Imitwe ya politike mu Rwanda yishimira ko nta makimbirane ayirangwamo

Yanditswe na Emma-Marie Umurerwa
Kuya 1 Kamena 2019 saa 09:01
Yasuwe :
0 0

Abagize imitwe ya Politike itandukanye mu Rwanda, bahamya ko itegeko ngenga n’andi mategeko agenga imitwe ya politike n’abanyapolitike mu Rwanda, ribafasha kwirinda ko hari amakimbirane yarangwa muri bo.

Ibi ni bimwe mu byagarutsweho mu mahugurwa y’abagize Komite zishinzwe gukumira no gukemura amakimbirane mu mitwe ya politiki mu Rwanda, ubwo baganiraga ku byavuguruwe ku itegeko ngenga numero 005/2018 ryo ku wa 30/08/2018 rihindura itegeko ngenga numero 10/2013 ryo ku wa 11/07/2013.

Ikiganiro cyatanzwe na Depite Nyirahirwa Veneranda wo muri PSD yavuze ko imitwe ya politike mu Rwanda ifite umurongo yihaye wo gukemura amakimbirane no gufatira ingamba ku gihe.

Ati “Mu Rwanda dufite amahirwe yuko tutabona amakimbirane nk’uko tujya tubyumva ahandi. Ni ibyo gushimirwa kuko biterwa nuko komite zishinzwe imyitwarire zikora inshingano zazo neza.”

Yakomeje atanga igisobanuro cy’amakimbirane ya politike agira ati “Amakimbirane ya politike bivugwa ko ari ubushyamirane, ubwumvikane bucye bushingiye ku miyoborere mibi, kurwanira ubutegetsi, kudasanganya neza umutungo w’igihugu, gukoresha nabi umutungo, kutumva kimwe, kudahuza ibitekerezo bya politike mu mitwe ya politike, cyangwa mu mitwe ya politike, amatsinda y’abantu mu gihugu cyangwa hagati y’igihugu n’ikindi.”

Umuyobozi w’agateganyo w’Ikigo cy’Igihugu cy’imiyoborere (RGB) Dr Usta Kaitesi, nawe yashimye ko imitwe ya politike mu Rwanda itarangwamo amakimbirane nk’uko bikunda kugaragara mu bindi bihugu.

Ati “Umuntu yashima ko imitwe ya politike mu Rwanda iri mu muco w’itegeko nshinga, kuba bafite ibitekerezo bitandukanye ntabwo ari impamvu ituma batagira umwanya wo gukorana batanahugurana kuko bose icyo bagambiriye ni ugufasha leta kugera ku nshingano zo guteza imbere umunyarwanda.”

Yakomeje avuga ko Itegeko Ngenga rigenga Imitwe ya Politike n’Abanyapolitike ryavuguruwe mu 2018, kuko igihe cy’ivugururwa ry’itegeko nshinga hari ibyahinduwe cyane cyane ibijyanye n’ibihano, bituma biba ngombwa ko naryo rivugururwa.

Ati “Muri iri tegeko ryavuguruwe hajemo inzego ebyiri zitari zirimo mbere, izo ni urwego rushinzwe imitungo y’abanyepolitike hamwe n’urwego ngengamyitwarire no gukemura impaka, izo nzego rero ni ukugirango zubake umuco wo kubazanya n’ubunyamwuga mu mitwe ya politike.”

Ku bindi byahindutse ari ibijyanye n’ibihano ubundi byatangwaga ukabona inzira yo kubitanga bisaba kubanza kujya mu nkiko. Iri itegeko rero ryasobanuye ibyo Sena ikora ikabyohereza mu rwego rw’Igihugu rw’Imiyoborere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza