Imishinga ya miliyari zisaga 143 Frw yaradindiye biteza leta igihombo

Yanditswe na Emma-Marie Umurerwa
Kuya 10 Gicurasi 2019 saa 07:58
Yasuwe :
0 0

Minisitiri w’Ubutabera, akaba n’intumwa nkuru ya Leta, Johnston Busingye, yabwiye abayobozi bafite inshingano zo kugena imikoreshereze y’ingengo y’imari ya Letan’abandi bafite aho bahuriye n’amasoko ya Leta, kwirinda kuyiteza igihombo no kuyishora mu manza za hato na hato.

Ashingiye ku byavuye muri Raporo y’umugenzuzi w’imari ya Leta y’umwaka w’ingengo y’imari ya 2017-2018, Minisitiri Busingye, yavuze ko hari ibigo bimwe na bimwe na za Minisiteri bahoza Leta mu manza bikayiteza igihombo gikomeye, abandi bagatanga amasoko mu buryo bunyuranyije n’amategeko.

Yabibukije ko kugirango gahunda ya Guverinoma y’imyaka irindwi igamije kwihutisha iterambere rirambye kandi rigera kuri bose, izagerweho bisaba gukoresha neza ingengo y’imari ya Leta.

Ati “Amasezerano 86 afite agaciro ka miliyari 143, 255, 975. 651 Frw, imishinga yayo yarakerewe cyangwa se ba rwiyemezamirimo bayita batayirangije. Miliyari 143 niba ushaka kureba igihombo ziduteza subira kuri gahunda ya Guverinoma y’imyaka irindwi “NST1” utubwire uti nyafite nonaha yavamo ibi n’ibi.”

Hari nzego za Leta ziregwa mu gitondo na nimugoroba

Minisitiri Busingye avuga ko hari inzego za leta zikoresha amafaranga menshi zitajya ziyishora mu manza ariko ugasanga hari izindi ziregwa mu gitondo na nimugoroba.

ati “Dufite n’izindi ziregwa mu gitondo na nimugoroba kandi zikoresha amafaranga macye wagira ngo nicyo babereyeho, wagirango bashyizeho urwego bararubwira ngo inshingano zawe ni ukuregwa no kuburana.”

Yongeraho ikibabaje ari uko leta ijya kuburana abafite dosiye bazimanye yamara gutsindwa zikaboneka mu kabati.

Kudakorera mu mucyo, kugusha Leta mu bihombo bya hato na hato, kongera amasezerano cyangwa kuyasesa mu buryo bunyuranyije n’amategeko, kugura cyangwa gukora ibidakenewe bitwara Leta akayabo k’amafaranga.

Hari kandi gusonera abantu runaka imisoro n’amahoro mu buryo bunyuranyije n’amategeko, guhoza Leta mu manza ziyiteza igihombo cy’amafaranga atagira ingano, kwishyura imirimo itarakozwe cyangwa itarakozwe neza ni bimwe mu byo aba bayobozi basabwe kwirinda.

Umunyamabanga mukuru w’Ubushinjacyaha, Jean Damascène Habimana, yabwiye aba bayobozi ko ibyari amakosa ubu byahindutse ibyaha, abasaba kurushaho gukorera mu mucyo.

Ati “Ibi bikorwa byose itegeko ryabiteganyirije ibihano ntabwo bikiri amande ya 500.000Frw. Biriya byaha byose byashyizwe mu cyiciro cy’ibyaha by’ubugome”.

Umugenzuzi mukuru w’imari ya leta, Biraro Obadiah, aherutse kuvuga ko bamwe mu bafite inshingano zo kugena imikoreshereze y’imari ya Leta bigira ba ntibindeba bigatuma ihomba.

Mu mwaka w’ingengo y’imari urangiye, abahamijwe ibyaha bikomoka ku byagaragajwe na raporo y’umugenzuzi mukuru w’imari ya Leta bagera ku 138.

Raporo y’imikoreshereze y’ingengo y’imari ya Leta mu 2016/2017, yagaragaje ko mu igenzura ryakorewe ibigo n’uturere 165, hari amafaranga 391,193, 153 Frw yanyerejwe mu buryo busa n’uburiganya; 3,286,227, 450 Frw yasohotse nta nyandiko ziyasobanura; 1, 711 ,072, 606 Frw yasohotse inyandiko zidahagije; 2, 364, 412,095 Frw yarasesaguwe naho 244, 574, 402 Frw yasohotse nta burenganzira, yose akaba 7, 997, 479, 706 Frw.

Amasezerano yadindiye afite agaciro ka miliyari 206 Frw, ayatawe ni miliyari 45 Frw, imitungo idakoreshwa ni miliyari 22, ikoreshwa nabi ry’imari n’umutungo bya Leta ni miliyari 7Frw.

Umunyamabanga Nshingwabikorwa wa RGB, Kalisa Edouard atanga igitekerezo
Umunyamabanga uhoraho muri Minisiteri y'Ubutabera , Mukeshimana Beatha
Umuyobozi mukuru w'Ibitaro bya CHUK, Dr Hategekimana Theobard (ibumoso) yitabiriye iyi nama
Umunyamabanga Nshingwabikorwa wa Komisiyo y'Ubumwe n'Ubwiyunge, Ndayisaba Fidele atanga igitekerezo
Minisitiri Busingye yasabye abashinzwe imikoreshereze y'imari ya leta kwirinda ibyateza igihombo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza