Inzu zidahenze 2000 zigiye kubakwa mu Murenge wa Nyamirambo

Yanditswe na HABIMANA James
Kuya 30 Gicurasi 2019 saa 11:05
Yasuwe :
0 0

Kuri uyu wa Mbere tariki 3 Kamena, Umushinga Rugarama Park Estate ku bufatanye na Remote Group bazatangira kubaka inzu zidahenze 2000 mu Murenge wa Nyamirambo Akarere ka Nyarugenge.

Ni umushinga kandi bazafatanyamo na Banki Itsura Amajyambere y’u Rwanda (BRD) na Shelter Afrique. Hazubakwa inzu 2000 ku butaka bwa hegitari 42 mu Murenge wa Nyambirambo.

Muri uyu mushinga hazaba harimo aho kuruhukira, amahahiro n’ibindi.

Abubatsi b’izi nzu bavuze ko igiciro cyo kuzubaka kizaba kiri hasi, hagamijwe ko mu gihe zizaba zigurishwa ibiciro nabyo bizaba bihendutse.

Itangazo ry’abazubaka izi nzu rivuga ko “zibaza zihendutse bijyanye n’ubushobozi bwa buri munyarwanda, kugira ngo ibi bigerweho, ikigo Remote Group cyakoze ibikoresho bihendutse byo kubakisha kandi bizakorerwa hano mu gihugu n’iki kigo.”

Inzu y’icyumba kimwe gikubiyemo ibyangombwa nkenerwa byose mu rugo izaba igura guhera kuri miliyoni 12 Frw, inzu ifite ibyumba bibiri izaba igura guhera kuri miliyoni 18 Frw.

Abafite amikoro ahagije nabo bazabasha kubona inzu zibabereye kandi ku giciro kidakanganye.

Abazibandwaho cyane muri uyu mushinga ni abantu binjiza hagati y’ibihumbi 200 Frw n’ibihumbi 700 Frw ku kwezi.

Mu Ugushyingo 2018, Minisitiri w’Ibikorwa remezo, Amb. Gatete Claver, yagiranye ibiganiro n’Umuyobozi Mukuru wa Shelter Afrique, Andrew Chimphondah, hagamijwe kureba uburyo uyu mushinga wa Rugamara Park Estate wafashwa.

Uyu ni umushinga uzatwara amadorali miliyoni 131 z’amadolari, abantu ibihumbi 14 bakaba aribo uzakira. Uyu mushinga kandi ngo uzatanga akazi kaba agahoraho n’akadahoraho.

Ubushakashatsi bwakozwe mu 2012 bwagaragaje ko inzu zikenerwa mu Mujyi wa Kigali buri mwaka zingana 31,279 mu gihe haboneka gusa 1000, ibi bisobanuye ko buri mwaka haboneka icyuho cy’inzu 30,279.

Abubatsi b’izi nzu bavuze ko igiciro cyo kuzubaka kizaba kiri hasi, hagamijwe ko mu gihe zizaba zigurishwa ibiciro nabyo bizaba bihendutse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza