Imbuto Foundation yahanuye urubyiruko ku kugira ikinyabupfura n’umuco w’ubukorerabushake

Yanditswe na Prudence Kwizera
Kuya 3 Ukuboza 2019 saa 08:50
Yasuwe :
0 0

Ubuyobozi bwa Imbuto Foundation bwatangiye gahunda ngarukamwaka y’ihuriro ry’abana bafashwa kwiga n’uwo muryango bibutswa ko bakwiye kurangwa n’ikinyabupfura birinda ingeso mbi zirimo ibiyobyabwenge n’ubunebwe.

Iryo huriro ry’iminsi ibiri riri kuba ku nshuro ya 12 ryatangirijwe mu Karere ka Ruhango muri Ecole de Sciences de Byimana kuri uyu wa Mbere.

Ingingo ziri kwibandwaho mu biganiro bari guhabwa harimo kugira ikinyabupfura muri byose; ubukorerabushake, kurwanya ibiyobyabwenge no gusobanukirwa ubuzima bw’imyororokere.

Umuyobozi Mukuru wungirije wa Imbuto Foundation, Umutesi Gérardine, yabwiye abagera kuri 495 baryitabiriye ko impamvu nyamukuru bita ku burezi bw’abana ari uko bashaka ko u Rwanda rugira ejo hazaza heza.

Ati “Impamvu Umuryango Imbuto Foundation wita ku burezi bw’abana ni uko twemera ko igihugu icyo ari cyo cyose gishingira ku bantu; ubukungu bw’u Rwanda ni abantu.”

Yasobanuye ko uyu muryango ugendera ku gitekerezo Madame Jeannette Kagame yatanze ubwo washingwaga mu 2001.

Ati “Yavuze ko iyo akabuto gatewe mu gitaka giteguwe neza kakuhirwa, kagahabwa iby’ingenzi byose gakura kakavamo igiti cy’inganzamarumbo kimwe kitanyeganyezwa n’icyo ari cyo cyose kandi umuntu abona aho ari hose. Ngiyo gahunda itugenga inatuma natwe dukomeza kubitaho.”

Ikiganiro cya mbere cyatanzwe kibanze ku kinyabupfura aho abanyeshuri bibukijwe ko nta kintu umuntu yageraho adafite ikinyabupfura.

Umwe mu batanze ikiganiro, Lt Karama Jackson, ubarizwa mu mutwe w’Ingabo z’Igihugu zirwanira mu kirere, yababwiye ko aho ageze abikesha kugira ikinyabupfura.

Ati “Abantu badakurikira ngo bagire imyitwarire myiza ntabwo bagera ku cyo bashaka, bavuna ababayobora. Ikinyabupfura ni rwo rufunguzo rwo kugera ku ntsinzi.”

Ikiganiro cya kabiri cyagarutse ku bukorerabushake cyatanzwe n’Umuhuzabikorwa w’urubyiruko rw’abakorerabushake ku rwego rw’igihugu, Murenzi Abdallah, ari kumwe na Niringiyimana Emmanuel wahanze umuhanda mu Karere ka Karongi.

Niringiyimana yagarutse ku cyamuteye kwibwiriza gukora umuhanda adategereje inyungu asobanura ko yifuzaga gutanga umusanzu mu iterambere ry’iguhugu cye.

Yagize ati “Icyanteye gukora uriya muhanda ni uko abarwayi bawunyuzwagamo bahagera bikabagora kubera ibihuru byari bihari n’inzira imeze nabi. Hari umurwayi bahanyujije bamuhetse bikubita hasi numva ngomba gukora umuhanda bazajya banyuramo.”

Umuhuzabikorwa w’urubyiruko rw’abakorerabushake ku rwego rw’igihugu, Murenzi Abdallah, yabwiye abanyeshuri ko icyo bakwiye kwigira kuri Niringiyimana ari uko gukorera igihugu bidasaba kuba utunze byinshi.

Ati “Kwitanga no gukorera igihugu ntabwo bisaba kuba ufite ibintu byinshi; bisaba umutima mwiza kurenza ibindi byose umuntu yatekereza.”

Bamwe mu banyeshuri bakurikiye ibyo biganiro babwiye IGIHE ko bungutse byinshi birimo kugira ikinyabupfura no gukorera igihugu cyabo badategereje ishimwe.

Uwishema Céline wo mu Karere ka Bugesera ati “Nahigiye ko kugira ikinyabupfura ari byo bizamfasha kugera ku kintu cyose nshaka kugeraho. Ndifuza kuzaba rwiyemezamirimo nkaha abantu akazi kandi nizeye ko nzabigeraho.”

Bintunimana wo mu Karere ka Kirehe we yavuze ko nyuma yo kumva uburyo Niringiyimana yakoze umuhanda abyibwirije na we yumva agomba gushaka ikintu azakorera igihugu.

Ati “Niringiyimana yampaye urugero rwiza ku buryo nanjye numva ngomba kuzashaka igikorwa cyiza nkorera igihugu cyanjye nanjye ngatanga umusanzu mu iterambere.”

Umuyobozi Mukuru wungirije wa Imbuto Foundation, Umutesi Gérardine, yavuze ko ibindi biganiro biteganyijwe gutangwa birimo ikigaruka ku gukumira no kurwanya ibiyobyabwenge ndetse n’ikijyanye n’ubuzima bw’imyororokere.

Umutesi yasobanuye ko ibiyobyabwenge ari kimwe mu byorezo byica ejo hazaza h’urubyiruko bityo rukwiye kwigishwa uko rwabyirinda hakiri kare.

Yavuze ko ubuzima bw’imyororokere budakwiye kumvikana gusa nk’imikurire n’imiterere y’umubiri ahubwo ko hakwiye kwiyongeraho n’imitekerereze.

Ati “Imitekerereze ishobora kuza bitewe n’uko ugeze mu gihe cy’ubwangavu cyangwa ubugimbi wayitwaramo ute, wabyifatamo ute, ese igihe ugize ikibazo wabigenza ute?”

Yavuze ko bazagaruka no ko ku kibazo cy’abana bafatwa ku ngufu ndetse n’abangavu baterwa inda imburagihe.

Kugeza ubu Imbuto Foundation ifasha abanyeshuri biga mu bigo by’amashuri yisumbuye bigera ku 102 mu gihugu.

Kuva muri 2003 Imbuto Foundation yatangiza gahunda yo gufasha abana biga mu mashuri yisumbuye baturuka mu miryango itishoboye aho imaze gufasha abarenga ibihumbi umunani.

Abanyeshuri b’abagenerwabikorwa b’iyo gahunda bahabwa amadolari y’Amerika 300 ku mwaka abafasha mu mibereho, ubwishingizi bw’ubuzima n’ibijyanye no kwiga.

Usibye iki gikorwa cyo kwita ku burezi bw’abana b’u Rwanda, Imbuto Foundation isanzwe ikora n’ibindi bikorwa birimo kurwanya Sida na Malaria.

Bamwe mu banyeshuri berekeza aho ibiganiro byabereye
Abanyeshuri bagaragaje ibyiza byinshi bungukiye mu biganiro byatanzwe
Buri wese wafashe ijambo yagarutse ku cyo yungukiye mu biganiro byatanzwe kuri uyu wa Mbere
Iryo huriro ry'iminsi ibiri riri kuba ku nshuro ya 12 ryatangirijwe mu Karere ka Ruhango muri Ecole des Sciences de Byimana kuri uyu wa Mbere
Kuri iyi nshuro iryo huriro ryitabiriwe n'abagera kuri 495 baturutse mu Ntara zose z'igihugu
Lt Karama Jackson yasabye abanyeshuri kurangwa n'ikinyabupfura nk'urufunguzo ruzabageza ku byo bifuza
Lt Karama Jackson ubarizwa mu mutwe w'Ingabo z'Igihugu zirwanira mu kirere yababwiye ko aho ageze abikesha kugira ikinyabupfura
Niringiyimana Emmanuel yasangije abanyeshuri bafashwa na Imbuto Foundation uko yakoze umuhanda abyibwirije
Niringiyimana Emmanuel yashimwe n'abanyeshuri bumvise ubuhamya bwe bavuga ko ababereye urugero rwiza
Nyuma y ikiganiro bamwe mu banyeshuri bahawe umwanya wo gutanga ibitekerezo no kubaza ibibazo
Umuhuzabikorwa w'Urubyiruko rw'abakorerabushake ku rwego rw'igihugu, Murenzi Abdallah, yavuze ko gukorera igihugu bidasaba kuba ufite ibintu byinshi ahubwo bisaba umutima mwiza
Umuyobozi Mukuru wungirije wa Imbuto Foundation, Umutesi Geraldine, aha impanuro uru rubyiruko
Umuyobozi w'Akarere ka Ruhango, Habarurema Valens, mu gutangiza iryo huriro
Nyuma y'ibiganiro hafashwe ifoto y'urwibutso

Amafoto: Niyonzima Moise

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza