Ishoramari ry’u Buyapani mu Rwanda mu isura nshya nyuma yo kwima k’Umwami w’Abami mushya

Yanditswe na Ishimwe Israel
Kuya 3 Gicurasi 2019 saa 09:59
Yasuwe :
0 0

Tariki ya 1 Gicurasi yanditse amateka mu mibereho y’Abayapani. Nibwo iki gihugu cyabonye Umwami w’Abami mushya Naruhito wasimbuye se Akihito weguye ku wa 30 Mata 2019.

Abayapani bo mu mfuruka zose z’Isi bizihije kwima kwa Naruhito, wabaye Umwami w’Abami w’Abayapani wa 126.

Mu rwa Gasabo, ibyo birori byabereye mu rugo rwa Ambasaderi w’u Buyapani mu Rwanda, Takayuki Miyashita ruri Nyarutarama mu Mujyi wa Kigali ku mugoroba wo ku wa 2 Gicurasi 2019.

Byitabiriwe n’abayobozi barimo abo mu nzego za leta, abikorera, abahagarariye ibihugu byabo n’imiryango mpuzamahanga mu Rwanda n’abandi.

Umwami Akihito yavutse ku wa 23 Ukuboza 1933; yimye ingoma ku wa 7 Mutarama 1989, asimbuye se Hirohito wari umaze gutanga.

Yeguye kubera intege nke z’ubusaza zitamwemereraga gukora imirimo ye neza. Ni we wa mbere warekuye ingoma mu myaka ikabakaba 200 ishize.

Umwami Akihito yasimbuwe n’Igikomangoma Naruhito ufite imyaka 59 y’amavuko. Uyu ni bucura avuka kuri Akihito na Michiko wahoze ari Umwamikazi.

Akihito yavutse ku wa 23 Gashyantare 1960, agirwa Igikomangoma ku wa 23 Gashyantare 1991. Umugore we wanahise aba Umwamikazi yitwa Masako.
Ambasaderi w’u Buyapani mu Rwanda, Takayuki Miyashita, yavuze ko ku ingoma ya Naruhito yiswe ‘Reiwa’ bivuze ‘umudendezo usesuye’; izasigasira umubano w’u Buyapani n’u Rwanda.

Yagize ati “Uyu ni umunsi udasanzwe ku Bayapani. Dutangiye igihe gishya kandi hari ibyo tugomba gukora. Abayapani benshi bafite inyota yo gutera inkunga iterambere ry’u Rwanda. Ibigo by’Abayapani biri mu Rwanda ntibigamije gusa kubona inyungu ahubwo birashaka no kungura Abanyarwanda ubumenyi.’’

Ishoramari ry’Abayapani mu Rwanda ryariyongereye, imibare yo mu Ukuboza 2018, igaragaza ko ibigo bikorera mu Rwanda byavuye kuri birindwi bigera kuri 24 mu myaka ibiri n’igice ishize. Mu 2019 byageze kuri 27.

Miyashita yavuze ko ashaka ‘Kuzana ibigo bikomeye bizadufasha twese kuko Abanyarwanda ari abanyamurava. Ndizera ko uko iminsi yicuma, ibigo bikomeye bizaza mu Rwanda.’

Umwaka wa 2019 watangiye Umukuru w’Igihugu Paul Kagame na Madamu Jeannette Kagame bagirira uruzinduko rw’akazi i Tokyo mu Buyapani.

Muri urwo ruzinduko Perezida Kagame yagiriye hanze y’igihugu ku wa 7 Mutarama 2019, yari aherekejwe n’abashoramari 42 b’Abanyarwanda; yanaganiriye n’abagize Ihuriro ry’abacuruzi b’Abayapani n’Abanyarwanda, abayobozi b’ibigo bikomeye birimo Toyota, Mitsubishi n’abandi.

Ambasaderi Miyashita yakira Minisitiri w'Ububanyi n'Amahanga, Dr Sezibera Richard

Minisitiri w’Ububanyi n’Amahanga, Dr Sezibera Richard, yavuze ko urwo ruzinduko rw’Umukuru w’Igihugu ari gihamya ku kunoza umubano washinze imizi mu 1962.

Yagize ati “Twiteguye gukomeza gukorana n’u Buyapani mu kunoza umubano hagati y’ibihugu byombi ku ngoma y’Umwami w’Abami Naruhito.’’

U Rwanda n’u Buyapani bifitanye umubano ushingiye ku bufatanye mu iterambere ry’ubukungu, ubucuruzi, ishoramari, ubufasha mu bya tekiniki n’ibijyanye no kubaka ubushobozi. Binafatanya mu by’ingufu, amazi n’isukura, ubuhinzi, uburezi n’ubwikorezi binyuze mu gutanga inkunga n’inguzanyo.

Yagize ati “U Rwanda rurakomeza kubengukwa n’abashoramari b’Abayapani. Abikorera ku mpande zombi, batangiye imikoranire. Guverinoma y’u Rwanda yiteguye gukomeza iyo mikoranire no korohereza ishoramari n’ubukungu buhuriweho.’’

Yavuze ko yizeye ko ku ngoma nshya imishinga yashyizweho izakomeza kugirira inyungu ku mpande zombi.

Mu rugendo yagiriye mu Buyapani mu ntangiriro za 2019, Perezida Kagame yashishikarije abashoramari 200 kwagura ibikorwa byabo mu Rwanda.

Perezida Kagame na Minisitiri w’Intebe w’u Buyapani, Shinzo Abe, ku wa 8 Mutarama 2019, bakurikiranye isinywa ry’amasezerano ya miliyoni zisaga $29 zo kongera ubushobozi bw’imiyoboro iva ku ruganda rw’amazi rwa Nzove igera ku bigega bya Ntora muri Kigali.

Ishoramari ry’Abayapani mu Rwanda ryibanda cyane mu kongerera agaciro ibikomoka ku buhinzi n’ubworozi, kwakira abantu, ubuhinzi bw’imbuto n’imboga, ubucukuzi bw’amabuye y’agaciro, ikoranabuhanga n’ibijyanye na serivisi.

Mu 2017, ubucuruzi u Rwanda rwakoranye n’u Buyapani bwabarirwaga muri miliyoni $57. Ishoramari ryabwo mu Rwanda ryari rifite agaciro ka miliyoni $21,485, rikaba ryarahanze imirimo 178.

RDB yanditse ibikorwa by’ishoramari rishya 173 mu Rwanda rifite agaciro ka miliyari $2.006 mu 2018.

Bifurizanyije kuryoherwa nk'ikimenyetso cyo gukomeza kunoza umubano hagati y'ibihugu byombi
Ambasaderi Miyashita yakira mugenzi we wa Leta Zunze Ubumwe za Amerika mu Rwanda, Peter H. Vrooman mu isangira yakoreye iwe mu rugo i Nyarutarama
Ambasaderi Miyashita yavuze ko mu minsi ya vuba ibigo bikomeye mu Buyapani bizaza ku isoko ry'u Rwanda. Ntiyabitangaje amazina
Ambasaderi w’u Buyapani mu Rwanda, Takayuki Miyashita, yakiraga buri wese mu bitabiriye isangira ryabereye iwe mu rugo
Minisitiri Dr Sezibera yijeje ko u Rwanda ruzakomeza gukorana n'u Buyapani mu mishinga ifitiye inyungu abaturage b'ibihugu byombi
Ambasaderi wa Israel mu Rwanda, Ron Adam, nawe yari yitabiriye uyu muhango
Isangira ryo kwishimira kwima k'Umwami w’Abami mushya w'Abayapani Naruhito ryitabiriwe n'abantu batandukanye
Ibirori byitabiriwe n'abarimo abahagarariye ibihugu byabo n'imiryango mpuzamahanga mu Rwanda
Hari igitabo cyanditswemo ubutumwa buzahabwa Umwami w'Abami Naruhito

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza