Ingabire Immaculée yasobanuye uko ‘abanyarwanda baciye ubutabera amazi’

Yanditswe na IGIHE
Kuya 23 Ukwakira 2017 saa 12:47
Yasuwe :
0 0

Umuyobozi wa Transparency International Rwanda, Ingabire Marie Immaculée, asanga muri iyi minsi abanyarwanda barimo guca amazi ubutabera kugera n’aho umuburanyi ahagarara imbere y’umucamanza akamubwira uko yishakiye nk’aho baganirira mu kabari cyangwa mu muhanda.

Mu kiganiro cyatambutse mu mpera z’icyumweru kuri RBA, Ingabire, yagarutse ku byemezo by’inkiko muri iki gihe, anenga uburyo hafungwa abantu bataregwa amafaranga naho abaregwa menshi bakarekurwa ngo bakurikiranwe bari hanze.

Aha niho yashingiye avuga ko abantu basigaye barasuzuguye ubutabera kugera no ku rwego rwo kumva ko n’amakosa bakoze ari ibisanzwe. Yatanze urugero rwa Perezida wa Ferwafa, Nzamwita Vincent de Gaulle, uherutse kubwira urukiko rwisumbuye rwa Nyarugenge ko adakwiye kubazwa amakosa y’abakozi be ngo ni uko yasinye.

Yagize ati “Wowe uri umuyobozi warasinye, uhagaze imbere y’umucamanza wambaye ‘Toge’ ari mu kazi ntabwo muriho muganira mu kabari cyangwa mu muhanda, muri mu rukiko ukavuga uti ‘sinumva uburyo nabazwa amakosa y’abakozi banjye kuko nasinye gusa.”

Ingabire yakomeje avuga ko kuba inkiko zirekura umuntu wakoze amakosa akomeye agakomeza kwidegembya ndetse akabona n’umwanya wo kubyaza umusaruro umutungo yarigishije, bituma abanyarwanda baca ubutabera amazi.

Yagize ati “Iki gihita kinyereka ngo Abanyarwanda ubutabera turiho turabuca amazi, ubundi ntabwo wajya imbere y’ubutabera ngo uvuge gutyo, ntabwo bibaho ntabwo bikunda ariko akabivuga akongera akisohokera yemye akurira indege akajya kwigurira amakaro yo kubaka amahoteli ukayoberwa niba ari Perezida cyangwa undi muntu.”

Muri Kamena uyu mwaka nibwo Urukiko rw’Ibanze rwa Nyarugunga rwagize umwere Nzamwita Vincent De Gaulle, ku byaha bishingiye ku itonesha, icyenewabo mu gutanga isoko ryo kubaka hoteli y’inyenyeri enye ya Ferwafa.

Icyo gihe urukiko rwasanze ko ibiregwa Nzamwita bitakwitwa gutonesha, ruvuga ko nta bufatanyacyaha mu guhombya umutungo ufitiye rubanda inyungu yakoze kuko atasinye ku masezerano abigambiriye.

Umuyobozi wa Transparency International Rwanda, Ingabire Marie Immaculée

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza