Kwamamaza

Imwe mu Ntare zajyanwe muri pariki y’Akagera yasanzwe yarapfuye

Yanditswe kuya 16-11-2016 saa 09:50' na Emma-Marie Umurerwa


Imwe mu Ntare ziherutse kujyanwa muri Pariki y’Akagera, iherereye mu Karere ka Kayonza, imaze iminsi ipfuye, ku buryo basanze n’umubiri wayo warashangutse.

Mu kiganiro umuyobozi ushinzwe urwego ruhuza Pariki y’Akagera n’abaturage, Joseph Karama, yagiranye na IGIHE, yemeje ko intare y’ingore yitwa Garuka y’imyaka itanu n’amezi abiri yabaga yonyine mu gihe izindi ziba mu muryango, yapfuye.

Yagize ati “Ntabwo tuzi mu by’ukuri icyishe Garuka, ariko ni urupfu rusanzwe. Kubera ko intare ziba zidegembya muri parike, ishobora nko kujya guhiga isatura ikaba irayikase kubera igikomere ntibashe kujya guhiga. Kandi iyo intare imaze iminsi itanu nta muhigo biba birangiye.”

Yakomeje agira ati “Hari urunigi rukoreshwa n’ikoranabuhanga twambika intare kugira ngo tubashe kumenya aho iherereye, twabonye rero urunigi rutava aho ruri, dutangira gukora iperereza, tuza gusanga yarapfuye umubiri wayo warashangutse bigaragara ko yari imaze nk’ukwezi cyangwa amezi abiri ipfuye.”

Karama yakomeje avuga ko nyuma y’urupfu rwa Garuka, muri Pariki y’Akagera hasigaye intare nkuru esheshatu n’abana icyenda.

Nyuma ya Jenoside yakorewe Abatutsi 1994, intare zari ziri muri pariki y’Akagera zagiye zicwa n’abaturage bikangaga ko zabagirira nabi, bigira n’ingaruka ku mubare w’abasura iyi pariki wagiye ugabanuka.

Mu mwaka ushize Ikigo cy’Igihugu cy’Iterambere, RDB, gifatanyije na ‘African Parks’ cyagejeje mu Rwanda intare zirindwi zirimo iz’ingore eshanu n’izingabo ebyiri, zivuye mu Ntara ya ‘Kwa Zulu-Natal’ mu Majyepfo ashyira u Burasirazuba bwa Afurika y’Epfo muri gahunda yo kugarura izi nyamaswa muri Pariki y’Akagera.

Ubuyobozi bwa Pariki y’Akagera butangaza ko nyuma y’amezi make gusa izi ntare zigaruwe, ba mukerarugendo bayisura bahise biyongereyeho 23%.

Imwe mu ntare zajyanywe muri iyi pariki ngo basanze imaze iminsi myinshi ipfuye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved