Kwamamaza

Imbuto Foundation yasinyanye amasezerano y’ubufatanye n’Umuryango w’Umwami Mohammed VI

Yanditswe kuya 22-10-2016 saa 07:30' na Cyprien Niyomwungeri


Umuryango Imbuto Foundation n’Umuryango w’Umwami Mohammed VI wa Maroc ugamije iterambere rirambye, yasinye amasezerano y’ubufatanye mu iterambere ry’inzego z’ ubuzima uburezi, ubukungu n’iterambere ry’urubyiruko n’abagore.

Uyu muhango wabaye ku gicamunsi cyo kuri uyu wa Gatanu tariki 21 Ukwakira 2016 muri Hoteli Marriot, wanitabiriwe na Perezida Kagame, Nyakubahwa Madamu Jeannette Kagame washinze Umuryango Imbuto Foundation akaba ari n’Umuyobozi w’ikirenga wawo, n’Umwami Mohammed VI. Abandi bitabiriye uyu muhango barimo abayobozi mu nzego zitandukanye z’igihugu, abanyamuryango n’abafatanyabikorwa ba Imbuto Foundation.

Aya masezerano akubiyemo inkunga ya miliyoni imwe y’amayero yasinywe n’Umuyobozi w’ikirenga wungirije w’Umuryango Imbuto Foundation, Zirimwabagabo Rita na Bwana Mustafa Terrab wari uhagarariye Umuryango Mohammed VI ugamije iterambere rirambye (Mohammed VI pour le developpement durable).

Bwana Terrab mu ijambo rye yavuze ko bishimiye ubufatanye na Imbuto Foundation kuko yombi ari imiryango iharanira iterambere ry’abaturage mu buryo bwagutse.

Yagize ati “Twishimiye ubufatanye na Imbuto Foundation atari ukubera ko duhuriye ku ndangagaciro zo guteza imbere abaturage ahubwo ari n’uko icyerekezo cy’Umwami Mohammed VI ari uko iterambere rirambye rishingira ku bufatanye no gushyira hamwe.”

Umuyobozi Mukuru w’agateganyo wa Imbuto Foundation Sandrine Umutoni, yabwiye itangazamakuru ko ubufatanye hagati y’imiryango yombi buzashingira ku nzego ebyiri z’ingenzi arizo ubuzima n’uburezi.

Yagize ati “Mu bijyanye n’ubuzima tuzakora igikoni kigezweho gitegura ibiribwa dufatanyije n’Umuryango Solid Africa, tuzabasha kugeza ibiribwa ku barwayi batagira ababitaho mu bitaro, mu bijyanye n’uburezi no guteza imbere abaturage, tuzubaka ingo mbonezamikurire z’abana bato (ECD).”

Imbuto Foundation ni umuryango utegamiye kuri Leta kandi udaharanira inyungu ukaba ufite imishinga na gahunda bitandukanye, ikora ibikorwa bijyanye no guteza imbere uburezi, ubuzima, ubukungu, urubyiruko n’umuryango muri rusange.

Mu myaka 15 umaze ushinzwe, Umuryango Imbuto Foundation umaze gukora ibikorwa byinshi birimo guhemba abakobwa barenga 4256 batsinze neza mu bizamini bya Leta, abanyeshuri 6471 bafashijwe kwiga amashuri yisumbuye bahabwa ibikoresho bikenewe no kwishyurirwa amafaranga y’ishuri, aho umunyeshuri umwe atangwaho amadolari 300 buri mwaka.

Imbuto Foundation imaze gufasha kandi abana 9484 gusubira mu ishuri, abangavu bagera ku bihumbi 13 583 bamaze guhabwa amasomo ku buzima bw’imyororokere mu gihe abagera ku bihumbi 55 bagezweho n’ubukangurambaga bwo kwigisha umwana w’umukobwa.

Urubyiruko rw’indashyikirwa rugera kuri 37 rw’abasore n’inkumi, rumaze gushimirwa kuva mu 2007, naho abanyeshuri 38 896 bagerwaho n’ubukangurambaga bwo kwirinda inda zitateguwe n’ibindi.

Ibyo wamenya ku muryango Mohammed VI pour le Development durable

Fondation Mohammed VI yashinzwe muri Nyakanga 2006 n’Umwami Mohammed VI wa Maroc.

Bwana Terrab yasobanuye ko gushinga uyu muryango bigendanye n’icyerekezo cy’Umwami Mohammed VI cy’uko iterambere rya muntu ari ryo nkingi mwikorezi y’iterambere rirambye kandi yemera ko iterambere ryaramba mu buryo buhamye ari uko abagore batejwe imbere kandi bagahabwa ubushobozi n’imbaraga zose.

Uyu muryango ukora ibikorwa byibanda ku iterambere rya serivisi z’ubuzima, uburezi bushingiye ku bumenyingiro n’uburobyi.

Uyu muryango wageze kuri byinshi bitandukanye birimo ibikorwa 20 mu bihugu bya Afurika birimo ivuriro ry’amaso i Dakar muri Senegal rimaze kubaga uburwayi bw’amaso bugera kuri 800 rinasuzuma ibihumbi 16 (16,000) nta kiguzi. Uyu muryango ufite kandi ivuriro ryita ku babyeyi batwite i Bamako muri Mali n’ibitaro by’abana n’abagore muri Guinee Conakry.

Umuryango Mohammed VI ufite amashuri yigisha amasomo y’ubumenyingiro nk’ay’ubukerarugendo, amahoteli, resitora, ubwubatsi n’ibindi bijyanye n’iterambere ry’igihugu. Ibi bikorwa biherereye mu bihugu bya Côte d’Ivoire, Mali, Guinee Conakry na Madagascar barimo kubakayo amashuri atanu. Abagera ku bihumbi bine (4000) bamaze kurangiza ayo masomo. Ibindi bikorwa uyu muryango ukorera mu bihugu bya Afurika harimo n’iby’uburobyi bikorerwa muri Côte d’Ivoire.

Umuyobozi w’ikirenga wungirije w’Umuryango Imbuto Foundation, Zirimwabagabo Rita na Bwana Mustafa Terrab wari uhagarariye Umuryango Mohammed VI ugamije iterambere rirambye (Mohammed VI pour le developpement durable) bashyira umukono ku masezerano
Umuyobozi w’ikirenga wungirije w’Umuryango Imbuto Foundation, Zirimwabagabo Rita na Bwana Mustafa Terrab wari uhagarariye Umuryango Mohammed VI ugamije iterambere rirambye (Mohammed VI pour le developpement durable), bahererekanya amasezerano nyuma yo kuyashyiraho umukono
Umuyobozi Mukuru w’agateganyo wa Imbuto Foundation Sandrine Umutoni
Umuyobozi Mukuru w’agateganyo wa Imbuto Foundation Sandrine Umutoni, yabwiye itangazamakuru ko ubufatanye hagati y’imiryango yombi buzashingira ku nzego ebyiri z’ingenzi arizo ubuzima n’uburezi
Mustafa Terrab wari uhagarariye Umuryango Mohammed VI ugamije iterambere rirambye (Mohammed VI pour le developpement durable), ageza ubutumwa ku bitabiriye uyu muhango
Madamu Jeannette Kagame washinze Umuryango Imbuto Foundation akaba n’Umuyobozi wayo w’ikirenga(iburyo) na Perezida Kagame bari bitabiriye umuhango wo gusinya amasezerano y’ubufatanye n’umuryango w’Umwami Mohammed VI
Bamwe mu bagize itsinda ryaturutse muri Maroc ryaje riherekeje Umwami Mohammed VI

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved