Kwamamaza

Impunzi ziri mu Rwanda zasobanuriwe itegeko rihana ihohoterwa

Yanditswe kuya 30-11-2016 saa 22:03' na Cyprien Niyomwungeri


Ihuriro ry’Abafasha mu by’Amategeko (Legal Aid Forum), kuri uyu wa gatatu tariki 30 Ugushyingo 2016, ryaganiriye na bamwe mu bahagarariye impunzi z’Abarundi n’Abakongomani ku mategeko y’u Rwanda ahana ihohoterwa rishingiye ku gitsina, kugirango nubwo ari impunzi ziri mu gihugu babashe kumenya uko icyo cyaha gihanwa.

Ibi biganiro biri mu rwego rwa gahunda y’iminsi 16 yahariwe kurwanya ihohoterwa rishingiye ku gitsina, byabereye i Gikondo mu mujyi wa Kigali.

Impunzi kandi zanakanguriwe uko zigomba kwirinda iryo hohoterwa, uko zabigenza igihe zihuye na ryo kugira ngo uburenganzira bw’uwahohotewe bwubahirizwe n’uwabikoze ahanwe.

Umuhuzabikorwa w’umushinga wo gutanga ubufasha mu by’amategeko ku mpunzi ziri mu gihugu, Yvonne Nyiramugwaneza, yavuze ko impamvu y’ibi biganiro ari uko mu bikorwa ihuriro ry’abafasha mu by’amategeko, LAF, rikora mu mpunzi ryasanze hari impunzi zigwa mu byaha by’ihohoterwa zitabizi.

Yagize ati “Dufite imibare y’impunzi zagiye zigwa mu byaha harimo n’iby’ihohoterwa rishingiye ku gitsina, tukabunganira mu nkiko. Ibi biganiro ni uburyo bwo gukumira ihohoterwa rishingiye ku gitsina kugira ngo baryirinde bamenya uko itegeko ry’u Rwanda ribihana, bizatuma babyirinda ntibazongere kugwa muri ibyo byaha.”

Umwe bitabiriye ibiganiro, Umulisa Melissa wahunze aturuka muri Congo mu 2000, yemeye ko ihohoterwa rigaragara cyane ari irishingiye ku gitsina cyane aho abantu bapfa imitungo n’irikorerwa abana.

Yavuze ko ibi biganiro bya LAF ryabigishije byinshi batafataga nk’ihohoterwa cyane cyane ibishingiye ku mico itandukanye.

Ati “Ibi biganiro byahuje abagabo n’abagore, biradufasha gusobanukirwa ihohoterwa icyo aricyo niba hari uwarikoreraga undi cyangwa uwarikoreraga abana arireke.”

Akomeza avuga ko muri Congo batigeraga babona ibiganiro nk’ibi kubera intambara za buri munsi. Ashima cyane uburyo bageze mu Rwanda bakidagadura, bagahugurwa bigatuma bakosoka mu mutwe.

Umulisa avuga ko hari imico yo muri Congo bageze mu Rwanda bagasobanukirwa ko ari ihohoterwa.

Ati “Twabonye impinduka kuko nko muri Congo umugore ni we ukora umugabo aba aryamye ategereje, nasanze inaha buri wese akora niba umugore nta kazi afite umugabo akabimwubahira gutyo, ariko muri Congo usanga umugabo afite n’amashuri kurusha umugore ariko aryamye ntashobora gukora kuko niko umuco wabo umeze.”

Abaganirijwe bavuga ko ihohoterwa rikigaragara mu nkambi z’impunzi cyane ku bagore, ari abantu batari impunzi babafatirana bakabashora mu bikorwa cyane cyane iby’ubusambanyi babashukishije amafaranga kuko bazi ko ntacyo bakora kibafasha.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved