Kwamamaza

Inkundura ya ba Gitifu mu kwegura ihatse iki? Ese baregura cyangwa bareguzwa?

Yanditswe kuya 25-10-2016 saa 12:27' na Ntakirutimana Deus


Abanyamabanga Nshingwabikorwa basaga 40 bamaze kwegura mu gihe kitageze ku kwezi. Ni ubwa mbere bibaye mu Rwanda, byatumye haduka urujijo hibazwa icyaba kibyihishe inyuma.

Abegura bavuga ko basezeye ku kazi ‘ku mpamvu zabo bwite’, dore ko ngo batanegura kuko hegura uwagiye ku mwanya runaka atowe n’abaturage, ahubwo ko abandi bo basezera.

Gusa Perezida wa Repubulika Paul Kagame yigeze kuvuga ko icyo abayobozi beguye bita impamvu zabo bwite kitabaho, ahubwo aba ari ukubera amakosa baba bakoze.

Abasezeye n’abasezerewe…

Mu Ntara y’Amajyepfo, harimo batatu bo mu Karere ka Nyamagabe, babiri bo muri Gisagara mu Mirenge ya Gikonko na Muganza, babiri ba Nyaruguru, Kamonyi hasezeye umwe, mu gihe mu Karere ka Ruhango ari babiri bo mu Mirenge ya Ruhango na Ntongwe.

Mu Mujyi wa Kigali, muri Kicukiro hasezeye Abanyamabanga Nshingwabikorwa b’Imirenge ya Niboyi na Gahanga. Muri Nyarugenge ni ab’ Imirenge ya Mageragere, Nyamirambo, Kanyinya na Rwezamenyo.

Mu Ntara y’Amajyaruguru ni ab’ Imirenge ya Musanze na Shingiro muri Musanze, imirenge ine yo muri Rulindo n’ine yo muri Gakenke.

Mu Ntara y’i Burasirazuba, muri Nyagatare harimo ab’imirenge ya Gatunda, Rwimiyaga na Musheri.

Mu Ntara y’Iburengerezuba hasezeye abo mu Mirenge ya Gashonga, Nkungu, Butare na Nkombo mu Karere ka Rusizi ndetse n’uwari ushinzwe ishami rya BDE ku rwego rw’akarere wahoze ari Umunyamabanga Nshingwabikorwa w’Umurenge wa Nyakarenzo.

Icyo gihe , Umuyobozi w’Akarere ka Rusizi, Frédéric Harerimana, yabwiye IGIHE ko yakiriye amabaruwa y’aba Banyamabanga Nshingwabikorwa b’iyi mirenge avuga ko beguye ku mpamvu zabo bwite. Gusa akomokaz ku bivugwa.

Ati “Imirenge bagiye bayobora habayemo ibibazo by’imicungire mibi ya VUP. Bashobora kuba babona ko iyo micungire itabaye myiza bakabona ko batagifite impamvu zo gukomeza kuyobora bityo bagahitamo kwegura.”

Imvano y’iryo sezera ubutitsa

Amakuru agera kuri IGIHE ni uko hari igenzura ryakozwe mu mirenge yose bikagaragara ko hamwe hari ibitagenda, abahayobora bakaba ari bo batangiye gusezera kuri uwo mwanya.

Bivugwa ko mu byagenzurwaga harimo imitangire ya gahunda ya Girinka, uburezi; ibijyanye n’abana bataye ishuri n’impamvu, ubuhinzi n’ubworozi, imitangirwe y’ifumbire n’ibindi.

Iryo genzura rimaze gukorwa, ngo abatarabaye miseke igoroye mu byagenzurwaga bagombaga kugawa mu bijyanye n’akazi ndetse no guhanwa mu bundi buryo.

Ni muri urwo rwego bamwe batangiye kwandika bava kuri uwo mwanya kugira ngo birinde ibihano bahabwa bikabagiraho ingaruka mu kazi ka leta.

Mu basezera kandi harimo abakekwaho n’ibyaha by’ingengabitekerezo ya Jenoside, ku buryo bishoboka ko Umunyambanga Nshingwabikorwa kanaka yakwegura, ejo cyangwa ejo bundi agakurikiranwa bitewe n’ibyaha bikomeye akekwaho muri izo gahunda zose zagenzuwe.

RALGA yagize icyo ibivugaho

Ibijyanye n’Abanyamabanga Nshingwabikorwa b’Imirenge bibazwa ubuyobozi bw’akarere cyangwa Ishyirahamwe ry’ Uturere n’ Umujyi wa Kigali mu Rwanda (RALGA) muri rusange.

Mu kiganiro IGIHE yagiranye n’Umunyamabanga Nshingwabikorwa wa RALGA, Rugamba Egide, yavuze ko abo Banyamabanga Nshingwabikorwa bamaze gusezera, babikoze ku bushake bwabo.

Rugamba yavuze ko kuyobora umurenge bisaba ibintu bitatu, birimo ubushake, ubushobozi n’ubunyangamugayo, ku buryo ngo iyo hagize ikiburamo ibintu bipfa. Ati “Iyo kimwe muri byo kibuze ntabwo akazi kagenda neza.”

Ku gitera abo bayobozi gusezera umusubirizo, yavuze ko nta kimenyetso cy’impamvu zirimo kubitera, ariko ngo bishobora kuba biterwa n’imicungire mibi yagaragaye kuri bo muri gahunda zigamije guteza imbere abaturage zirimo, VUP, Ubudehe, Girinka ndetse na mituweli.

Yavuze ko ibyo bibazo byakunze kugaragazwa n’inzego zitandukanye zirimo, abadepite muri PAC n’abandi bayobozi batandukanye, bagaragaje ko izo gahunda zitacunzwe neza.

Ku bijyanye n’abavuga ko umutima w’abandi Banyamabanga Nshingwabikorwa b’Imirenge ishobora kuba itari hamwe kubera bagenzi babo barimo gusezera, Rugamba yavuze ko uwumva yarakoze neza nta kibazo yagombye kugira, kuko umutima we nta rubanza umucira.

Muri rusange ngo isezera ry’abo bayobozi nta gikuba cyacitse, imyanya yabo izashyirwa ku isoko n’uturere, hatoranywe ababasimbura biciye mu bizamini.

Umunyamabanga Nshingwabikorwa wa RALGA, Rugamba Egide

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved