Isonga FC yasezeye mu marushanwa ya Ferwafa yerekeza mu Ntara

Yanditswe na Manzi Rema Jules
Kuya 11 Ukwakira 2017 saa 10:30
Yasuwe :
0 0

Isonga FC yagombaga kuzakina shampiyona y’icyiciro cya kabiri mu Rwanda yamaze gusezera burundu mu marushanwa yose ategurwa n’ishyirahamwe ry’umupira w’amaguru, Ferwafa, yerekeza muri gahunda nshya yo gutegura abakiri bato ihereye mu Ntara no mu Turere.

Iyi kipe yari imaze imyaka hafi itandatu ibayeho yitwa irerero nubwo yagiye ikina mu cyiciro cya mbere ndetse n’icya kabiri cya shampiyona mu bihe bitandukanye, umwaka ushize yari yabashije kubona itike yo kugaruka mu cya mbere ariko iza gusezera umwanya uhabwa Kiyovu Sports yo yari yamanutse.

Umuyobozi wayo, Muramira Gregoire yabwiye IGIHE, ko kwikura mu marushanwa byatewe n’impamvu z’uko bashaka ko Isonga FC iba Academy ikajya gushaka abana bakiri bato irera bityo n’abo yari isanganywe ikaba yari yabashyize ku isoko kugira ngo andi makipe abakeneye abatware ibone uko izana abashya.

Uyu muyobozi yavuze ko abana bazatoranywa kujya mu Isonga FC bashobora kuzakina shampiyona y’icyiciro cya kabiri bagakura bazi guhangana nk’uko byagenze umwaka ushize ariko kuri ubu intego n’icyerekezo by’iyi kipe iterwa inkunga na MINISPOC zamaze guhinduka burundu inasezera mu marushanwa yose.

Yagize ati “Isonga FC ni irerero kandi nicyo twiyemeje. Ntabwo tuzongera kubikora nk’uko byari bimeze ngo abana mirongo ingahe baze babe hamwe bakine shampiyona. Ubu turashaka gushyiraho amashuri y’icyitegererezo y’umupira w’amaguru mu ntara zitandukanye.”

Yakomeje agira ati “Abana bazajya batoranywa mu bigo by’amashuri barushanwe abitwaye neza mu turere hirya no hino bahurire muri rya shuri ry’icyitegererezo noneho nyuma y’amasomo asanzwe banigishwe umupira. Aha niho tuzajya dukura abana barusha abandi bazamurwe mu makipe makuru.”

Nubwo uyu mushinga mushya ushobora kuzatanga umubare munini w’abana bakina ruhago kurenza uwo Isonga FC yatangaga, Muramira avuga ko ikibazo gikomeye gihari ari uko mu Rwanda nta yandi mashuri y’umupira (academy) menshi ahari ku buryo aba bana bajya bakina na bagenzi babo bangana ariko ngo bazareba uko bagikemura.

Ashimangira ko kugeza ubu bishimira umusaruro Isonga yatanze mu myaka itandatu yari imaze ariko akemeza ko uwo biteze mu myaka iri imbere ariwo munini kandi uzagirira akamaro cyane n’amakipe y’igihugu y’ibyiciro by’abari munsi y’imyaka 21.

Mu bakinnyi kuri ubu bakomeye Isonga FC yazamuye ikabatanga mu yandi makipe harimo Emery Bayisenge, Rusheshangoga Michel, Nirisarike Salom, Celestin Ndayishimiye, Mico Justin, Patrick Sibomana, Nzarora Marcel, Dominique Savio Nshuti, Manishimwe Djabel, Nsengiyumva Mustapha n’abandi.

Isonga FC ntabwo izongera gukina amarushanwa ya Ferwafa
Isonga FC yazamuye abakinnyi benshi bakomeye kuri ubu muri shampiyona y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza