Urugendo rwa Uwizeyimana wababariye uwamwiciye umuryango muri Jenoside

Yanditswe na Prudence Kwizera
Kuya 17 Gashyantare 2017 saa 04:22
Yasuwe :
0 0

Immaculẻe Uwizeyimana utuye mu Kagari ka Karama, Umurenge wa Cyanika, Akarere ka Nyamagabe, avuga ko byamusabye igihe kinini bimutwara n’imbaraga nyinshi kugira ngo atange imbabazi ku muturanyi we witwa Vianney Munigantama wishe babyara be muri Jenoside yakorewe Abatutsi mu 1994.

Uwizeyimana w’imyaka 52 y’amavuko ari kumwe na Munigantama batanze ubuhamya imbere y’imbaga y’abaturage ubwo Komisiyo y’ubutabera n’Amahoro ya Diyoseze ya Gikongoro yamurikaga ibyagezweho muri gahunda y’ubumwe n’ubwiyunge mu myaka 10 ishize (2006-2016).

Mu buhamya bwe, Uwizeyimana yavuze ko mbere ya Jenoside umuryango we n’uwa Munigantama bari babanye neza bahana amazi n’umuriro, batahanira ubukwe, basurana nk’abaturanyi ariko ibintu biza kuba bibi mu gihe Jenoside yakorewe Abatutsi yatangiraga gushyirwa mu bikorwa.

Ati “Ubwo mu gihe cya Jenoside naje kumenya ko hari babyara banjye babiri yaba yarishe, noneho nanjye ngahora nishyiramo ko n’umwana wanjye wari iwabo(kwa Munigantama) yaba ariwe wamwishe, ariko nyuma naje kumenya ko atari we wamwishe ahubwo yaguye mu Cyanika aho ababyeyi banjye bari bahungiye.”

Yakomeje avuga ko Jenoside ikimara guhagarikwa, Munigantama yafunzwe nyuma yaho aza kuburana muri Gacaca yemera icyaha arafungurwa batangira kubana barebana ay’ingwe bahura akamutera amabuye.

Ati “Namwitaga Munigabantu, twahura nkafata amabuye nkamwirukankana; nari naramuciye kugera aho abandi bari kandi atari ingufu murusha ahubwo nawe ubwe yaranyihishaga, abantu bose barabizi.”

Umutima wo kumubabarira waturutse he?

Uwizeyimana avuga ko kubaho aturanye na Munigantama byari bimubangamiye cyane yumva afite ibikomere ku mutima, adasinzira neza, ariko nyuma aza kumubabarira bitewe n’inyigisho yahawe na Komisiyo y’Ubutabera n’Amahoro y’iyo diyosezi.

Ati “Kumubabarira byatewe n’inyigisho nahawe ndetse n’amahugurwa menshi nagiye mbona, ariko cyane mbikesha Komisiyo y’Ubutabera n’Amahoro ya Diyosezi ya Gikongoro, kuko yambaye hafi, Umuhuzabikorwa wa Komisiyo rwose yazaga iwanjye buri munsi, kuko njyewe mu gihe cyo kwibuka nahoraga mpungabana nta n’ubwo najyaga ku rwibutso.”

Yamubabariye bahuriye mu Misa

Uwizeyimana avuga ko Komisiyo y’Ubutabera n’Amahoro ya Diyosezi ya Gikongoro yakomeje kumwigisha, by’umwihariko ahabwa isomo risobanura uburyo umuntu ashobora gukira ibikomere byo ku mutima, riza kumubera ryiza cyane. Yemeza ko yahaye imbabazi Munigantama mu 2015 bahuriye imbere ya Kiriziya, ubwo Misa ya mbere yari ihumuje.

Ati “Icyo gihe Padiri yaravuze ngo ‘Mwimure inzangano mu mitima yanyu mwimike urukundo’, nuko dusohotse mpura na Munigantama aratinyuka aramvugisha arambwira ngo ‘Ririya jambo Padiri yatwigishije waryumvise?’, niwo munsi wa mbere numvise ntangiye kumubabarira numva ni umuvandimwe, ku mutima ndavuga nti ‘nta mpamvu yo kwimika urwangano’, ubwo turaramukanya, turaganira arataha nanjye ndataha.”

Nyuma yaho baje guhura mu itsinda ryitwa ‘Mvura Nkuvure’ baricara bacoca ibibazo bafitanye, bajya inama, yumva aramubabariye neza, imitima yabo iraruhuka.

Kuri ubu babana mu itsinda ryo kwiteza imbere

Kugeza ubu Uwizeyimana na Munigantama babanye neza, bakorera hamwe ibikorwa by’amajyambere birimo itsinda ryo kubitsa no kugirizanya ndetse no guhingirana.

Uwizeyimana ati “Ubu tubana mu itsinda ryitwa ‘Abisunganye’ rigizwe n’abantu barokotse Jenoside hamwe n’abireze bakemera icyaha, ubu rwose duhurira no mu gikorwa cyo guhinga mu ishyirahamwe.”

Munigantama yabagaho ate atarahabwa imbabazi?

Vianney Munigantama mu buhamya bwe avuga ko atarahabwa imbabazi na Uwizeyimana yahoranaga igikomere ku mutima akumva afite ipfunwe, kujya aho abandi bari bikamubera ihurizo, akumva agomba gushaka uwo yahemukiye akamusaba imbabazi ariko yabigerageza bikaba iby’ubusa.

Avuga ko ubwo yari afungiye muri Gereza ya Karubanda yo mu Karere ka Huye, yahaherewe inyigisho aza kwirega yemera icyaha,ageze no mu Rukiko Gacaca abikora uko aza gukatirwa igifungo cy’imyaka 12 ariko aza kurekurwa arataha kuko byahuriranye n’uko iyo myaka yari ayimaze afunzwe.

Munigantama avuga ko yahoraga yicisha bugufi agashaka no kwegera Uwizeyimana kugira ngo amusabe imbabazi biyunge ariko ntibimukundire kuko bahuraga akamuvugiriza induru akanamutera amabuye.

Ibyo ngo byatumaga nawe (Munigantama) ahorana igikomere ku mutima akibaza amaherezo yabyo kuko yumvaga hari ubwo bizarangira ahunze igihugu, ariko biza kuba byiza umunsi bahurira mu Misa akamuha imbabazi.

Ati “Kuri Noheli ya 2015 nibwo yampaye imbabazi numva umutima wanjye uraruhutse, kuko naratinyutse ndamwegera mbona nawe yemeye kumvugisha”.

Uyu mugabo ufite umugore n’abana bane avuga ko ikindi Uwizeyimana yamubabariye ari imitungo irimo inzu ya musaza we n’iy’ababyeyi be we n’abandi bangije muri Jenoside ndetse banazisahura ibifite agaciro ka Miliyoni zirenga ebyiri, ariko akaba yarabasabye kwishakamo gusa ibihumbi 100, ibyo uwo mugabo afata nk’imbabazi zikomeye.

Uwizeyimana iyo ari kumwe na Munigantama baba baganira nk’abavandimwe kandi baseka ku buryo umuntu ubabonye atabazi atapfa gukeka ko bigeze kugirana amateka mabi.

Perezida wa Komisiyo y’Ubutabera n’Amahoro muri Diyosezi ya Gikongoro, Padiri Joseph Nayigiziki, yashimye uburyo bumvise inyigisho bahawe batera intambwe nziza yo kubabarirana.

Yavuze kandi ko hari n’izindi ngero nyinshi z’abarokotse Jenoside bababariranye n’ababiciye ababo, aho kugeza ubu Komisiyo y’Ubutabera n’Amahoro y’iyi diyosezi ikorana n’abantu 1019 bibumbiye mu matsinda 23, akorera mu mirenge itandukanye yo mu turere twa Nyamagabe, Nyaruguru, Huye, Nyanza na Karongi.

Umuyobozi w’Akarere ka Nyamagabe, Philbert Mugisha, yashimiye Komisiyo y’Ubutabera n’amahoro ya Diyosezi ya Gikongoro umusanzu wayo mu kubanisha neza abanyarwanda no kubafasha guca ukubiri n’ingengabitekerezo ya Jenoside ndetse bakareka ibyo kwibona mu ndorerwamo y’amoko.

Ubushakashatsi bwa Komisiyo y’Igihugu y’Ubumwe n’Ubwiyunge, NURC bwashyizwe ahagaragara mu Ukuboza 2015 bwashyize Akarere ka Nyamagabe ku mwanya wa mbere mu Ntara y’Amajyepfo mu kugira umubare muto w’abaturage bakibona mu ndorerwamo y’amoko bangana na 33.3%.

Uwizeyimana yemeza ko kubabarira Munigantama byamutwaye igihe n'imbaraga zikomeye
Uwizeyimana avuga ko kuri ubu abanye neza na Munigantama wamwiciye abo mu muryango we
Komisiyo y'Ubutabera n'Amahoro muri Diyosezi ya Gikongoro, yashimiwe umusanzu imaze gutanga mu bumwe n'ubwiyunge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244