Imvano y’ukwirukanwa “nta mpaka” kwa AIP Musisi mu bakozi ba leta

Yanditswe na Philbert Girinema
Kuya 14 Ukwakira 2016 saa 07:54
Yasuwe :
0 0

Abacungagereza babiri bakoraga mu Rwego Rushinzwe Imfungwa n’Abagororwa, RCS, babasezerewe “nta mpaka” mu mirimo yabo, nk’uko bigaragara mu igazeti ya leta yasohotse kuwa Kabiri tariki 11 ukwakira 2016, hashingiwe ku iteka rya Minisitiri w’Intebe ryo ku wa 30 Nzeri 2016.

AIP Musisi James yasezerewe hamwe na AIP Murego Michael, bakaba ari nabo ba Ofisiye babiri bagaragara ku rutonde rw’abacungagereza 52 birukanwe burundu muri RCS muri Kanama uyu mwaka, ku mpamvu zasobanuwe ko zirimo imyitwarire mibi, guta akazi, ibyaha bakurikiranwa n’inkiko, abatorokesheje abagororwa n’ibindi.

Ni ryari umukozi wa leta yirukanwa “nta mpaka”?

Itegeko n°86/2013 ryo kuwa 11/09/2013 rishyiraho sitati rusange igenga abakozi ba leta, riteganya ko umukozi wa leta asezererwa nta mpaka nyuma y’igihe cy’igeragezwa hakozwe isuzumabushobozi bikagaragara ko adashoboye cyangwa iyo afunzwe by’agateganyo mu gihe kirengeje amezi atandatu.

Hari kandi iyo adafite intege cyangwa ubwenge bishobora gutuma asubira ku kazi arangije ikiruhuko kirekire cy’uburwayi giteganywa mu itegeko cyangwa nyuma y’ihagarikwa ry’agateganyo rirengeje igihe cy’amezi atandatu.

AIP Musisi yahinduye dosiye y’imfungwa

AIP James MUSISI w’imyaka 37, wari ‘Greffier’ muri Gereza ya Nyarugenge, muri Gashyantare 2016 yakurikiranyweho n’Urukiko Rwisumbuye rwa Nyarugenge, kuba yarumvikanye n’imfungwa bagahimba incarubanza ndetse umugororwa akarekurwa muri ayo manyanga.

Runiga Jean Paul wari ufungiye muri Gereza ya Nyarugenge, yari yarahamijwe n’Urukiko rukuru icyaha cyo gukora no gukoresha inyandiko mpimbano no kunyereza umutungo, muri Nzeli 2015 akatirwa n’Urukiko Rukuru gufungwa imyaka ine n’ihazabu ya 646.381.068Frw.
Inyandiko y’imikirize y’urubanza rwe igaragaza ko yashatse gusohoka muri gereza, akegera AIP Musisi wakurikiranaga amadosiye y’abagororwa muri iyo gereza, akamuha 300 000 Frw kugira ngo amufashe gusohoka mu barekurwa bagafungishwa ijisho, ‘liberation conditionnelle’.

Musisi n’umuvandimwe wa Runiga ngo bashatse kopi y’urubanza ayisimbuza incarubanza y’ukuri, ashyiramo ivuga ko Jean Paul Runiga ahanishijwe igifungo cy’umwaka umwe n’amezi atandatu n’ihazabu ya 646.381.068 Frw mu gihe urwo rubanza rwari rwarakatiye Jean Paul RUNIGA gufungwa imyaka 4 n’ihazabu ya 646.381.068Frw.

Ayo makuru AIP Musisi yayashyize mu mashini ibika amakuru y’abagororwa, maze imyirondoro ye igaragaza ko agomba gutaha.

Kuwa 22 Werurwe 2016, Jean Paul Runiga bamuhamagaye mu ishami ishami ry’ikoranabuhanga, bamubaza umwirondoro basanga uhura n’uri muri dosiye, bamubwira ko yitegura agataha.

Nyuma byaje kumenyekana ko yatashye atarangije ibihano, batangira kumushakisha ndetse arafatwa.

Abatangabuhamya bakorana na Musisi James basobanuye ukuntu babanje kubura dosiye ya Runiga mu bubiko nyuma Musisi ubwe akaza kubabwira ko yayijyanye hamwe n’izindi muri ICT, bamenya ko ariwe washyizemo inyandiko mpimbano.

Musisi yireguye yemera icyaha asaba kugabanyirizwa igihano ndetse asaba ko gisubikwa.

Jean Paul Runiga yahamijwe ubufatancyaha mu guhimba inyandiko no gutanga indonke kugira ngo hakorwe ikinyuranyije n’amategeko, naho Musisi James ahamwa n’icyaha cyo gukoresha inyandiko mpimbano n’icyo kwakira indonke kugira ngo hakorwe ikinyuranyije n’amategeko.

Mu mwanzuro wo kuwa 22 Mata 2016, Jean Paul Runiga yahise akatirwa gufungwa imyaka 7 n’ihazabu ya 3.000.000 Frw, naho Musisi James ahanishwa gufungwa umwaka umwe n’ihazabu y’amafaranga 600.000 Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza