Iperereza ku Bafaransa bakekwaho uruhare muri Jenoside rigeze he?

Yanditswe na Rabbi Malo Umucunguzi
Kuya 14 Gashyantare 2017 saa 07:39
Yasuwe : XX
2

Mu mezi abiri ashize Ubushinjacyaha bw’u Rwanda bwandikiye ubw’u Bufaransa busaba imikoranire mu gukora iperereza ku Bafaransa 20 bakekwaho uruhare muri Jenoside yakorewe abatutsi mu 1994.

Kugeza ubu u Rwanda ruracyarindiriye ngo rukorane n’u Bufaransa mu iperereza rigomba kuzagaragaza niba abakekwaho ibyaha bazaregerwa inkiko.

Ni igikorwa cyatangajwe nyuma y’iminsi mike Komisiyo y’Igihugu yo Kurwanya Jenoside, CNLG, isohoye urutonde rw’abasirikare 22 ishinja uruhare muri Jenoside yakorewe Abatutsi, haba mu kuyitegura, kuyikora cyangwa mu kugambana, ariko bakaba badashaka ko ibyo bakoze bijya ahagaragara.

Gusa ubushinjacyaha bw’u Rwanda buvuga ko bwamenyesheje icyifuzo cyabwo u Bufaransa, dosiye zikaba ziri gukorwa kandi ibiganiro bikazakomeza hagati y’ibihugu byombi, kuko rutashyira igitutu ku Bufaransa ngo buhite bugira icyo bukora kandi ari igihugu gifite amategeko yacyo.

Gusa ngo ibyo ntibizahagarika ubushake bw’u Rwanda, kuko ikigambiriwe ari ugukora iperereza neza, dosiye zigashyikirizwa inkiko.

U Bufaransa bukwiye kwemera iperereza

Umushinjacyaha Mukuru Jean Bosco Mutangana, yabwiye IGIHE ko icyo u Rwanda rwifuza ari ubufatanye kuko babagaragarije ko abantu babo bakekwaho ibyaha bya jenoside, ndetse ihame mpuzamahanga rigategeka ibihugu koroherezanya mu iperereza ku mpande zombi.

Ibi akabihuza n’uko Abafaransa nabo hari ubwo basabye kwinjira mu Rwanda ngo bakore iperereza, kandi barabihawe.

Ati “Baraje mu madosiye y’Abanyarwanda bariyo bakekwaho jenoside, turabakira, turabafasha, bagera ku batangabuhamya bifuza ndetse tunoherezayo natwe abatangabuhamya muri dosiye, niba atari imwe ni ebyiri.”

“Iryo hame ryo koroherezanya ribategeka ko nabo bagomba gukora nk’ibyo twabakoreye. Ntabwo rero bafite uburenganzira bwo guceceka. Nibaceceka, hari uburyo bwo kubaburanishiriza mu gihugu cyabo. Ariko batabikoze byose ngira ngo wenda niho wavuga uti ubwo mwakora iki.”

Jean Bosco Mutangana, Umushinjacyha Mukuru mushya

Abafaransa baje mu Rwanda kenshi

Ku wa 02 Gashyantare 2016 Muhumuza Richard akiri Umushinjacyaha Mukuru, yakiriye itsinda rigizwe n’abacamanza, abashinjacyaha n’abagenzacyaha bakora iperereza ku madosiye y’Abanyarwanda bahungiye mu Bufaransa bakekwaho uruhare muri Jenoside yakorewe Abatutsi mu 1994.

Ibiganiro bagiranye byibanze ku buryo bwo kunoza imikoranire hagati y’Ubushinjacyaha bw’ u Rwanda n’ inzego z’Ubutabera zo mu Bufaransa.

Uretse vuba aha, ubufatanye bw’u Rwanda n’u Bufaransa bwanabayeho mu idosiye yatangijwe n’umucamanza Jean-Louis Bruguière mu 2006, washinje bamwe mu ngabo zari iza RPF-Inkotanyi guhanura indege ya Habyarimana, ashyiraho n’impapuro zita muri yombi abagera ku icyenda.

Ni iperereza ryasubitswe, ariko riza gusubukurwa mu mpera z’umwaka ushize n’abandi bacamanza babiri b’Abafaransa Marc Trévidic na Nathalie Poux, bavugaga ko bagiye kumva ubuhamya bwa Kayumba Nyamwasa wahunze igihugu.

Gusa abo bacamanza nabo bagezweho n’ubufatanye u Rwanda rwabemereye, kuko mu 2012 ubwo bari bagitangira iperereza bemerewe kuza mu Rwanda, bagafashwa kubona amakuru yose bashakaga.

Nubwo nta biragaragazwa n’iperereza Ubushinjacyaha bw’u Rwanda bwatangiye, Umushinjacyaha Mukuru, Mutangana yatangaje ko ibikiri mu iperereza bitaganirirwa mu itangazamakuru.

Ati “Ngira ngo ibijyanye n’iperereza muri rusange byo ntabwo twabiganira mu itangazamakuru, kuko iperereza ku rwego rw’ibanze akenshi aba ari ibanga iyo inkiko zitararegerwa, ndifuza ko ibyo ngibyo tutabiganirira ahangaha, gusa hari ibyo dushaka gukora kugira ngo iki kibazo nacyo kigire umwanzuro gishyirwaho.”

Gusa hari raporo nyinshi zagiye zisohorwa zagiye zitunga agatoki ku ruhare rw’abafaransa muri jenoside yakorewe abatutsi mu 1994.

Harimo nka “Raporo ya Mucyo”, yasohotse muri Kanama 2008, ishyira hanze ko u Bufaransa bwari buzi umugambi wa Jenoside, uruhare rwabwo mu gutegura Jenoside n’abayobozi 33 babigizemo uruhare, barangajwe imbere na Francois Mitterand wari Perezida w’u Bufaransa.

Imitego ntiyasibye hagati y’u Rwanda n’u Bufaransa

Ni kenshi u Bufaransa bwagiye butega u Rwanda imitego inyuranye, hifashishijwe raporo zitandukanye zituruka mu miryango mpuzamahanga bufitemo ijambo rikomeye.

U Bufaransa bushinjwa na bamwe mu basesenguzi kuba inyuma ya FDLR ihora ihigira gutera u Rwanda.

Mbere y’itangira ry’iri perereza, icyavuzwe cyane ni abacamanza batangaje ko bugiye kongera kubura iperereza ku waba yarahanuye indege yahitanye Perezida Habyarimana mu myaka 22 ishize.

Ibi byababaje u Rwanda, mu buryo butandukanye, ndetse Perezida Kagame aca amarenga ko umubano w’u Rwanda n’u Bufaransa ushobora guhagarikwa burundu. Byari byarabayeho bwa mbere mu 2006 nyuma y’itangazwa ry’idosiye ya Bruguiere, ariko ibintu biza guhinduka ku butegetsi bwa Nicolas Sarkozy.

Ubwo Abanyarwanda bibukaga ku nshuro ya 22 Jenoside yakorewe Abatutsi mu 1994, Minisitiri w’Ububanyi n’Amahanga w’u Bufaransa Jean-Marc Ayrault, yatangaje ko abakekwaho Jenoside bose bagomba kubiryozwa.

Yagize ati “Guca umuco wo kudahana no kurwanya Jenoside ni intego z’ibanze kandi ntayegayezwa za dipolomasi yacu.”

Gusa birasa n’aho iyi mvugo itaraba yo ngiro, kuko kugeza ubu u Bufaransa buza mu bihugu bya mbere u Rwanda rwahaye impapuro nyinshi zifite abo zisaba guta muri yombi kubera ibyaha bya Jenoside, ariko nta kirakorwa.

Gusa nyuma y’ubusabe bw’u Rwanda rushaka ubufatanye mu iperereza ku Bafaransa, Umunyamabanga wa Leta muri Minisiteri y’Ububanyi n’Amahanga, Matthias Fekl, yavuze ko nubwo ntacyo bahita babivugaho, uburemere bw’ibyaha byakozwe muri Jenoside bwibutsa ko ubutabera bugomba gutangwa mu buryo butabogamye kandi buhamye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza