Iyubahirizwa ry’itegeko rigenga umurimo mu bucukuzi bw’amabuye y’agaciro riracyari kure

Yanditswe na Kanamugire Emmanuel
Kuya 24 Ugushyingo 2016 saa 01:50
76 43

Mu nama yahuje Minisiteri y’abakozi ba Leta n’umurimo n’urugaga rw’abikorera n’abakoresha yari igamije kurebera hamwe uburyo Itegeko rigenga umurimo mu Rwanda ryubahirizwa mu bigo by’abikorera, byagaragaye ko hari byinshi bitarakemuka.

Mifotra yamuritse ubushakashatsi bwakozwe n’abagenzuzi b’umurimo ku buryo ibigo biri mu bucukuzi bw’amabuye y’agaciro byubahiriza itegeko ry’umurimo, aho byagaragaye ko abakozi bagifite byinshi bibabangamira mu kazi kabo ka buri munsi.

Ubu bushakashatsi bwakozwe umwaka ushize bwakorewe mu bigo 209 bibarizwa mu turere 27, aho basanze 27% by’abakozi aribo bafite amasezerano y’akazi yanditse, 46% nibo bari barateganyirijwe, na ho 54% nta bwiteganyirize bari baratangiwe.

Iri genzura kandi ryasanze 56% by’ibi bigo bitubahiriza ibijyanye n’ubuzima n’umutekano w’abakozi mu kazi binyuze mu kubaha imyambaro n’ibikoresho byabugenewe.

Minisitiri w’Abakozi ba Leta n’Umurimo, Judith Uwizeye yavuze ko zimwe mu nshingano za Mifotra harimo guteza imbere umurimo binyuze mu guhanga imirimo myinshi no gushyiraho ingamba zihamye zigamije kurengera uburenganzira bw’abakoresha n’abakozi, ariko ko hakirimo imbogamizi.

Ati" Hari abo tubona hirya no hino bakoresha abana kuko bafata ko aribo bahendutse, hari kutubahiriza amahame y’imishyikirano rusange hagati y’abakoresha n’abakozi. Turacyabonamo abakozi bajya kwigaragambya, turacyabona abakozi n’abakoresha barwana. Ibyo byose ni imbogamizi tugihura na zo."

Uwizeye kandi yavuze ko nubwo itegeko rishya ry’umurimo ritaremezwa riteganya ko abakoresha bizajya bigaragara ko batubahiriza uburenganzira bw’umukozi bazajya bafatirwa ibihano n’abagenzuzi birimo no kuba ibigo byabo byafungwa.

Muri iyi nama hanasinywe amasezerano akubiyemo amabwiriza ngengamyitwarire agena ibiganiro hagati Leta, abakoresha n’abakozi.

Uwizeye Judith, Minisitiri w'Abakozi ba Leta n'Umurimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE