Kwamamaza

Imicungire mibi y’Imari ya leta itumye Minisitiri w’Imari n’Igenamigambi azitaba Abasenateri

Yanditswe kuya 21-10-2016 saa 09:18' na Ntakirutimana Deus


Inama y’Inteko rusange ya Sena yafashe umwanzuro wo kuzagirana ibiganiro na Minisitiri w’Imari n’igenamigambi ku bibazo bitandukanye bikunze kugaragara ndetse n’ibyagaragaye mu micungire y’imari n’umutungo bya Leta.

Uwo ni umwanzuro wafatiwe muri iyo nama yateranye ku wa Kane tariki ya 20 Ukwakira 2016, ubwo Sena yagezwagaho raporo ya Komisiyo y’Iterambere ry’Ubukungu n’Imari ku isesengura rya raporo y’Umugenzuzi Mukuru w’Imari ya Leta y’umwaka wa 2014-2015.

Iyi raporo yagiye igaragaza amakosa mu micungire y’imari n’umutungo mu bigo na Minisiteri zinyuranye, ku buryo bamwe batangiye kubitangaho ibisobanuro muri Komisiyo ishinzwe gukurikirana imikoresherezwe y’imari n’umutungo by’igihugu mu Nteko Ishinga Amategeko,PAC.

Senateri Mukankusi Perrine, yavuze ko iyo Minisiteri ikwiye gutanga ibisobanuro by’uburyo ihuza inshingano zayo n’ibigaragara muri raporo y’umugenzuzi mukuru w’Imari ya Leta.

Mukankusi yavuze ko abagenzuzi b’ibigo (Internal Auditors) boherereza iyo Minisiteri raporo ya buri kwezi y’uko umutungo wa leta wakoreshejwe, ndetse ikabigenzura, akibaza icyo bazikoresha gituma badafasha inzego ziba zagaragaje imicungire mibi y’umutungo kuba zakwikosora, mbere y’uko bibonwa n’umugenzuzi mukuru w’imari n’umutungo bya leta.

Ati “ Ndumva umwanzuro waba uwo guhamagaza Minisitiri tukagirana ikiganiro akatubwira ahari icyuho, tukaba twagirana ubufatanye bwo kugishakira ibisubizo.”

Nyuma yo kungurana ibitekerezo, Perezida wa Sena, Bernard Makuza yagize ati “Nkurikije ibitekerezo bitanzwe hano, nyuma yo kureba iyi myanzuro ndetse n’icyakorwa, hari ubwo umuntu yabihuriza hamwe mu mwanzuro Sena yafata ubu ngubu bijyanye n’uko nyuma yo gusesengura raporo y’umugenzuzi mukuru y’imyaka 2014/2015, twahura na Minisitiri w’Imari n’Igenamigambi kugira ngo twungurane ibitekerezo ku bibazo bigaragara muri iyo raporo ndetse n’ibindi byagaragaye mbere.”

Uwo mwanzuro wahise utorwa ku bwumvikane busesuye maze byemezwa ko bazaganira na Minisitiri Ambasaderi Claver Gatete.

Mu bitekerezo bitandukanye Abasenateri bagiye batanga, byarimo kandi kureba niba umurenge udakwiye kuba urwego rufite ubuzima gatozi rugira n’umukozi ushinzwe Ingengo y’imari igenerwa ibikorwa bitandukanye bikorerwamo, kugira ngo ajye akurikirana n’ikoreshwa ryayo.

Ibyo babishingiraga ku kuba Umugenzuzi Mukuru w’Imari ya leta yaragaragaje amafaranga menshi yagiye akoreshwa nabi mu nzego zitagengwa n’ingengo y’imari ya Leta zirimo n’urw’umurenge.

Senateri Rugema Michel yavuze ko mbere y’uko Sena isaba ko hashyirwaho uwo mukozi ku murenge, ari uko itegeko risaba ko umurenge uhabwa ubuzima gatozi ryakwihutishwa.

Hari bamwe muri bo ariko bavuze ko basanga umurenge utahabwa ubuzima gatozi kubera uwo mukozi gusa.

Senateri Tito Rutaremara yavuze ko hari igihe basanga hakenewe n’ushinzwe igenamigambi n’abandi batandukanye kuri urwo rwego, bityo bikaba atari byiza ko umurenge uherwa ubuzima gatozi uwo mukozi umwe.

Ati “Niba twumva ko umurenge umaze kuba igice kinini cy’urwego rw’igihugu, ni ugusaba ko hari ibyamanuka bikava ku karere bikajya ku murenge, ugasanga hari undi ubura uti nyamuneka nimushyireho n’uwakora igenamigambi n’abandi.”

Abasenateri kandi bagarutse ku kibazo cy’abakozi bakunda kugaragara mu bibazo by’imicungire mibi y’imari n’umutungo bya leta, byagaragaye ko batabikora kubera ubumenyi buke, abagirwa inama ugasanga ntabwo bikosoye n’ibindi bibazo bitandukanye. Ibyo bibazo bitandukanye ngo ni byo bazaganira na Minisitiri w’Imari n’igenamigambi mu gihe kizagenwa.

Senateri Makuza (hagati) avuga ko gutumiza Minisitiri w'Imari n'Igenamigambi bizabasha gushakira hamwe igisubizo cy'ibibazo bigaragara muri iyi raporo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved