Intumbero za Mugabe, umusirikare w’Umunyarwanda wasoje amasomo muri West Point muri Amerika

Yanditswe na IGIHE
Kuya 22 Gicurasi 2019 saa 08:00
Yasuwe :
0 0

Ku wa 25 Gicurasi, abasore n’inkumi barenga 1000 bazarangiza amasomo y’ibanze ya gisirikare mu ishuri rya Leta Zunze Ubumwe rizwi nka West Point, barimo n’Umunyarwanda witwa John Mugabe.

Ni umwaka w’amateka muri iri shuri rikomeye ritanga amasomo ya gisirikare aho bwa mbere kuva ryashingwa, abakobwa 34 b’abirabura basoje amasomo yabo. Nta yindi nshuro ibi byari byarabayeho kuva mu 1802 ryashingwa.

Ni ishuri ryizwemo n’abantu bakomeye mu mateka y’Isi kandi mu ngeri zitandukanye, yaba abanyemari nka Robert Alan McDonald; Umunyamabanga wa Leta Zunze Ubumwe za Amerika, Mike Pompeo; Buzz Aldrin wagiye ku kwezi mu 1969; Dwight D. Eisenhower wabaye Perezida wa 34 wa Leta Zunze Ubumwe za Amerika; Fidel V. Ramos wabaye Perezida wa Philippine, José María Figueres wabaye Perezida wa Costa Rica n’abandi.

Abasoje amasomo bazahabwa impamyabushobozi zabo mu muhango uzaba ku wa Gatandatu tariki 25 Gicurasi nyuma y’ibyumweru 47 by’amasomo akarishye.

Visi Perezida wa Leta Zunze Ubumwe za Amerika, Mike Pence, niwe uzayobora uyu muhango wo gutanga impamyabushobozi ku banyeshuri basoje amasomo yabo.

Umunyarwanda John Mugabe ni umwe mu bagiye guhabwa impamyabumenyi. Yatangaje ko yahisemo kujya kwiga muri West Point kuko ari ishuri ryigisha ibijyanye n’imirwanire ariko rigatanga n’ubumenyi bufasha umuntu kumenya indi myuga.

Ati “ Nahisemo West Point kuko itanga ubumenyi mu mirwanire n’ubumenyi bwo mu ishuri. Ndashaka kuzaba umusirikare w’Igisirikare cy’u Rwanda, RDF, gifite amateka meza ahambaye, nashakaga kandi kuba umu-enjeniyeri.”

Mugabe yavuze ko ubu yaminuje mu bijyanye na civil engineering ndetse akaba ari n’umusirikare, yizeye ko ubumenyi akuye muri iri shuri buzamufasha gukora ibintu bigirira abandi akamaro.

Ati “Amasomo ya gisirikare nabonye azaba ingenzi cyane ku gisirikare ninsubira mu rugo. Hari ibintu byinshi Igisirikare cya Amerika gikora kandi cyigisha ntekereza ko nzasubirana mu rugo, nkasangiza ndetse nkubaka igisirikare cyacu.”

John Mugabe yishimira ubumenyi yaherewe muri West Point mu myaka ine amazeyo

Abanyeshuri mpuzamahanga basoje amasomo muri uyu mwaka muri iri shuri, baturuka mu bihugu 10 aribyo Bangladesh, Guyana, Malaysia, Mongolia, Montenegro,u Buholandi, Pakistan, Philippine, Romania n’u Rwanda aho bagomba guhita basubira mu bihugu byabo bagatanga umusanzu mu iterambere ryabyo.

Amasomo bakoze arimo ingeri zitandukanye yaba ajyanye n’ibya gisirikare nko gukoresha intwaro n’ubundi bwirinzi bufatiye ku bushobozi bw’umubiri mu mirwanire ndetse banigigishwa n’ayo mu ishuri bitewe n’icyo umunyeshuri yiyumvamo.

Akenshi kugira ngo nk’umunyeshuri w’umunyarwanda ajye kwiga muri iri shuri rya mbere rikuze mu mateka ya Amerika, ryanareze benshi mu barwanye intambara zombi z’Isi, yoherezwa n’Igisirikare cy’u Rwanda ku myanya iba yatanzwe.

Hari n’abandi banyarwanda boherezwa mu yandi mashuri akomeye ya gisirikare hirya no hino ku Isi nko mu Ishuri rya Gisirikare ry’Ubwami mu Bubiligi, muri Tanzania, muri Kenya n’ahandi.

Mu 2017, Umunyarwandakazi Agnes Mutoni yabaye uwa mbere urangije amasomo mu Ishuri rya Gisirikare rya Leta Zunze Ubumwe za Amerika ryigisha ibyo kurwanira mu kirere.

Inshuro nyinshi, Perezida Kagame yakunze gusura West Point ndetse akahatangira imbwirwaruhame zitandukanye. Nko mu 2010 na 2013 yabwiye abanyeshuri baryigagamo ko bagomba gusigasira umutekano kuko iyo hari umutekano muke mu gihugu kimwe, bigira ingaruka no mu kindi.

Yabasabye kurwanya ibikorwa by’iterabwoba n’ibindi bibangamiye umutekano muri iki gihe.

John Mugabe (wa kabiri iburyo) muri Gashyantare yitabiriye ibirori byari byateguwe n'iri shuri bizwi nka '100th night' bikorerwa abarangije amasomo
We na mugenzi we Caleb Gage bigana, mu 2016 baje mu Rwanda mu bushakashatsi, baboneraho n'umwanya wo gusura ibice bitandukanye by'igihugu birimo Pariki y'Akagera
Agnes Mutoni mu 2017 yasoje amasomo mu ishuri rya gisirikare rya Leta Zunze Ubumwe za Amerika ry'Ingabo zirwanira mu kirere
Bwa mbere mu mateka y’iri shuri, abakobwa bafite inkomoko muri Afurika bagiye gusoza amasomo ari benshi kurusha izindi nshuro
Abanyeshuri bagera ku 1000 nibo bagiye gusoza amasomo
Iri shuri ritanga imyitozo ikarishye ku buryo abasirikare baryizemo baba bafite ubuhanga buhambaye
Bigishwa amayeri menshi y'urugamba
Ku munsi wo gusoza amasomo, aba ari ibyishimo kuri aba basirikare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza