Guha nyirantarengwa abakorera mu nzu zo guturwamo byaturutse kuki? (Video)

Yanditswe na Philbert Girinema
Kuya 7 Mutarama 2017 saa 06:00
43 29

Umujyi wa Kigali wasobanuye ko wafashe icyemzo cyo gusaba abacururiza n’abakorera ibikorwa byabo mu nzu zagenewe guturwamo kuba bimutse mu gihe cy’amezi atatu ushingiye ku gushyira mu bikorwa ibiteganywa n’igishushanyo mbonera.

Mu gitondo cyo ku wa 5 Mutarama 2017, nibwo hamenyekanye amakuru y’uko abacururiza mu nzu zagenewe guturwamo bagiye kuzikurwamo bakajya gukorera mu zagenewe ubucuruzi.

Umuyobozi wungirije w’Umujyi wa Kigali ushinzwe iterambere ry’ubukungu,Busabizwa Parfait, yabwiye abanyamakuru ko zimwe mu mpamvu zatumye hafatwa iki cyemezo zirimo umuvuduko udasanzwe w’abatuye mu Mujyi wa Kigali kuko ngo kugeza ubu bageze kuri miliyoni 1.2 mu gihe mu 2040 bateganya ko bazaba bageze kuri Miliyoni 3.9.

Yavuze kandi ko igishushanyo mbonera cy’umujyi kigaragaza neza ahateganyijwe ibikorwa bitandukanye birimo ko hari ahagenewe inganda, ibikorwa by’ubucuruzi, ibikorwa by’imyidagaduro, ubuhinzi aho guturwa n’ibindi kandi byose bigomba gushyirwa mu bikorwa.

Yagize ati “Haramutse hadafashwe ingamba zo gutuza abantu neza, ndetse no guteganya ibikorwa remezo bizaba bijyanye n’abo baturage bazaba batuye umujyi wa Kigali, twazagira ibibazo.”

Avuga ko bakoze igenzura bagasanga inzu nyinshi zari zaragenewe guturwamo zisigaye zikorerwamo ibindi bikorwa bitandukanye ku buryo ngo inzu yagenewe guturwamo n’abantu batanu isigaye ikorerwamo n’abantu barenga 20.

Ni icyemzo gishobora gusharirira umucuruzi wakoreraga ibikorwa bye mu nzu ye adakodesha, gusa Busabizwa avuga ko bazasaba ba nyir’inzu zizakodeshwa, bakagabanya ibiciro ku buryo abo bacuruzi batazahomba.

Ati “Birumvikana ko niba umuntu yari ari mu nzu yishyuraga amadolari 1000 akajya mu yo azishyura 3000 byamugora, gusa twegereye abo bashoramari bafite inzu tubasaba kugabanya ibiciro.”

Umuvugizi w’urugaga rw’abikorera, PSF Nkusi Mukubu Gerard, yavuze ko nk’abikorera bazaganira n’abacuruzi bakorohereza ba rwiyemezamirimo bato n’abaciriritse.

Yagize ati “si byiza kubona hari inzu zateganyijwe guturwamo ariko ugasanga zikorerwamo ibindi bikorwa, gusa tuzegera abashoramari bafite inzu nkuko Visi-Meya yabivuze, bagabanye ibiciro.”

Imibare itangazwa n’Umujyi wa Kigali igaragaza ko inzu zigera kuri 968 zikorerwamo ibikorwa by’ubucuruzi n’ibindi nyamara zaragenewe guturwamo. Igaragaza ko mu Karere ka Gasabo hari inzu 517, Nyarugenge 356 naho Kicukiro hakaba 95.

Abazikoreramo bahawe amezi atatu gusa yo kuba batakizikoreramo, ni ibintu bisobanurwa mu ndorerwamo yo gushyira mu bikorwa ibijyanye n’igishushanyo mbonera cy’umujyi wa Kigali.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE