Kwamamaza

Imbuto Foundation yahawe inkunga ya $30 000 yo kwishyurira amashuri abana b’abahanga

Yanditswe kuya 17-11-2016 saa 14:17' na IGIHE


Umuryango Imbuto Foundation wasinye amasezerano y’ubufatanye n’Ikigo IHS Rwanda Ltd, arimo inkunga ya $30 000, ni ukuvuga agera kuri miliyoni 24 Frw icyo kigo cyahaye Imbuto Foundation, azakoreshwa mu kwishyurira amashuri abana 100 b’abahanga ariko bakomoka mu miryango itishoboye.

Ni ubufasha buzatangwa binyuze muri gahunda ya ‘Edified Generation’ ifasha abana b’abahanga bananirwaga gukomeza amashuri yisumbuye kubera kubura ubushobozi.

Iyi nkunga irakurikira indi ya $15 000 yo muri gahunda y’ubujyanama, aho bamwe mu bakozi ba IHS Rwanda biyemeje kuba abafatanyabikorwa bashya ba Imbuto Foundation, bakagira urubyiruko babera abajyanama n’ibyitegererezo.

Muri ayo masezerano y’ubufatanye yashyizweho umukono kuwa 27 Ukwakira 2016 ku cyicaro cya IHS Rwanda, iyi nkunga yatanzwe n’Umuyobozi wayo, Frederic Sohier, yakirwa n’Umuyobozi Mukuru w’agateganyo wa Imbuto Foundation, Sandrine Umutoni.

Imbuto Foundation yatangaje ko “Gahunda za HIS Rwanda mu kwita ku mibereho y’abaturage zishimangira uburyo ikoramo ubucuruzi, kandi gahunda zayo zigamije guteza imbere abaturage binyuze mu kwita ku byo bakeneye, uburezi no kubongerera ubushobozi, amahame agenga ubucuruzi, ingufu n’ibidukikije.”

IHS Rwanda yatangiye mu 2013, uyu munsi ikaba igenzura iminara 770 y’itumanaho mu Rwanda n’abakozi b’Abanyarwanda bagera ku 1500, ikaba yita ku kuzamura imibereho y’abaturage, uburezi n’imishinga inyuranye y’iterambere.

Imbuto Foundation yatangijwe na Madamu Jeannette Kagame mu 2001, igamije kuzamura imiryango itishoboye binyuze mu guteza imbere uburezi, ubuzima na gahunda zigamije imibereho myiza n’iterambere.

Nyuma y’imyaka ibiri ishinzwe, Imbuto Foundation nibwo yatangije iyi gahunda yo gushyigikira uburezi bw’abatishoboye, aho buri mwana ahabwa amadolari $300 ku mwaka, yo kubafasha mu mibereho, kwishyura ubwisungane mu kwivuza n’ibikoresho nkenerwa byo ku ishuri.

Buri mwaka kandi abafashwa muri iyi gahunda bahurizwa hamwe mu biruhuko, bagahugurwa kuri gahunda zirimo kwihangira imirimo, kuvugira mu ruhame no kwitoza kuba abayobozi.

Kuva yatangizwa imaze gufasha abahungu n’abakobwa basaga 6000 gukomeza amasomo yabo, ndetse buri mwaka ikaba yiha intego yo gufasha nibura abanyeshuri 1000 muri uyu mushinga.

Abari bahagarariye IHS Rwanda na Imbuto Foundation mu isinywa ry’aya masezerano

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved