Kwamamaza

Itariki yo gusimbuza Senateri Jean De Dieu Mucyo yamenyekanye

Yanditswe kuya 21-10-2016 saa 09:54' na Rabbi Malo Umucunguzi


Komisiyo y’Igihugu y’Amatora yatangaje ko kuwa Mbere Ukuboza aribwo hateganyijwe amatora yo ‘‘gusimbura umusenateri’’ uhagarariye Intara y’Amajyepfo, uzasimbura Jean De Dieu Mucyo wakomokaga muri iyo Ntara uherutse kwitaba Imana.

Itegeko Rigenga Amatora ryo mu 2010 rigena ko abasenateri ari 26, barimo 12 batorwa hakurikijwe inzego z’imitegekere y’Igihugu, aho Intara y’Amajyaruguru igira imyanya ibiri; Amajyepfo akagira imyanya itatu; Intara y’Iburasirazuba igiramo imyanya itatu; Intara y’Iburengerazuba igira imyanya itatu naho Umujyi wa Kigali ukagiramo umwanya umwe.

Itegeko kandi riteganya ko umusenateri uvuye mu mwanya asimburwa hakurikijwe uburyo yagiyeho, mu gihe kitarenze amezi atatu abarwa uhereye igihe yapfiriye, yeguriye cyangwa asezerewe.

Senateri Jean De Dieu Mucyo yitabye Imana kuwa 3 Ukwakira 2016 ubwo yari agiye ku mirimo ye muri Sena, akaza kugwa muri ‘escalier’ bamwihutana kwa muganga ariko birangira ashizemo umwuka.

Kuwa 29 Gicurasi 2015 nibwo Komisiyo y’Amatora yemeje ko Mucyo Jean de Dieu ariwe watorewe kuba Senateri ahagarariye Intara y’Amajyepfo ku majwi 50.3%, icyo gihe akaba yari agiye kuziba icyuho cyari gisizwe na Senateri Jean Damascene Bizimana wari wamusimbuye muri Komisiyo y’Igihugu yo Kurwanya Jenoside, CNLG.

Mu itangazo rya Komisiyo y’Igihugu y’Amatora ryashyizwe ahagaragara, ivuga ko “Kwakira kandidatire z’umusenateri uzatorerwa mu Ntara y’Amajyepfo bizatangira tariki 25/10/2016 kugeza ku itariki ya 3/11/2016.”

Ni kandidatire zizajya zitangwa ku cyicaro cy’iyi Komisiyo i Kigali ku Kimihurura, mu masaha y’akazi.

Iryo tangazo ryashyizweho umukono na Perezida wa Komisiyo y’Igihugu y’Amatora, Prof Kalisa Mbanda, rigaruka ku byo ushaka kuba umusenateri agomba kuba yijuje.

Riti ‘‘kuba ari Umunyarwanda w’indakemwa; afite nibura impamyabumenyi ihanitse cyangwa ihwanye nayo cyangwa yarakoze imirimo yo ku rwego rwo hejuru, muri leta cyangwa mu bikorera; atarambuwe n’inkiko uburenganzira mbonezamubano n’ubwa politiki; afite nibura imyaka 40 y’amavuko; atarakatiwe ku buryo budasubirwaho igihano cy’iremezo kingana cyangwa kirenze amezi atandatu.’’

Sena iriho uyu munsi yagiyeho mu 2011, ariko ikaba yagenderaga ku Itegeko Ngenga ryo mu 2012, ryateganyaga mu Ngingo ya 7 ko iyo Umusenateri avuye ku mirimo “igihe cya manda gisigaye kingana nibura n’umwaka umwe, harongera hakaba amatora. Iyo ari Umusenateri washyizweho, urwego rwamushyizeho ni na rwo rugena umusimbura.”

“Umusenateri mushya utowe cyangwa ushyizweho arangiza igice cya manda gisigaye cy’uwo yasimbuye; ntiyongera gutorwa cyangwa gushyirwaho nk’Umusenateri.”

Iryo tegeko ryagenaga ko manda y’Umusenateri ari imyaka umunani idashobora kongerwa, uretse abahoze ari Abakuru b’Igihugu batagira manda.

Hari ibyo Itegeko Nshinga ryavuguruye mu 2015

Ingingo ya 82 y’itegeko Nshinga rya Repubulika y’u Rwanda ryo mu 2003 ryavuguruwe mu 2015, rigena ko umusenateri ava mu mirimo y’ubusenateri iyo yeguye; apfuye; avanwe ku murimo n’icyemezo cy’urukiko cyangwa agize impamvu imubuza burundu kurangiza inshingano ze.

Ingingo ya 83 igena isimburwa ry’Umusenateri ivuga ko iyo yatowe akava mu mirimo ku mpamvu zivugwa mu ngingo ya 82 y’Itegeko Nshinga, “asimburwa hakurikijwe ibiteganywa n’Itegeko Ngenga rigenga amatora. Iyo ari Umusenateri washyizweho, urwego rwamushyizeho ni na rwo rugena umusimbura. Umusenateri mushya utowe cyangwa ushyizweho arangiza igice cya manda gisigaye cy’uwo yasimbuye.’’

Abasenateri batorwa n’abashyirwaho bagira manda y’imyaka itanu ishobora kongerwa rimwe ariko abasenateri bahoze ari Abakuru b’Igihugu nta manda bagira.

Nibitangira gukurikizwa nyuma ya manda abasenateri bariho uyu munsi bafite, Umusenateri mushya utowe cyangwa ushyizweho azajya arangiza igice cya manda gisigaye cy’uwo yasimbuye kandi “ashobora kongera gushyirwaho cyangwa gutorerwa indi manda.”

Senateri Jean De Dieu Mucyo yitabye Imana kuwa 3 Ukwakira 2016

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved