Kwamamaza

Imirenge n’Utugari bitagira ababihagarariye mu byasubije Ngororero inyuma mu mihigo

Yanditswe kuya 11-11-2016 saa 12:30' na Prudence Kwizera


Mu mwaka w’Imihigo wa 2015-2016, Akarere ka Ngorororo kaje ku mwanya wa 14 n’amanota 75, kavuye kuwa gatatu kari kabonye mu mwaka wa 2014-2014, bitewe n’impamvu zitandukanye zirimo imwe mu mishinga yadindiye nk’uko byasobanuwe n’Umuyobozi wako.

Umuyobozi w’Akarere ka Ngororero, Godfroid Ndayambaje, mu kiganiro yagiranye na IGIHE yasobanuye zimwe mu mpamvu zatumye basubira inyuma, agaragaza n’ingamba zafashwe.

Ndayambaje yavuze ko umushinga w’amazi wadindiye bitunguranye, no kuba hari imirenge igera kuri itandatu n’utugari 17 byari bidafite Abanyamabanga Nshingwabikorwa biri mu byabasubije inyuma.

Yagize ati “Umushinga wagombaga kuzana amazi hano mu Ngororero waradindiye, natwe byaradutunguye kuko twari twakoze ibyo dusabwa byose, WASAC yagombaga kudukorera ku buryo amazi azira igihe, ariko ntibyashobotse ko twesa uwo muhigo”.

Arakomeza ati “Hari abakozi benshi batari bari mu myanya, aho twari dufite ba Gitifu b’imirenge batandatu badakora, batari mu kazi, dufite ba Gitifu b’utugari 17 batari mu myanya, murumva ko hari byinshi byagiye bidindira.

Umuyobozi w’Akarere ka Ngororero akomeza avuga ko umwanya babonye mu mihigo utabashimishije kuko basubiye inyuma, bityo akagaragaza zimwe mu ngamba bafite.

Avuga ko bari gukora ibishoboka byose ngo umuyoboro w’amazi wadindiye usubukurwe kandi amazi agere ku baturage vuba, ndetse imirenge n’utugari bidafite abayobozi, bari kugenda bashyirwaho.

Yagize ati “Ubu turacyavugana na Wasac kugira ngo ayo mazi agere ku baturage neza, aya mbere yatangiye kugera mu kigega, turi kubaka n’ikindi kinini kizayahuriza hamwe kugira ngo abashe kugera ku baturage benshi. Abayobozi na bo turi kugenda tubashyira mu myanya buhoro buhoro, ku buryo twumva tuzagaruka ku mwanya wacu, byaba ngombwa tukaza n’imbere”.

Haracyari impungenge

Bamwe mu baturage bo mu Karere ka Ngororero bavuga ko hari zimwe mu nzitizi bafite zishobora gutuma batesa neza imihigo y’umwaka wa 2016-2017.

Zimwe muri zo ngo harimo kuba ibyiciro by’ubudehe birimo amakosa, bigatuma imwe mu miryango ititabira gutanga umusanzu w’ubwisungane mu kwivuza.

Ikindi aba baturage bavuga ni ihindagurika ry’ibihe rishobora gutuma umusaruro utaboneka uko babyifuza, bityo bakaba bahura n’inzara.

Mu byifuzo byabo, basanga ibyiciro by’ubudehe bikwiye gukosorwa.

Jean Damascene Hategekimana utuye mu murenge wa Kavumu ati “ Ibyiciro by’ubudehe by’ubu bikoze nabi, nk’ubu hari abantu bakennye cyane bashyizwe mu cyiciro cya gatatu, ku buryo nta wushobora kuba yahabwa akazi nko muri za VUP n’ahandi ngo abone amafaranga ya mituweri”.

Arakomeza ati “Impamvu tutitabira kwishyura mituweri, ikibazo ni aho kiri kuko tubura amafaranga, hari nubwo umuntu arwara akarembera mu nzu. Twebwe tubona biriya byiciro by’ubudehe byasubirwamo, kuko uburyo bakoreshe bwo kuzuza turiye dupapuro, ntabwo bwari bunoze.”

Ku kijyanye no n’ubwitabire bw’abaturage mu kwishyura umusanzu w’ubwisungane mu kwivuza (Mutuelle de Santé), abatuye Ngororero kuri ubu bageze ku kigereranyo cya 62%.

Ku mazi meza, abayafite bari ku kigereranyo cya 62%, naho amashanyarazi bari kuri 18%.

Umuyobozi w'Akarere ka Ngororero, Godfroid Ndayambaje

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved