Kwamamaza

Iyamuremye na Mugimba basabye kurekurwa kuko bamaze imyaka itatu muri gereza

Yanditswe kuya 22-11-2016 saa 20:32' na Rabbi Malo Umucunguzi


Jean Baptiste Mugimba na Jean Claude Iyamuremye baherutse koherezwa n’u Buholandi, kuri uyu wa Kabiri bagejejwe imbere y’Urukiko rw’Ibanze rwa Nyarugunga baburana ku ifungwa n’ifungurwa ry’agateganyo kubera ibyaha bya jenoside bakurikiranyweho.

Mugimba Jean Baptiste w’imyaka 57, mu gihe cya Jenoside yakorewe abatutsi mu 1994 yari umukozi wa Banki Nkuru y’Igihugu, BNR, akaba n’Umunyamabanga Mukuru w’ishyaka CDR.

Ubushinjacyaha bwavuze ko Mugimba, kuwa 8 Mata yaremesheje inama yitabiriwe na Nyirimanzi Gregoire wari konsiye wa Segiteri Nyakabanda mu Mujyi wa Kigali, ikorerwamo urutonde rw’abatutsi bagombaga kwicwa. Icyo gihe yatse imbunda Col Hakizimana Edouard zagombaga gukoreshwa muri jenoside, harimo imwe ngo yashyizwe imbere y’urugo rwe.

Mu bishwe nyuma y’urutonde rwakozwe muri iyo nama, Ubushinjacyaha buvugamo Ndungutse Jean Bosco wakoranaga na Mugimba muri BNR, bari banaturanye mu mudugudu witiriwe BNR mu mujyi wa Kigali. Mugimba kandi ngo yagaragaye kuri za bariyeri ari kumwe n’Interahamwe n’Imbonezamugambi za CDR.

Anakurikiranyweho ko yari umwe mu banyamigabane ba radiyo RTLM ndetse hari n’ibiganiro yajyaga ayitangaho ‘bitanya abanyarwanda’ nk’aho yakanguriraga abantu gukora Jenoside, ‘abakangurira kubungabunga ibyiza basigiwe na revolusiyo mu mu 1959.’

Ubushinjacyaha bwamusabiye gufungwa iminsi 30 y’agateganyo, buvuga ko ibyaha bikomeye hashingiye ku buhamya yatanzweho n’ibyo yiyemereye bifitanye isano n’ibyaha akekwaho.

Mugimba yahakanye ibyo aregwa byose

Uyu mugabo wavugaga acishije make, yabanje kuvuga ko nk’Umunyarwanda ukunda u Rwanda yababajwe n’amarorerwa yabaye mu Rwanda mu 1994, ndetse umuntu wese wabigizemo uruhare ubucamanza bwamufatira ibihano kugira ngo ayo mahano “atazongera kubaho mu gihugu cyacu”.
Yahise yungamo ko n’abakoresha icyo kintu bahimbira ibyaha bagenzi babo na bo bajya bakurikiranwa by’intangarugero. Ibyo yabivugiye ko ibirego bye ngo ari ibyo abantu bicaye bakamuhimbira, nubwo yirinze kugenda asobanura ibintu byinshi.

Yavuze ko ku itariki 8 Mata Ubushinjacyaha buvuga ko yaremesheje inama yacuze umugambi wa Jenoside, yavuye iwe saa tatu agahungira mu Kiyovu aho yari yizeye umutekano, ndetse kuwa 12 Mata yahungiye i Gisenyi, ku buryo ibitero byakurikiye inama ntabyo azi.

Yavuze ko nta biganiro yigeze atanga kuri RTLM, ndetse abayishinze 50 bazwi, uretse ko we yagizemo imigabane yishyuriye mu kabari nk’ikigo gishya cyari cyashinzwe.

Ikindi ngo kuba yarabaye Umunyabanaga Nshingwabikorwa wa CDR ntibigize icyaha, ahubwo yasabye kurekurwa akajya gushaka abatangabuhamya bazavuguruza ab’ubushinjacyaha, kuko ngo amaze imyaka itatu muri gereza, akaba no mu Nkiko Gacaca nta wigeze akomoza ku izina rye.

Iyamuremye we yavuze ko abatangabuhamya bakoreshejwe

Iyamuremye Jean Claude uzwi u izina rya Nzinga, ubwo Jenoside yakorwaga yari umusore w’imyaka 18 n’amezi atatu. Ubushinjacyaha bwavuze ko kuwa 7 Mata 1994 yajyanye n’abandi bantu guhiga Bayingana Dismas na Kageyo bagasanga bahunze, bagatwika inzu ye, aho yari atuye muri Kicukiro.

Kuwa 11 Mata, ho bikekwa ko ari kumwe n’abasirikare babiri bayobowe na Col Rusatira hamwe n’abandi bantu benshi, Iyamuremye yagiye mu gitero muri ETO Kicukiro yari yahungiyemo abatutsi benshi, ndetse ajya mukindi i Nyanza ahari hahungiye abatutsi bari barokokeye muri ETO.

Umwe mu batangabuhamya yavuze ko Iyamuremye yanishe umwe muri ba nyirarume, uregwa akavuga ko hari ibimenyetso bizerekana ko ibyo ari agashinyaguro kuko umuryango wo kwa mama we wahigwaga.

Umushinjacyaha ati “Yakoresheje ikamyoneti atunda abatutsi avuga ko agiye kubahungisha akabajyana muri ETO aho yaje kubicira.’’ Ni ibintu Iyamuremye atemeye, avuga ko nawe Jenoside yamugizeho ingaruka kuko mu muryango we hishwe abagera kuri 30, ku buryo ntaho yari guhera yidegembya.
Ati “Sinari nzi ko hariho urwango rungana gutya, abantu bakagushyiraho ibintu nk’ibi…’’

Nzinga yasobanuye ko imodoka ivugwa yatwayemo abatutsi atekereza ko bagiye aho bashoboraga kurokokera ariko bakicwa, yabatwaye inshuro ebyiri abisabwe n’abakuru, abigiriye amahugurwa y’ubutabazi yari amaze iminsi mike aherewe impamyabumenyi, yatanzwe na Croix Rouge, ndetse ngo iyo modoka y’umuturanyi yakoresheje si ikamyoneti.

Yavuze ko abamushinja bakoreshejwe kuko nta numwe uvuga ko yamubonye yica, ahubwo ngo ubuhamya bwabo bwuje imvugo nka ‘byashoboka ko’, numvise ko, wasanga… ndetse ngo mbere y’uko azanwa mu Rwanda abacamanza bitegereje idosiye ye “barayitinya, babura ikintu bayibyaza”.

Yasabye kurekurwa bakamutegeka icyo agomba kubahiriza, ati “n’uwambwira kwicara mu cyumba nazaba ndimo nacyicaramo ariko nzi ko ndi hanze”, “aho gukomeza kuborera mu munyururu kandi nzi ko ndengana”.
Kimwe na Mugimba, Iyamuremye yavuze ko amaze imyaka itatu n’amezi ane muri gereza, kuko u Buholandi bwabohereje basanwe bafunzwe kuko yafashwe kuwa 9 Nyakanga 2013.

Biteganyijwe ko umwanzuro w’urukiko ku ifungwa n’ifungurwa ry’agateganyo kuri Iyamuremye na Mugimba umenyekana kuri uyu wa 23 Ugushyingo 2016.

Iyamuremye ashyira umukono ku nyandiko y'urubanza
Mugimba Jean Baptiste imbere y'urukiko
Iyamuremye Jean Claude yasabye kurekurwa avuga ko abatangabuhamya bakoreshejwe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved