Ingoro y’Inteko Ishinga Amategeko yahinduwe urwererane (Amafoto)

Yanditswe na Rabbi Malo Umucunguzi
Kuya 21 Gicurasi 2019 saa 09:34
Yasuwe :
0 0

Hashize iminsi ingoro y’Inteko Ishinga Amategeko y’u Rwanda ivugururwa, mu gihe yari imenyerewe mu isura isa n’igitaka noneho yasizwe irangi ry’umweru, ku buryo iyo uyitegereje aho waba uri hose ubona yahindutse urwererane.

Iyi ngoro ibitse amateka akomeye cyane ko mbere gato ya Jenoside yakorewe Abatutsi mu 1994, ubwo hasinywaga amasezerano ya Arusha hagati ya FPR Inkotanyi na Guverinoma ya Perezida Juvenal Habyarimana, hemejwe ko abasirikare ba FPR bagera kuri 600 binjira mu Rwanda bijyanye na gahunda yo gusaranganya ubutegetsi n’ingabo.

Umujyanama wa Perezida wa Repubulika mu bya gisirikare n’umutekano, Gen James Kabarebe, aheruka kuvuga ko Leta yariho yashakaga ko abo basirikare ba FPR bajya i Mburabuturo cyangwa i Kami, ahantu bashakaga kuzabamarira babarashe. Bo barabyanze bahitamo muri CND kuko yari inyubako ikomeye.

Gen. Maj. Charles Karamba uyobobora Umutwe w’Ingabo zirwanira mu kirere, mu gihe cya Jenoside yari kapiteni akaba n’umwe mu basirikare 600 ba FPR Inkotanyi bari muri CND.

Yigeze kuvuga ati “Nyuma y’iminota nk’ine gusa indege ya Habyarimana imaze kuraswa mu ijoro ryo kuwa 6 Mata 1994, abasirikare ba leta bari i Kanombe batangiye kuturasaho ndetse n’abari ku Kacyiru bose bafatanya kuturasa.”

Icyo gihe ngo bafashijwe n’imbunda nini igaragara hejuru y’ingoro y’Inteko ishinga amategeko, yakoreshwaga n’abasirikare barimo David Rwabinumi icyo gihe wari sergeant n’ubu ukiriho.

Uyu munsi iyo witegereje ingoro y’Inteko Ishinga Amategeko ubona aho ibisasu yagiye iterwa byapfumuye n’aho amasasu yagiye afata. Iyi nyubako kandi iheruka gufungurwamo Ingoro y’Amateka y’urugamba rwo guhagarika Jenoside, yatashywe na Perezida Kagame mu 2017.

Umuyobozi w’Ishami rishinzwe Iyegera ry’abaturage mu Nteko Ishinga amategeko, Nzeyimana Cleophas, yavuze ko guhindura isura y’iyi ngoro ari mu rwego rw’isuku, ko ibijyanye n’amateka nta na kimwe kizabangamirwa.

Ati "Icyavuguruwe ni irangi, kandi irangi ni isuku. Iyo rero ubonye irangi ririho rishaje urarisimbuza ugashyiraho irindi, ibyo nta kidasanzwe kirimo."

"Hariya ntacyo hazakorwaho ntabwo hazahindurwa, hariya hagiye haterwa ibisasu hagatoboka, hagakomereka bikagaragara, nta rangi rizasigwamo ku buryo hasibangana, hazaguma kuriya ku buryo hazakomeza kugaragarira buri wese."

Iyi ni inyubako imaze igihe kuko Ingoro y’Inteko Ishinga Amategeko y’u Rwanda yatangiye kubakwa mu 1980, ikuzura mu 1989.

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza