Isomwa ry’urubanza rwa Evode Imena wasabye kurekurwa akajya kwita ku ruhinja rwe ryasubitswe

Yanditswe na Umwali Zhuri
Kuya 17 Gashyantare 2017 saa 11:37
Yasuwe :
0 0

Ubwo iburanisha ku ifunga n’ifungurwa ry’agateganyo kuri Evode Imena ukurikiranyweho ibyaha birimo itonesha ryatangiraga, Urukiko Rwisumbuye rwa Nyarugenge rwari rwavuze ko umwanzuro uza gufatwa kuri uyu wa Gatanu ariko ryaje gusubikwa.

Mu iburanisha riheruka kuwa 15 Gashyantare 2017, Urukiko rwari rwanzuye ko umwanzuro ku ifungwa n’ifungurwa ry’agateganyo uza gufatwa kuri uyu wa Gatanu.

Umuvugizi w’Inkiko, Emmanuel Itamwa, yabwiye IGIHE ko ‘Urubanza ruzasomwa kuwa mbere saa kumi kubera ko Abakozi b’Inkiko bari mu nama."

Imena yatawe muri yombi tariki ya 27 Mutarama 2017. Aregwa hamwe n’abandi bantu babiri barimo uwari Umuyobozi Mukuru ushinzwe ibijyanye n’amategeko agenga ubucukuzi bw’amabuye y’agaciro, Francis Kayumba n’Ushinzwe Ishami rya Tekiniki mu by’ubucukuzi bw’amabuye y’agaciro, Joseph Kagabo.

Mu iburanisha riheruka, Ubushinjacyaha bwavuze ko Imena akiri Umunyamabanga wa Leta yasinye iteka riha uruhushya ikigo GDG cy’abagore ba Kayumba na Kagabo nta burenganzira abifitiye, ndetse akongera kurisinya icyo kigo cyegurirwa abashoramari bitwa ARM bakiguze ibihumbi 20 by’amadolari akagabanwa na bariya bagore.

Mu kwiregura kuri uri iyi ngingo, Imena yavuze ko mu gutanga ibyangombwa, ubusabe bwacaga muri komite ihuriweho n’ikigo gishinzwe umutungo kamere na Minisiteri ikiyobora yakwemeza ko usaba yujuje ibisabwa bigatangwa.

Yavuze ko nta teka na rimwe yigeze asinya ritanyuze ku bayobozi babiri bagomba kwemeza ibirikubiyemo.

Ku bijyanye no gutonesha abagore b’abo bakorana akabaha icyangombwa abizi ko bitemewe, Imena yasobanuye ko atari azi ko iriya kompanyi ari iy’abagore b’abakozi bakoraga mu kigo cy’Umutungo Kamere ndetse ko atari kumenya abantu 440 bakoraga muri Minirena no mu Kigo gishinzwe Umutungo Kamere n’abagore babo.

Yasabye urukiko ko rwamurekura kuko adashobora kwihisha ubutabera ndetse afite n’uruhinja agomba kwitaho, amagambo yakuruye amarangamutima mu cyumba cy’iburanisha benshi bakitsa imitima.

Ati “Ndasaba ko ibyaha nkurikiranyweho nabigirwaho umwere nkataha. Ntabwo nshobora kwihisha ubutabera, kuri CID bantumaho ninjye wijyanye, aho ntuye harazwi mfite urugo mfite umuryango igihe cyose bantumaho naboneka. Mfite rero n’uruhinja rw’ukwezi kumwe n’igice mwanyemereye nkajya kururera.”

Inkuru bifitanye isano: Imena yahakanye gutonesha abagore b’abo bakoranaga,asaba kurekurwa ngo yite ku ruhinja rwe

Isomwa ry'urubanza rwa Evode Imena ryimuriwe kuwa Mbere tariki 20 Gashyantare 2017 /Ifoto: Village Urugwiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza