Kwamamaza

Ishuri rya Kabusunzu ryabaye isibaniro ry’ibibazo

Yanditswe kuya 22-10-2016 saa 15:53' na Thamimu Hakizimana


Abarimu bigisha mu Rwunge rw’Amashuri rwa Kabusunzu rihereye mu Murenge wa Nyakabanda mu Karere ka Nyarugenge baravuga ko babangamiwe cyane n’uburyo ikigo bigishamo cyabaye isibaniro ry’ibibazo.

. Abarimu bamaze amezi arindwi badahabwa agahimbazamusyi
. Barashinja umuyobozi w’Ikigo gusesagura umutungo uko yishakiye
. Hari abamaze umwaka biga nta myenda y’ishuri bafite kandi barayishyuye
. Bakora ibizamini bahagaze kubera ko intebe zangiritse

Bamwe mu barimu bigisha muri iri shuri bagaragaje ibibazo byinshi bibabangamiye bifuza ko byakemuka mu maguru mashya.

Muri byo bavugamo kuba bamaze amezi arindwi badahabwa agahimbazamusyi kandi buri munyeshuri yishyura amafaranga yagenewe iyi gahunda, ubuyobozi bukayakoresha mu buryo budasobanutse.

Abanyeshuri biga mu mashuri yisumbuye ngo ntibagipfa kubona ifunguro rya saa sita kandi buri wese yishyura amafaranga ibihumbi 10 by’amafaranga y’u Rwanda.

Imwe mu mpamvu ituma batabona agahimbazamusyi ni uko amafaranga abana bishyura akoreshwa mu guhahira abo mu mashuri yisumbuye nk’uko bahora babibwirwa n’Ubuyobozi bw’ishuri.

Ikindi bavuga ni uko muri iki kigo nta gahunda yo gupiganirwa amasoko y’abagemura ibiribwa ihaba, nk’uko bigenda mu bindi bigo bya leta, bikaba ari kimwe mu byo baheraho bakemanga imicungire y’umutungo.

Ikindi kibazo kivugwa ni icy’abanyeshuri bamaze umwaka biga nta mpuzankano bafite kandi ababyeyi babo barishyuye amafaranga yazo.

Kugeza ubu ngo hari abanyeshuri bo mu mashuri yisumbuye bicara ku ntebe ari batatu bitewe n’uko intebe zabo zangiritse zikabura gisanwa, ku buryo bafite impungenge z’uko bashobora kutazatanga umusaruro bari babitezweho kuko hari n’abiga bahagaze.

Abarimu ntibazi irengero ry’amafaranga yinjira mu kigo

Bavuga ko hari miliyoni enye z’amafaranga y’u Rwanda zatanzwe n’Akarere ka Nyarugenge mu gihembwe cya kabiri cy’uyu mwaka ngo zizunganire gahunda yo kugaburira abanyeshuri ariko ngo umuyobozi yavuze ko yayishyuye imyenda y’ibirarane byo mu myaka yashize, nyamara bitaragaragajwe mu ihererekanyabubasha n’uwo yasimbuye mu ntangiriro za 2015.

Ikindi cyinjiza amafaranga bamwe bavuga ko batamenya icyo akoreshwa ni iminara ibiri yishyura miliyoni imwe n’igice ku mwaka buri umwe, ndetse n’ayinjira kubera ubukwe bubera mu kigo.

Bashinja umuyobozi w’Ikigo kurigisa ibigega bibiri bifata amazi, kwambura abakozi bahabwa akazi ko gusimbura abarimu babyaye n’ibindi.

IGIHE yagerageje guhamagara Umuhire Jean Benoit Reverien, Umuyobozi w’iki kigo avuga ko nta kintu yatangangaza atabiherewe uburenganzira n’ubuyobozi bw’Akarere ka Nyarugenge.

Yagize ati "Jya ku karere ka Nyarugenge ubwire ushinzwe uburezi aguhe ibaruwa igaragaza ko dukwiye kuguha amakuru."

Ubuyobozi bw’Akarereka Nyarugenge bubivugaho iki?

Umuyobozi ushinzwe uburezi mu Karere ka Nyarugenge , Johnson Gatsinzi yemeza ko mu bugenzuzi bwakozwe mu mwaka ushize wa 2015 byagaragaye ko ubuyobozi bw’iri shuri rya Kabusunzu bukoresha amafaranga uko bidakwiye.

Yagize ati “ Hakorwa ubugenzuzi byagaragaye ko iri shuri rifite konti nyinshi mu gihe bidakwiye ku buryo twanabandikiye ibaruwa tubasaba kubikosora ndetse twanabasabye ko nta munyeshuri ukwiye kwishyura agahimbazamusyi ka mwarimu mu ntoki.”

Yakomeje avuga ko kuba umuyobozi w’ishuri rya Kabusunzu ajya kwihahira ibiryo abanyeshuri barya saa sita ari amakosa ngo kuko bigomba gukorwa n’abahawe isoko.

Yagize ati “Natwe twabonye ko ari we ujya kubyihahira ariko ntabwo umuyobozi abyuka mu gitondo ngo ajye guhaha kuko n’ibintu bikorwa n’abahawe isoko kandi bidakorwa byaba bigaragara ko akanama ko gutanga amasoko katuzuza inshingano zako.”

Yasoje avuga ko uyu muyobozi akwiye gutanga amakuru mu gihe abanyamakuru bayamusabye kuko ari itegeko aho kuvuga ngo babibaze Akarere.

Ikigo cy’amashuri cya Kabusunzu giherereye mu Karere ka Nyarugenge, Umurenge wa Nyakabanda, kikaba gifite abarimu bagera kuri 70 bo mu mashuri abanza n’ayisumbuye.

Imwe mu nyubako z'Urwunge rw'amashuri rwa Kabusunzu
Bamwe mu banyeshuri bakora ibizamini bahagaze kubera ikibazo cy'intebe nkeya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved