Kwamamaza

Imiryango 49 yasenyewe n’intambi iratakambira Akarere ka Rubavu

Yanditswe kuya 17-11-2016 saa 16:46' na Mukwaya Olivier


Hashize amezi atatu abaturage bo mu tugari twa Terimbere na Kinigi mu Murenge wa Nyundo, batakambira akarere kubera intambi zituritswa n’Abashinwa bakora umuhanda Rubavu-Karongi zikabasenyera inzu, bakaba basaba kwishyurwa.

Nubwo bamaze igihe bagejeje ikibazo cyabo ku buyobozi kugeza n’ubu ngo nta kirakorwa, mu gihe inzu zabo zangiritse bikomeye.

Umwe muri aba baturage witwa Uzayisenga yagize ati "Hashize igihe tugaragaza ikibazo cyacu ariko na n’ubu ntigikemuka, muri aka gace inzu nyinshi zarangiritse. Bataraturitsa intambi inzu zacu zari nzima, ariko baraturitsa ukagira ngo ni umutingito, ukabona inzu isadutsemo kabiri ariko bananiwe kutwishyura ngo tuve aha hantu.”

Mu gihe bamwe bategereje guhabwa ingurane z’imitungo yabo irimo inzu zasenywe n’inkambi, ngo hari n’abandi bavuga ko bakuwe ku rutonde rw’abazishyurwa mu buryo bita ko budasobanutse.

Uhoranimana Jean Paul ati " Ni ikibazo kidukomereye, biriya bimashini byabo biradusenyera, rwose inzu isenyuka ureba, ariko nkanjye banze kunshyira ku rutonde rw’abazishyurwa ku mpamvu zidasobanutse bavuga ko inzu yanjye yari isanzwe ishaje."

Abaturage 49 ni bo bagaragaje ko inzu zabo zangijwe n’izi ntambi, gusa ubuyobozi bw’Akarere bwo buvuga ko mu igenzura bwakoze bwasanze 10 muri bo ari bo bagomba kwishyurwa na ho abandi ngo ikibazo cyabo nta shingiro gifite.

Umuyobozi wa Sosiyete Hunan Road&Bridges yubaka uyu muhanda, Jelly Gu avuga ko hari abaturage bamwe babeshya ko basenyerwa n’imashini, gusa ngo harimo abavugisha ukuri bagera ku miryango 10 bo bakaba bemera kubishyura nubwo atagaragaza igihe bazishyurirwa.

Umuyobozi w’Akarere ka Rubavu wungirije ushinzwe ubukungu, Murenzi Janvier avuga ko hashyizweho itsinda ku rwego rw’Akarere rishinzwe kureba abaturage bagomba kwishyurwa.

Yagize ati " Icyo twakoze cyihutirwa kwari ukubanza kureba koko abaturage bagomba kwishyurwa, mu miryango 49 yari yagaragaje icyo kibazo twasanze 10 ari yo igomba kwishyurwa, igikorwa kigiye gukurikiraho ni ukureba uko bishyurwa ariko nta gihe runaka twavuga bigomba kuba byarangiye."

Umuhanda Karongi-Rubavu watangiye gushyiramo kaburimbo mu bice bimwe na bimwe akaba ari umwe mu yo abaturage bemerewe na Perezida Kagame. Kugeza ubu waratangiye kuba nyabagendwa ndetse imodoka zitwara abagenzi zisigaye ziwukoreramo zikagarukira mu karere ka Rutsiro.

Zimwe mu nzu zashegeshwe n'ituritswa ry'intambi
Inzu zagiye zisaduka kubera ituritswa ry'intambi
Ahaturikirizwa intambi zisenyera abaturage
Abaturage bagaragaza akababaro kubera inzu zabo zasenyutse bakaba abadahabwa ingurane zazo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved