Kwamamaza

Imvugo ya Minisitiri Uwizeye ku kwihangira umurimo yateje impaka

Yanditswe kuya 27-10-2016 saa 14:57' na IGIHE


Minisitiri w’Abakozi ba Leta n’Umurimo, Judith Uwizeye, akomeje kugarukwaho cyane ku mbuga nkoranyambaga no mu binyamakuru bitandukanye, bamwe bamushinja gushinyagurira abadafite akazi, cyangwa kuvuga ko afite amafaranga menshi nk’umuyobozi.

Imvano ya byose ihera kuwa Mbere tariki 24 Ukwakira, ubwo inzego zirimo Minisiteri y’Urubyiruko n’Ikoranabuhanga n’ishinzwe abakozi ba Leta n’umurimo, zakoranyaga itangazamakuru ngo hasobanurwe byinshi ku bukangurambaga bugamije guhanga imirimo, ‘NEP-Kora Wigire’ bugiye kumara ukwezi.

Abanyamakuru bagarutse ku mpamvu hatabaho ‘Hanga umurimo muyobozi’, bityo ngo aribo [abayobozi] baha akazi urubyiruko kuko rwo nta gishoro rufite.

Minisitiri Judith Uwizeye, yafashe ijambo ati “reka nkisubize mu buryo bwahuranyije ku buryo mutazongera kubisubiramo.’’

Ati “Ninumva nshonje, nshaka amafaranga, nanjye nzagira uruhare mu guhanga cyangwa se mu gushyiraho icyamfasha mu kugira ngo mbone amafaranga, no gufungura. Niba ntarabigeraho nk’umuyobozi ubwo ni uko amafaranga mfite ampagije. Wowe utayafite gira uruhare mu kuyashaka kuko ni wowe bigiriye umumaro. Ntabwo imirimo dusaba urubyiruko ngo muyihange ibe iy’umuyobozi.’’

Minisitiri Nsengimana we yabivuze ukundi

Minisitiri w’Urubyiruko n’Ikorabuhanga, Jean Philbert Nsengimana we yavuze ko abayobozi bagira uruhare mu guhanga imirimo, binyuze mu ngamba n’uburyo bwafasha abaturage bugenda bushyirwaho.

Yagize ati “Hari abazi ko abayobozi batemerewe gushora imari ntabwo aribyo, abayobozi barabyemerewe, icyo batemerewe ni ukujya gucunga ibikorwa by’ubucuruzi bakabibangikanya n’akazi ariko kuba nshobora kugira ubushobozi bwo kuzigama, kugura imigabane cyangwa nkifatanya n’abandi gukora ubucuruzi , ibyo ngibyo ntabwo bibujijwe.’’

Minisitiri w'Urubyiruko n'Ikoranabuhanga, Jean Philbert Nsengimana

Yakomeje agira ati “Ibyo rero ababishoboye barabikora usibye ko nyine batajya kubivuga ngo dore nashoye imari hariya. Ikindi ngira ngo mvuge harimo abatekereza ko abayobozi bagira amafaranga menshi, ntabwo ari cyane buriya…”

Amagambo ya Minisitiri Uwizeye yakuruye impaka

Mu mvugo ze, Minisitiri Uwizeye yashimangiye ko ubuyobozi butagomba gukora nk’uburi “kugabururira umwana utazi kwirisha”, amagambo yazamuye impaka cyane ku mbuga nkoranyambaga, bamwe bakabifata nko kwishongora ndetse bakavuga ko akwiye ‘kwegura’.

Umwe mu bagarutse ku magambo ye ku nkuru yasohote kuri IGIHE uwo munsi, yagize ati “ko uvuga ngo "uzumva akeneye kurya, azafata iya mbere agahanga umurimo’’ gukenera kurya se n’igishoro? Iyo kiza kuba igishoro nta kibazo cy’ubushomeri tuba dufite kuko buri wese abafite icyo gishoro(ntawe udakenera kurya, ndabona n’amazi imbere yanyu).’’

Uwitwa Kunde we wunze mu rya Minisitiri Uwizeye, yavuze ko mu Rwanda hari ibigo by’imari bishobora gufasha abantu kwihangira imirimo, ariko nabyo bitafasha umuntu utagize icyo akora.

Ati “None se muzajya mubyuka mwicaye mwigira beza gusa mutembera mu mihanda mutegereze ko abayobozi baza kubafata akaboko ngo mugane ibigo by’imari cyangwa ngo mubone ko mwese mwakorera Leta. Minisitiri ntacyo yavuze kitari cyo, ushonje niwe ufata iya mbere ngo ashake icyo arya. Barabyigishije , bashyizeho ibigo by’imari, ahasigaye ni ahanyu ngo muhindure imitekerereze kandi mwemere ukuri. Nta muyobozi uzabatamika.’’

Gusa abenshi bagendaga bagaragaza ko imvugo ya Minisitiri Uwizeye itari ikwiriye umuntu w’umuyobozi ku rwego rwe.

Hari uwagize ati “Iyo mvugo ntikwiriye umuntu nkawe ubona uko urubyiruko rwugarijwe n’ibibazo by’ubukene, wakabavugiye none ahubwo ubonye umaze kwaka uti ‘abashonje bazahange imirimo… wagakwiye kuba wegura kuko imvugo yawe si iyo kuyobora mu Rwanda, uzajye kwa Trump.’’

Uwitwa Ndahiro yunzemo agira ati “wowe rindira HE (Perezida wa Repubulika) ave Mozambique”.

Aha ni naho Shinga yanyuze yandika ati “Minisitiri mu kinyabupfura yegure ajye guhanga umurimo, Nisabire nyakubahwa Perezida adushakire minisitiri ufite impuhwe z’abakene kandi witeguye, unazi ko guhanga imirimo biri mu nshingano ze. Murakoze”.

Uwitwa Ngirimana we yifashishije Facebook, avuga ko yagaye ibyoMinisitiri Uwizeye yavuze kubera ko “nawe uwamukura kuri uwo mwanya ariho ntamuhe imperekeza, akamubwira ngo nahange umurimo ntabyo yashobora”.

Ati “Ntabwo ushobora guhanga umurimo ntacyo uheraho, ubundi se ubu uwamubwira ngo nawe ubwe nahange umurimo yahanga uwuhe? ko mbona n’abayafite bari kubura icyo bayakoresha bitewe n’uko ababa bayakeneye ari benshi, yabona nta nyungu akabireka ko no mu buhinzi mbona byazambye ariho benshi bahungiraga mu gihe ahandi byanze!”

Minisitiri Uwizeye yasobanuye ko yashakaga kumvikanisha ko guhanga imirimo bireba buri wese

Naho uwitwa Ngendahayo we yagize ati “Uyu muyobozi azi kuvuga neza kubera ko nawe uwamukura ku kazi akamubwira ngo yishakire umurimo ndatekereza ko atabishobora usibye kuba ahembwa n’abaturage baba baburaye abandi babwiriwe.”

Muri ibyo bitekerezo byagendaga binyuranamo, Habimana Viateur we yavuze ko umurimo udahangwa n’ukeneye kurya gusa cyangwa udafite akazi, ahubwo ushobora guhangwa na buri wese ufite ubushobozi.

Nyuma yo kubona ko amagambo ye yibajijweho na benshi, Minisitiri Uwizeye yifashishije Twitter avuga ko mu bisubizo yatanze “hari ibitarumvikanye neza”.

Ati “Nashakaga gutanga ubutumwa bukurikira: Kumvikanisha ko guhanga imirimo bireba buri wese kandi ko twese hamwe twabigiramo uruhare; kumvikanisha ko guhanga imirimo atari ugutegereza gusa icyo umuntu yakorerwa ahubwo hakabaho gufata iya mbere no kunganirwa aho bishoboka; guhindura imyumvire bikumvikana ko umuntu yagira aho ahera akagenda azamuka, ntihabeho kwisuzugura cyangwa gusuzugura umurimo uwo ari wo wose.’’

Ikigo cy’Igihugu cy’Ibarurishamibare, NISR, kigaragaza ko hifashishijwe ubushakashatsi butandukanye n’ubwari busanzwe bukoreshwa mu gupima uko isoko ry’Umurimo rihagaze mu gihugu, Labour Force Survey (LFS) 2016, impuzandengo y’ubushomeri ari 13.2%.

Guverinoma y’u Rwanda ifite akazi katoroshye ko guhanga imirimo 200 000 ku mwaka, muri urwo rugendo, mu 2014 ikaba yaratangije gahunda ya NEP-Kora Wigire, imaze guhanga imirimo 80 672.

Ibisobanuro bya Minisitiri Uwizeye Judith

Inkuru bifitanye isano: Guhanga imirimo ntabwo ari ku ngufu, ushaka kurya azayihanga- Minisitiri Uwizeye


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved