Intare ntabwo ikunda kwanduranya – Perezida Kagame

Yanditswe na Rabbi Malo Umucunguzi
Kuya 23 Kanama 2018 saa 07:06
Yasuwe :
1 0

Perezida Paul Kagame yibukije abaturage b’Akarere ka Gisagara gukoresha imbaraga bakiyubakira igihugu kandi bakarinda ibyo bubaka, yifashisha urugero rw’Intare igaragara mu kirango cya FPR Inkotanyi.

Perezida Kagame akaba na Chairman wa FPR Inkotanyi, yabigarutseho kuri uyu wa Kane ubwo yari mu gikorwa cyo kwamamaza abakandida-depite 80 ba FPR-Inkotanyi n’imitwe ya politiki bishyize hamwe.

Bari mu rugendo rwo guhatana mu matora azaba ku wa 2-3 Nzeri 2018.

Guverineri w’Intara y’Amajyepfo, Mureshyankwano Marie Rose, yabanje kugaraga ko Akarere ka Gisagara gahana imbibi n’u Burundi, kari karasigaye inyuma ariko ubu byahindutse.

Yagize ati “Aka karere kasaga n’akahejejwe inyuma n’amateka, abaturage bako bafite imyumvire iri hasi cyane ku buryo agakomye kose birukankaga bajya mu bihugu by’abaturanyi, ariko uyu munsi baratuje, baratekanye, bari kwiteza imbere.”

Perezida Kagame yagarutse kuri iyo ngingo y’uburyo abatuye Gisagara bari barihebye, ariko avuga ko hari ubwo umuntu yambuka umupaka ajya ahantu hari inyuma y’aho avuye.

Yakomeje agira ati “Twe rero hakurya y’imipaka ntabwo tuhashinzwe, hafite ba nyiraho. Aho dushinzwe ni iwacu, reka dutunganye iby’iwacu, dutere imbere, tureke kwirirwa dutega amatwi abandi ibyo batuvuga, twe turebe ibyacu. Ndetse si ugutegura kubitunganya no kubiteza imbere gusa, twitegure no kubirinda igihe bibaye ngombwa.”

Yahise atanga urugero ku Intare, yifashisha igaragara mu kirangantego cya FPR Inkotanyi, avuga ko nubwo ari kenshi igaragara nk’isinziriye, ari urugero rwiza rwo kurinda kandi nta we wanduranyijeho.

Yakomeje agira ati “Irisinzirira ndetse ubukoko bumwe bukajya buza bukayijomba, bwibwira ngo irasinziriye, ndetse Intare nayo ikabwirengagiza, rimwe na rimwe igakomeza kwirigata iminwa izi ngo aho iri bubishakire irabwiyunyuguza. Ubundi Intare ntabwo ikunda kwanduranya, ntabwo ari ngombwa.”

“Ntabwo rero twanduranya ariko si ngombwa ko abantu batwanduranyaho, twe imbaraga zacu zose tuzishyire mu kwiyubaka no kurinda ibyo twubaka.”

Perezida Kagame yagaragaje ko mu gihe abaturanyi babanye neza, habamo inyungu.

Yakomeje agira ati “Uwatubera mwiza twakorana, twahahirana, twe nta kibazo dufite kuri ibyo kuko bigira n’inyungu. Iyi uturanye n’umuntu mukavugana, mugakorana, mugahahirana, ni inyungu.”

Yibukije abaturage ba Gisagara ko nubwo baturiye imipaka, ibyo bakiriho inyuma atari uko bibagiranye, ahubwo ibitarabageraho nabyo bizaza.

Muri aya matora, FPR ifite abakandida 70 n’icumi baturuka mu yindi mitwe ya poltiki itandatu yemereye ubufatanye. Iyo ni PDI, PSR, PDC, PPC, UDPR na PSP.

Abaturage ba Gisagara bagaragaje urugwiro bafitiye Perezida Kagame
Senateri Tito Rutaremara yitabiriye ibikorwa byo kwamamaza abakandida ba FPR Inkotanyi i Gisagara
Umunyamabanga Mukuru w’Umuryango wa FPR Inkotanyi, Ngarambe François, nawe yari i Gisagara
Minisitiri w'Ingabo Gen James Kabarebe yaherekeje Umukuru w'Igihugu mu kwamamaza bakandida ba FPR Inkotanyi
Bacinye n'akadiho
Amashyaka yifatanyije na FPR-Inkotanyi yari yabukereye
Guverineri w'Intara y'Amajyepfo Mureshyankwano Marie Rose yasabye abaturage kuzatora abakandida ba FPR Inkotanyi
Abayobozi b'amashyaka yifatanyije na FPR Inkotanyi mu matora y'Abadepite
Perezida Kagame yagaragaje ko Intare ari urugero rwo kurinda ntawe uhutaje
Perezida Kagame yibukije abatuye Gisagara guharanira kurinda ibyo bageraho, ibyo hakurya y’igihugu bakabirekera abaho
Guverineri w'Intara y'Amajyepfo Mureshyankwano Marie Rose yasabye abaturage kuzatora abakandida ba FPR Inkotanyi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza