Ingoyi y’ubushomeri mu bihangayikishije urubyiruko

Yanditswe na Evariste Nsengimana
Kuya 13 Kanama 2017 saa 07:27
Yasuwe :
0 0

Bimwe mu bigarukwaho kenshi mu bihangayikishije urubyiruko hakunze kuvugwa cyane ibura ry’akazi nka kimwe mu birubuza amahoro; iki kibazo cyanagaragajwe n’urubyiruko ruhagarariye urundi rusaga 80 ruhurizwa hamwe n’umuryango Never Again Rwanda, rukangurirwa gufatanya no gutinyuka kugira ngo rubashe kubona icyo rukora.

Ibarura rya Kane ku mibereho y’ingo mu Rwanda (EICV 4) ryagaragaza ko ubushomeri mu Rwanda buri kuri 2% muri rusange ariko bukaba kuri 13.5% mu barangiza amashuri makuru na za kaminuza.

Iki kibazo cy’ubushomeri cyagarutsweho kuri uyu wa 12 Kanama 2017 ubwo urubyiruko rwizihizaga umunsi mpuzamahanga w’urubyiruko.

Muri ibi biganiro, urubyiruko rwagarutse cyane ku mbogamizi rukunze guhura nazo iyo rugerageza kwihangira umurimo cyangwa gusaba akazi birimo kwitinya, imyumvire, icyenewabo n’ibindi, bikarubera intandaro yo kudatuza no kubura amahoro.

Uwitwa Niragire Denise akurikije ubutumwa buhamagarira urubyiruko kwitinyuka, yagaragaje ko rufite amahirwe rudakwiye gupfukirana.

Yagize ati “Urubyiruko turebe ko abantu bose badukeneye kuko dufite imbaraga n’impano zitandukanye duhurize hamwe, buri wese atekereze byimbitse bidufashe kubaka igihugu cyacyu.”

Uwase Berinda yavuze ko bimwe mu bibazo urubyiruko rwinshi rufite ari kutigira cyizere kandi ko ruhura n’ibibazo bitewe n’uko rurangiza kwiga rwizeye ko ruzahabwa akazi.

Yagize ati “Impamvu ya mbere, bamwe baricara babona mugenzi wabo biganye abonye akazi bagatangira kuvuga ngo ni amahirwe yagize cyangwa yagahawe na mwene wabo. Ibyi sibyo, buri wese agira amahirwe ye, buri wese akwiye kwigirira icyizere. icya kabiri tukibona nk’imbogamizi, umuntu arangiza kwiga akumva ko kubera ubumenyi afite arahita abona akazi. rukwiriye kwihangana, rukanigirira icyizere kandi rukamenya ko rugomba guharanira kugira aho rwigeza.”

Never Again Rwanda yibukije urubyiruko ko rudakwiye gutegereza ko amahirwe arusanga ahubwo rukwiye guhaguruka rukishakishiriza.

Umuyobozi w’Inama y’ubutegetsi akaba n’umwe mu bashinze umuryango Never Again Rwanda, Albert Nzamukwereka, yasabye urubyiruko gufatanya kugira ngo rwikure mu bibazo birwugarije.

Yagize ati “Reka mpere ku bufatanye, mu Kinyarwanda bavuga ko umutwe umwe wifasha gusara. Iyo turi mu bintu bitugoye nk’ibi, ubufatanye rero, nibwo butuma abantu batera imbere. Abesnhi twicwa no kumva ko tugomba gukora akantu kacu ku giti cyacu. Ukumva ko ugomba kugira akarima kawe, ukakagumaho ntunatere imbere.”

Yakomeje avuga nta kintu na kimwe umuntu yakora adahuye n’imbogamizi, ariko iyo hari ubufatanye, umwe abasha kuzamura mugenzi we wananiwe.

Yongera ati “Nagira ngo mbakangurire gufatanya, mukore amatsinda, mukore ubucuruzi. Hitamo neza inshuti cyangwa abafatanyabikorwa mufatanya urugendo. Umuntu ntiyigira. Icya kabiri, ntekereza ko byose bihera mu muryango aho turi. Ntiwabura kuvuga ko dufite umutekano mu Rwanda, ni ikintu gikomeye ariko gikenera n’amahoro yo mu mutwe.”

Never Again Rwanda, ni umuryango uharanira kubaka amahoro no kurwanya icyatuma hongera kubaho Jenoside.

Umuyobozi w'Inama y'fubutegetsi ya Never Again Rwanda, Nzamukwereka Albert
Urubyiruko mu kwizihiza umunsi mpuzamahanga warugenewe
Urubyiruko rwakanguriwe kutitinya rukwihangira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza