Inteko yasabye Minijust gukora urutonde rw’abahamwe n’icyaha cya Jenoside bakidegembya

Yanditswe na Ndayishimye Jean Claude
Kuya 20 Mata 2018 saa 05:17
Yasuwe :
0 0

Inteko Ishinga Amategeko, Umutwe w’Abadepite, wasabye Minisiteri y’Ubutabera (Minijust) gukora urutonde rw’abahamijwe ibyaha bya Jenoside n’inkiko Gacaca ntibahanwe, bakaba bidegembya hirya no hino kugira ngo babashe gufatwa.

Iyi ngingo yagarutsweho ubwo Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside yagezaga raporo ku nteko rusange ku isesengura rya raporo y’ibikorwa bya CNLG ya 2016-2017.

Umwanzuro w’inteko rusange wafashwe kuri icyo kibazo cy’abakoze jenoside bakidegembya uragira uti “Minisiteri y’Ubutabera irasabwa gukora urutonde rw’abahamwe n’icyaha cya Jenoside yakorewe Abatutsi muri buri karere batarahanwa rugatangazwa inzego zose zigafatanya kureba uko bafatwa bakarangiza ibihano bakatiwe.”

Kugeza ubu nta mubare w’abahamwe n’ibyaha bya jenoside uzwi.

Mu mpera z’Ukwakira 2010, ubwo CNLG yagezaga raporo ku nteko rusange y’abadepite, Perezida w’Inama y’abakomiseri yayo, Dr Havugimana Emmanuel yavuze ko inzego zitandukanye zikwiye kureba uburyo ikibazo cy’abahamijwe ibyaha bya Jenoside bidegembya bafatwa.

Yagize ati “Hari umubare munini w’abakatiwe na Gacaca batarafatwa. Icyo kibazo kirahari pe. Icyo kirahari muri raporo murabisangamo, hari abantu bagiye batubwira bati ‘kanaka wo mu Karere ka Ruhango tuzi neza ko ari mu Karere ka Nyagatare, ajya agira atya akanyaruka akaza kureba ibintu bye biri aha ngaha, kandi yakatiwe imyaka 19 none ntiyigeze afatwa ntiyigeze ahanwa’.”

Uyu muyobozi yavuze ko hari urugero yahawe aho umumotari yabonye umuntu wo mu muryango yishemo umuntu agata moto agakizwa n’amaguru.

Yagize ati “Barahari muri Kigali aha ngaha benshi rwose, munaganiriye n’abaturage banyuranye hirya no hino mu turere bazabibabwira bati ‘kanaka yagiye i Kigalib kuko mu mujyi ari ahantu umuntu ajya ntamenyekane akivanga n’abandi, akaba yafata n’ibindi byangombwa, akiyita irindi zina’, ntabwo ari ibintu bitangaje.”

Muri Mutaramba 2017, Umunyamabanga Nshingwabikorwa wa CNLG, Dr Bizimana Jean Damascene , yabwiye abasenateri ko mu makuru bagiye bahabwa n’uturere byagaragaye ko abo bantu bakunze guteza umutekano muke aho baba barimukiye.

Byongeye ngo bava mu karere kamwe bakajya mu kandi, kandi nyamara bashakishwa n’inzego z’ubushinjacyaha. Bityo Dr Bizimana abwira abasenateri ko ari ibyo kwitabwaho.

Muri Werurwe 2005 ni bwo inkiko Gacaca zatangiye kuburanisha abakekwagaho kugira uruhare muri Jenoside yakorewe Abatutsi, zisoza imirimo yazo muri Kamena 2012 zimaze guca imanza zisaga miliyoni ebyiri.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza