Inkomoko y’izina ‘Mvuzo’, umusozi waguyeho Abatutsi barenga ibihumbi bitandatu

Yanditswe na Habimana James
Kuya 4 Kamena 2019 saa 12:04
Yasuwe :
0 0

Mvuzo ni umusozi uherereye mu Kagari ka Mvuzo Umurenge wa Murambi mu Karere ka Rulindo Intara y’Amajyaruguru. Abawutuye bavuga ko ufite amateka meza mbere ya 1959 n’amabi yo kwicirwaho Abatutsi benshi mu gihe cya Jenoside.

Mu bazi umuhanzi Munyanshoza Dieudonne uzwiho kuririmba indirimbo zo kwibuka Jenoside yakorewe Abatutsi, birumvikana ko bazi indirimo ‘Imfura zo ku Mugote’, aho aba aririmba uyu musozi wa Mvuzo.

Mu gihe cya Jenoside yakorewe Abatutsi, uyu musozi waguyeho Abatutsi batari bake, ibintu byatumye uhabwa urwibutso rushyinguwemo 6695.

Uwemeyinkiko Ladislas uri mu kigero cy’imyaka 70, yavukiye muri aka gace, iyo asobanura amabi yabereye Mvuzo agaragaza ko abatutsi bari bahatuye bishwe n’abasirikare ba Perezida Habyarimana bitwaga Abazulu hamwe n’Interahamwe zari zaratojwe kwica kandi vuba.

Mu gusobanura inkomoko ya Mvuzo, Uwemeyinkiko agira ati “Impamvu yatumye bawita Mvuzo, kera hari abantu baturukaga ku musozi wa Kinzuzi nawo wari uturanye na Mvuzo, murabizi ko abantu ba kera basabanaga cyane, hano iwacu rero habaga ibigage byiza kandi byinshi noneho abo ku yindi misozi bakabiha abakozi babo bakazimanira bene wabo ba hano kuri uyu musozi wa Mvuzo.”

Yavuze ko abo bakozi bamaraga kubiha abo babatumyeho mu gihe bagiye gusubirayo bagasanga babasigiyemo nk’uruho.

Ati “Bagera hejuru kuri uyu musozi wa Mvuzo barimo gutaha bagakoresha imiziranyenzi n’imiheha miremire bakanywa ya nzoga babasigiyemo, bayirangiza bya bivuzo bakabisuka ku nzira. Habaga inyoni nyinshi nazo zikahateranira zikaza kurya bya bivuzo, aho rero niho havuye izina Mvuzo kuko abantu bazaga bakahasanga inyoni nyinshi ziri muri bya bivuzo.”

Nubwo uyu musozi ufite amateka meza yarangaga abari bahatuye, mu gihe cya Jenoside habereye amahano akomeye.

Uwemeyinkiko yavuze ko mu gihe cya Jenoside kuri uyu musozi habereye urugamba rutoroshye aho abasore b’Inkotanyi barwanye n’Interahamwe ndetse n’abasirikare benshi ba Habyarimana.

Ati“Mu gihe cyose ingabo za Habyarimana zatsindwaga mu gihugu bose bazaga kuri uyu musozi kuko wari muremure, bari bahafite imbunda nyinshi kandi zirwanishwa n’abasirikare b’abahanga, hari abasirikare bitwaga Abazulu, abo basirikare bari bakomeye kandi ari indobanure mu kurwana, Abatutsi bo bari kuri uyu musozi barahashiriye kuko barabagose ntibabona uko bahunga.”

Yavuze ko mu gihe cya Jenoside muri aka gace hari Interahamwe zatojwe neza no kurusha abasirikare, ku buryo zari zizi gutera ibyuma mu buryo budasanzwe. Mu guhunga, ngo abatutsi barirukaga ariko ugasanga interahamwe zizi gutera ibyuma na ba bandi barimo kwiruka bagapfa.

Umusozi wa Mvuzo washyizweho urwibutso kubera amahano yahabereye nubwo mbere wari umusozi urangwaho ubusabane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza