igera muri Kigali induru ziravuga ngo muze murebe imodoka ivuye mu Nkotanyi, bati Rucagu ni icyitso akorana na zo.

Icyo gihe hari hategerejwe inzibacyuho yaguye kandi uwagombaga kuyijyamo, yagombaga kuba yemewe ku mpande zombi, Inkotanyi na leta y’u Rwanda. Abandwanyaga baravuga ngo ubwo Rucagu Inkotanyi zimusubije imodoka, nibamutanga nk’umukandida zizamwemera abe umudepite.

Bati reka tukwereke. Nibwo batekereje ikintu gishobora kunteranya n’Inkotanyi hamwe n’Abatutsi bo mu Rwanda. Basohora inyandiko ivuga ngo ‘Depite Rucagu yaratwandikiye’ yarimo ibitutsi. Washoboraga kuyibona ugafata wa Rucagu ukamushyira mu itanura rimaze amezi abiri.

Iyo nyandiko igisohoka nahise nandika itangazo rigenewe abasomyi ba Kangura bose kuko nicyo kinyamakuru ryari ryasohotsemo. Namagana iyo nyandiko, mvuga ko atari iyanjye, ko njye narezwe neza mfite uburere, ko nayoboye abantu bo mu mpande zombi, ko ndetse ntigeze ndangwa no kuvangura no kuronda akoko, ko n’uwayanditse nza kumurega.

Mbwira abana bacuruzaga ibinyamakuru nti aya matangazo muyashyire muri buri kinyamakuru muza kugurisha, uza kugura aze kuyijyanamo. Byatumye n’uwayanditse aza kunsaba imbabazi muri CND.

IGIHE : Yari inde ?

Rucagu : Yari Ngeze Hassan. Yageze ku nteko, abadepite barambwira ngo aranshaka. Nti sinshaka kubonana nawe, ati nimumubwire ko nje kumusaba imbabazi. Twicaye turi nk’abadepite batandatu, ndamubwira nti abanze yemere ko aza kuvuguruza inyandiko ye, ikibi cyasohotse mu nimero 46, asohore icyiza mu nimero 47, arabyemera.

Nagize Imana arivuguruza, ansaba imbabazi avuga ko yambeshyeye. Iyo ntareba kure ntabwo ubu tuba tuganira.

Rucagu yavuze ko mu bihe bikomeye u Rwanda rwanyuzemo harimo n'iby'amashyaka menshi kuko yaje ateranya

IGIHE: Nk’umuntu wabaye muri Leta zose, ubasha kuzigereranya ute?

Rucagu: Uvuze neza, hariho abavuga ngo wariye ingoma zose. Ntabwo ushobora kurya ingoma, iyo uyiriye amenyo irayakura. Ahubwo ingoma wakorana nazo, wazikorera. Kurya ingoma ni ukurya ruswa, ni ukurigisa umutungo w’igihugu ugenewe abaturage.

IGIHE: Tubwire nko kuri leta ya Kayibanda na Habyarimana

Rucagu: Leta ya Kayibanda nayikozemo kuva mu 1967, iya Habyarimana uretse ibyumweru bibiri kuko yo yasanze ndi Sous-Perefe. Iya Kayibanda, nabanje kuba umwarimu, nyuma mba umuyobozi w’amashuri nyuma mba umukozi wa perefegitura ya Kibungo maramo imyaka nk’ibiri.

Muri Werurwe 1972 nibwo nabaye Sous-Perefe, Habyarimana akora coup d’etat mu 1973 mu kwezi kwa karindwi. Urebye yasanze maze nk’imyaka ibiri ndi sous-perefe. Iya Habyarimana nakoranye nayo kugeza ndundukanye nayo.

Iyo uzigeraranyije, zombi ni zimwe kuko iya Kayibanda yari ishingiye ku mpinduramatwara [revolution] yo mu 1959, nibwo ubumwe bw’abanyarwanda bwasenyutse, bamwe barameneshwa barahunga. Byarakomeje kugeza mu 1973.

Habyarimana akuyeho Kayibanda, abantu bagira ngo ahari ibintu bigiye kuzuka kuko no mu magambo yakoresheje avanaho Kayibanda, yasaga n’uvuga ko azagarura ubumwe bw’abanyarwanda. Ariko abanyarwanda barategereje kugera mu 1990 FPR ifata icyemezo cyo guharanira uburenganzira ikoresheje intwaro.

Leta ya Habyarimana yari yubakiye kuri MRND. MRND nayo mu irangashingiro harimo ko nayo ishingira ku mpinduramatwara ya 1959. Ni abantu bahindutse ariko amahame yari amwe.

IGIHE: Wigeze wicarana na Habyarimana ngo muganire?

Rucagu: Kayibanda yarinze avaho ntaganiriye nawe ariko Habyarimana twaraganiriye. Yari yaje muri zone y’Ububeruka ahitwa muri Cyeru yagiye mu muganda.

Arangije ahamagara abayobozi bari aho, tuganirira aho ngaho ariko urumva byari ibiganiro bigaruka ku muganda.

IGIHE: Ni iyo nshuro imwe gusa?

Rucagu : Twigeze kuganira na none amashyaka atangiye. Kuko nari naragize ibibazo muri Perefegitura ya Ruhengeri by’amatora, ba minisitiri badashaka ko ntorwa ariko ndatorwa ku mbaraga z’abaturage; amashyaka aje abantu baramubwiye bati nudahamagara Rucagu, araducika, arajya mu yandi mashyaka.

Noneho aza kuntumaho twicarana mu biro bye, ati uziko amashyaka agiye kuvuka, ati none se uremera kuzamfasha muri Perefegitura ya Ruhengeri, nti ndabyemeye Nyakubahwa. Nti ariko ndagira ngo ngire n’icyo mbasaba, kugira ngo nzabashe kubakorera neza ni uko muzanyunga na Minisitiri Nzirorera, nti kuko kuva mu matora ya 1988 twangana urunuka tumeze nk’imbeba n’injangwe.

Ati ah bon, muri mwebwe ni nde mbeba ni nde njangwe ? Mbona ari ikibazo gikomeye ndavuga nti byombi ni njye kuko iyo nza kuvuga ko Nzirorera ari injangwe njye nkaba imbeba, urumva nari kuba ntukanye. Ntinya kuvuga iryo jambo ngo ntatuka Minisitiri ndavuga nti byombi ni njye. Ati nta kibazo nzabunga.

Mu gitondo ngiye kumva, numva anshyize muri komite nyobozi ya MRND y’agateganyo, yagombaga kumara amezi atandatu. Nategereje ko yanyunga na Minisitiri Nzirorera, ntibyigera bibaho.

Nyuma y’amezi atandatu bavuga ko bagiye gutora komite ya burundu. Twatorwaga ku rwego rw’igihugu, tuzatora nk’ejo, Nzirorera asohora ikinyamakuru cye cyitwaga Nyiramacibiri, basohora inyandiko ivuga ko Rucagu yambaye uruhu rw’intama kandi imbere ari ikirura.

Bati banya-Ruhengeri, muhaguruke mwese mutarangara mugatandukana Rucugu yabinjijemo abanyinginya, abanyiginya ni iki ? ni abatutsi. Inyuma bashushanya imbwa zivuga ngo aho ujya hose turakurya, amatora yo kujya muri komite ya MRND nyatsindwa gutyo.

Nyuma naje kuvuga nti bangiriye neza, iyo nza kuba naragiye muri komite nyobozi, ntabwo tuba turi kuvugana.

IGIHE : Ubundi Nzirorera mwapfaga iki ?

Rucagu : Amajwi n’amashyi. Bajyaga kutwamamaza, bavuga izina ryanjye, abaturage bagakoma amashyi ntibarangize, ibyo bikamurakaza.

IGIHE : Abaturage bagukundiraga iki ?

Rucagu : Biragoye ntabwo nigeze mbaza. Numvaga bamwe bavuga bati Rucagu abanira bose

Ababyeyi be bamwise Rucamucyago, abanyeshuri bararihina riba Rucagu

IGIHE: Ubundi izina Rucagu bisobanura iki ?

Rucagu: Iri zina ni iriningurano, navutse data yarabyaye abandi bana, bakagenda bapfa, nyuma y’aho ndavuka, baravuga bati urupfu ntirugira imbabazi wabona ruje kunyura muri ibi byago n’uyu rukamutwara, banyita Rucamucyaho.

‘Ru’ ni urupfu, ‘ruca’ ni ukunyura mu cyago. Ngiye mu ishuri abarimu baravuga ngo iri zina ni rirerire bati turabihindura turavuga Rucago, abanyeshuri bati reka da iyo ‘o’ ni ukugobeka bati ni Rucagu nibyo byihuse, bifata gutyo. Ntabwo ariryo data yanyise.

IGIHE: Ubuzima bwari bumeze bute mu gihe cy’amashyaka menshi?

Rucagu: Mu by’ukuri niba hari ibihe bibi byabayeho by’uru Rwanda, ni ibihe by’amashyaka. Amashyaka yaje ateranya umwana na nyina, ateranya umwana na Se, ateranya umuvandimwe n’uwo bava inda imwe, ateranya umugabo n’umugore.

Amashyaka yaje aje gukora ishyano koko reka akurikirwe na Jenoside yakorewe Abatutsi.

Niba ari uko bari bamaze igihe kinini batajya mu mashyaka, nta wumvaga ko mugenzi we agiye mu rindi shyaka bakomeza ubuvandimwe, ako kanya babaga baciye ukubiri, ugasanga rimwe na rimwe umugore yagiye mu ishyaka umugabo atagiyemo bikaba ikibazo.

Ugasanga umwana agiye mu ishyaka Se atagiyemo bikaba ikibazo, ugasanga umuvandimwe agiye mu ishyaka undi muvandimwe we atagiyemo bikabyara ikibazo.

Byabaye ikibazo gikomeye, n’ibi wumva gusubiranamo, gusenyerana no kwica, ni nacyo gituma burya mu matora, amashyaka burya batayashakaga. Ni uko bari bazi ahabi yabagejeje. Amashyaka yabaye mabi.

IGIHE: Ni iki cyakubayeho mu buzima kikagushimisha kurusha ibindi?

Rucagu: Icya mbere ni ukwizerwa n’abaturage. Icya kabiri gikomeye cyane ni uko mu 1994 nafashwe ngafungwa nk’umunyapolitiki, nkaza gufungurwa ndi umwere. Nkaba mboneyeho gushimira FPR Inkotanyi, Leta y’Ubumwe bw’Abanyarwanda.

Icya gatatu, ni icyizere gikomeye Leta y’Ubumwe bw’abanyarwanda yangiriye ikanshinga kuyobora Perefegitura ya Ruhengeri ntari mbitegereje. Nari nibereye mu Gakinjiro mu ngunguru zanjye.

Ikindi ni uko Perefegitura zose 11 zivuyeho hagasigara enye, zikitwa Province (Intara), Leta y’Ubumwe bw’Abanyarwanda iyobowe na Paul Kagame yangiriye icyizere nkaba Guverineri wa mbere w’Intara y’Amajyaruguru.

Ikindi ni icyizere yangiriye kugira ngo mbe Umutoza wa mbere w’Intore z’u Rwanda. Ni ibintu bikomeye cyane. Ikindi rero, ni uko yongeye kungirira icyizere nkaba umwe mu nararibonye 10 z’u Rwanda. Urumva atari ibintu bikomeye cyane? Ni ibintu urubyiruko rukwiye kugenderaho. Ni isomo rikomeye cyane.

Ni nayo mpamvu ngira ngo nkubwire imodoka yanjye ngenderamo [V8] uko nayise. Yitwa ‘Mpatswe n’umugabo’

IGIHE: Ugendeye ku rugendo rwawe nk’umunyapolitiki n’indi mirimo wakoze, ni iki wumva urubyiruko rukwiye kwitwararika

Rucagu: Urubyiruko rukwiye kugendera ku muco w’indangagaciro, umuco wa kirazira. Mu magambo macye, rukwiye kugira umuco wo gukunda icyiza aho kiva hose, rukagira umuco wo kwanga ikibi.

IGIHE: Bibayeho ko umuntu asubiza ibihe inyuma, hari ikintu muvuga muti ‘uwampa amahirwe nagikosora?

Rucagu: Iyo nsubije amaso inyuma nsanga naragerageje kwitwararika mu buzima kuko nta muturage uzavuga ko namuhohoteye, ntawe uzavuga ko namwiraseho, ntawe uzavuga ko yasanze mfungura ntidusangire. Iby’ivanguramoko sinigeze mbikora.

Ndamutse nsubiye kuba umusore, nagendera mu kinyabupfura nagendeyemo wenda nkarushaho kwagura amarembo ariko ntacyo mbona nakosora mu byo naba narakosheje.

IGIHE: Ni uwuhe murage wumva wazasiga kuri iyi Si ?

Rucagu: Ntabwo nabayeho ku giti cyanjye, nabayeho ku bw’igihugu. Umurage rero nagiye nywutanga ku byo nagiye nkora byose ari mu Majyaruguru umurage urahari, ubworoherane, ubumwe n’ubwiyunge, amashyi ngo kaci kaci, ingengabitekerezo ya Jenoside tuyirandurane n’imizi yayo yose.

Ibyo si mu Majyaruguru gusa, ni amahame ari mu gihugu hose. Aho wagera ukababwita uti ‘Tugire amahoro, babivuga, Turandure ingengabitekerezo ya Jenoside, babivuga.

Uwo ni umurage, si isambu, si inka, si amafaranga ariko ibyo nibyo bibyara amafaranga, inka, umutungo kuko ugomba kugira ibyo kugira ngo ugere ku bindi. Ukwiye kuba umurage wanjye n’uw’igihugu cyane cyane ko nabikuye mu Itegeko Nshinga.

Igihe nabayemo cyose ndi Intore nkuru, inyigisho zose nagiye ntanga zabaga zirimo impanuro zigaruka kuri ayo magambo kuko iyo abaturage bose bamaze kubyubahiriza, ubajyana mu iterambere bakarikora neza, bagasarura neza, ibyo basaruye bakabisangira mu mahoro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza