Kwamamaza

Impamvu Perezida Kagame akomeje kwerekeza amaso muri Afurika y’u Burengerazuba

Yanditswe kuya 6-10-2016 saa 14:32' na Rabbi Malo Umucunguzi


Mu myaka myinshi ishize, u Rwanda rwagiye rushyira imbaraga mu mubano n’ibihugu byo muri Afurika y’u Burasirazuba, ariko ubu kuva Conakry, Brazzaville, Cotonou na Libreville; Perezida Paul Kagame akomeje kwagura imikoranire n’ibi bihugu byahoze bikolonijwe n’u Bufaransa.

Perezida Patrice Talon wa Bénin uheruka mu Rwanda yashimangiye ko Perezida Kagame, agaragaza ko ari umuyobozi ushingiye imikorere ku mpinduka zitanga umusaruro.

Perezida Talon yabivugiye i Kigali mu kiganiro n’abanyamakuru ubwo yasozaga uruzinduko rw’iminsi itatu kuwa 31 Kanama 2016. Ni uruzinduko rwateguwe nyuma y’amezi ane gusa atorewe kuyobora Bénin, ubwabyo bifite icyo bivuze mu gihe nko mu myaka 10 ishize bitashobokaga.

U Rwanda ruri kwiyegereza Afurika ikoresha Igifaransa

Ikinyamakuru Jeune Afrique, kigaragaza ko mu gihe umubano w’u Rwanda n’u Bufaransa wari utifashe neza (ahagana mu 2006 na 2009), rwagaragaje ko rushaka kuva mu Muryango w’Ibihugu bikoresha Igifaransa (OIF), nyuma yo kuva mu Muryango w’Ubukungu bw’Ibihugu bya Afurika bwo hagati, (CEEAC).

Icyo gihe uwari Minisitiri w’Ububanyi n’Amahanga w’u Rwanda, Charles Murigande yavuze ko ‘‘Kuba mu miryango myinshi y’akarere hari inshingano bitwongerera zaba iz’amafaranga, politiki, ubukungu, ubucuruzi ndetse n’imibanire tutashoboraga kubahiriza uko zakabaye.’’

Mu 2008, u Rwanda rwari rumaze kugira Icyongereza ururimi rwigishwamo mu mashuri, ndetse rwinjira byuzuye mu Muryango wa Afurika y’u Burasirazuba (EAC), byasaga n’aho rwerekeje amaso ku Bwongereza bwari buyobowe na Tony Blair nka Minisitiri w’Intebe na Leta Zunze Ubumwe za Amerika zayoborwaga na George W. Bush.

Gusa mu myaka mike ishize, u Rwanda rwongeye guhindukirira Afurika ikoresha Igifaransa. Mu mezi 12 ashize, Perezida Kagame yakoreyeyo ingendo esheshatu ndetse yakirira i Kigali benshi mu bakuru b’ibihugu na za guverinoma z’ibyo bihugu. Hejuru y’ibyo, kuwa 17 Kanama rwasubiye muri CEEAC.

Ambasaderi Harebamungu uhagarariye u Rwanda i Dakar muri Senegal, umwanya wahanzwe mu 2012, aheruka kuvuga ati ‘‘Kuri twe, ikibazo cy’ururimi ntacyo kimaze, ni imipaka yahanzwe n’abakoloni gusa. Turi Abanyafurika twese kandi turashaka gukorana na buri wese. Ariko birumvikana twashyizeho ibigomba kwibandwaho mbere tugahera ku baturanyi ba hafi.’’

Amahirwe mu bukungu na Politiki

Umushakashatsi ukomoka muri Uganda, Frederick Golooba-Mutebi, yagize ati ‘‘U Rwanda rukeneye kugemura hanze ibicuruzwa byarwo na serivisi, ariko EAC ntabwo yazaruhaza, kandi Kigali izi neza ko bitoroshye kujya ku masoko yo mu Burengerazuba bw’Isi kurusha ayo muri Afurika.’’

Muri iki gihe ubucuruzi bw’u Rwanda n’ibihugu byo mu karere ntabwo buri ku rwego rwo hejuru, ku buryo mu bihugu by’ibituranyi, RDC yonyine ariyo igaragara mu bihugu 10 by’ingenzi bikorana ubucuruzi n’u Rwanda.

Gusa ikompanyi y’Indege RwandAir, igaragaza neza icyifuzo cy’u Rwanda, aho yatangije ingendo zigana Cotonou kuwa 02 Kanama, Urugendo rwa Mbere rugana Abidjan rukazakorwa kuwa 8 Ukwakira. Guhera muri Mutarama 2017 hakazaba hatahiwe Conakry, igihugu Perezida Kagame aherukamo muri Werurwe.

Jean-Paul Nyirubutama, Umuyobozi muri RwandAir, yabwiye Jeune Afrique ko guhitamo ibyo byerekezo bishingira ahanini ku kuba kiriya gice (Afurika y’u Burengerazuba), kiri hafi y’inyanja ya Atlantique na Afurika ikoresha Icyongereza, nubwo n’impamvu z’imiyoborere myiza bidasigana.

Ibyo byakwerekana impamvu RwandAir idakorera ingendo nk’i Kinshasa cyangwa Luanda, imijyi ikomeye muri Afurika yo hagati.

Muri ibyo bihugu bibiri, umubano n’u Rwanda ntabwo uhamye ndetse n’amasezerano y’ubufatanye mu by’indege ntabwo arashyirwaho umukono, ahubwo RwandAir ikorera ingendo muri Libreville (Gabon) na Brazzaville (Congo Brazaville) zifitanye umubano mwiza n’u Rwanda.

Hagati ya Perezida Kagame na Ali Bongo wa Gabon hari icyo bajya guhuriraho, aho bombi barutana umwaka umwe, ndetse na

U Rwanda na Gabon bifite byinshi bihuriyeho. Mu 2012, Gabon, yatangaje ko igiye kwimakaza Icyongereza nk’ururimi rukoreshwa mu kazi mu gihugu, igendeye ku Rwanda, ndetse kuva Perezida Ali Bongo yajya ku butegetsi mu 2009, ashaka kuvugurura igihugu ndetse kigaca ukubiri na ruswa.

Kuri Perezida Denis Sassou Nguesso Congo wa Brazaville, we uruhare rwe rwagaragaye mu 2013 ubwo hari ikibazo cya M23 cyateje umwuka mubi hagati y’u Rwanda na Congo Kinshasa. Perezida Nguesso yagize uruhare mu guhuza abakuru b’ibi bihugu ngo gishakirwe umuti.

Minisitiri w’Ububanyi n’Amahanga wa Congo, Cyprien Sylvestre Mamina, yagize ati ‘‘U Rwanda rwashinjwaga gushyigikira M23, ba perezida b’u Rwanda na Congo (Brazaville) biyemeza gushaka umuti.’’

U Rwanda kandi rwashakaga umuti w’ikibazo cy’ubuhunzi ku basaga 12 000 binjiyeyo mu 1997, umubano ufata indi ntera mu Ukuboza 2015, ubwo Perezida Denis Sassou Nguesso yagiriraga uruzinduko mu Rwanda, kugeza ubwo ibihugu byombi byafunguye za Ambasade muri Kanama uyu mwaka.

Umubano n’u Bufaransa

Yaba Ali Bongo Ondimba na Denis Sassou Nguesso, umubano w’ibihugu byabo n’u Bufaransa ukomeje kugenda ukonja, nyuma y’uko mu 2010 icyo gihugu cyari cyinjiye mu kibazo cy’imitungo yagiye ibonwa mu buryo butaboneye.

Hagati y’u Bufaransa n’u Rwanda naho umubano si shyashya, aho u Rwanda rushinja iki gihugu gukingira ikibaba abagize uruhare muri Jenoside yakorewe abatutsi bagihungiyemo, n’ubwo hari batatu bonyine baburanishijwe guhera mu 2014.

Na nyuma ya 2015, ubwo Ambasaderi Michel Flesch yari agiye mu kiruhuko cy’izabukuru, u Bufaransa ubu nta Ambasaderi bufite mu Rwanda.

Gusa umubano w’ibi bihugu n’u Bufaransa ntabwo usobanura uko ibintu bimeze muri rusange, kuko uyu munsi umubano wabwo na Guinée, Côte d’Ivoire cyangwa Bénin uhagaze neza, ariko imyitwarire yabwo ku bihugu bwahoze bukolonije itandukanye n’uko ibindi bikomeye nk’u Bushinwa byitwara, imyanzuro ya Perezida Kagame mu birebana n’imikoranire n’uburengerazuba bw’Isi ikaba ishobora guha urugero abandi bakiri bato muri Afurika.

Cyprien Sylvestre Mamina yakomeje agira ati ‘‘Iki gihugu cyavuye kure : Ibintu byose ntabwo biratungana, ariko gifite umutekano kandi kiri mu nzira nziza nk’uko twabibonye mu nama y’Umuryango wa Afurika Yunze Ubumwe i Kigali muri Nyakanga.’’

Mu gushishikarira imiyoborere y’u Rwanda kandi, ibivugwa ko hatari ubwisanzure bwa politiki, ntibitera impungenge abakuru b’ibihugu bya Afurika.

Perezida Patrice Talon ubwo yari mu Rwanda, yabajijwe ku ivugururwa ry’Itegeko Nshinga ryeremereye Perezida Kagame kwiyamamariza manda ya Gatatu mu 2017, we yavuze ko ari ibintu byumvikana.

Ati ‘‘Igikenewe uyu munsi muri Bénin ntabwo gihita kiba icyo mu Bushinwa, Libya, Espagne cyangwa mu Rwanda. Hari ibishushanyo bashaka gushyira mu bikorwa ahantu hose kandi bishobora guteza ikabazo gikomeye.’’

Perezida Kagame ubwo yakiraga Patrice Talon wa Benin kuwa 30 Kanama 2016

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved