Kaburanjwiri, umudugudu udasanzwe mu Ntara y’Amajyepfo wagabiwe inka na Perezida Kagame

Yanditswe na Prudence Kwizera
Kuya 11 Kamena 2019 saa 08:39
Yasuwe :
0 0

Minisitiri w’Ubutegetsi bw’Igihugu, Prof Shyaka Anastase, yatunguwe n’ibyagezweho n’abaturage bo mu Mudugudu wa Kaburanjwiri muri Gisagara, abemerera inka y’imihigo itazigera iteka kuko baje ku isonga mu kwesa imihigo neza.

Ni imwe mu nka zatanzwe na Perezida wa Repubulika Paul Kagame zo guhemba imidugudu yakoze ibikorwa by’indashyikirwa.

Uwo mudugudu uherereye mu Kagari k’Umunini mu Murenge wa Kansi mu Karere ka Gisagara; ugizwe n’ingo 114 zituwe n’abaturage 506.

Ni wo mudugudu wahize indi mu kwesa imihigo mu midugudu umunani iza ku isonga mu turere tw’Intara y’Amajyepfo.

Uyu ni umudugudu wahoze utuwe n’abaturage bakennye cyane ariko baza kwishakamo ibisubizo bivana mu bukene.

Ibyagezweho n’uwo mudugudu, na Minisitiri Shyaka byaramutunguye ubwo yawugeragamo kuri uyu wa Mbere.

Muri Kaburanjwiri, nta rugo na rumwe rudafite amashanyarazi akomoka ku mirasire y’izuba. Mu gihe mu bindi bice bugarijwe n’ikibazo cy’abangavu baterwa inda z’imburagihe, icyo Kaburanjwiri yagikemuye kare yifashisha amasibo n’abakuze mu kugira inama abangavu n’ingimbi.

Ni umudugudu utarangwamo ibyaha, kuko imiryango yaho yose izi ingaruka z’amakimbirane haba ayo mu miryango n’andi ateza ibyaha.

Mu bijyanye n’imibereho myiza, Kaburanjwiri iza ku mwanya wa mbere kuko buri rugo rufite inka n’itungo rigufi byibuze rimwe.

Buri muryango ufite akarima k’igikoni gahinzemo imboga, buri muryango ufite n’ibiti by’imbuto byibuze bitatu; bose bafite amashyiga ya rondereza; abaturage bose bawutuye bafite ubwisungane mu kwivuza bw’imyaka ibiri, ni ukuvuga kugeza muri Kamena 2020. Nta mwana waho ufite ikibazo cy’imirire mibi.

Mu gushyigikira uburezi, nta mwana n’umwe wo muri Kaburanjwiri ugejeje igihe cyo kwiga utari mu ishuri. Buri rugo rufite igipande cy’umuganda kandi buri muryango ukorana n’ikigo cy’imari.

Imihanda yo muri uwo mudugudu yose yaciwe ku bufatanye n’abaturage, buri rugo rufite ubwiherero busukuye kandi inzu zaho zose zirakurungiye.

Minisitiri Shyaka ubwo yabasuraga kuri uyu wa Mbere, bamugaragarije ibyo bamaze kwigezaho babikesha imiyoborere myiza no gukorera hamwe.

Umuyobozi w’Umudugudu wa Kaburanjwiri, Nteziryayo Samuel, yavuze ko ibyo bagezeho byose babikesha gukorera hamwe no kujya inama.

Ati “Ingo hafi ya zose zari zituye mu manegeka, dufite nyakatsi 53 ariko ibyo byose twabyikuyemo dufatanyije.”

Minisitiri w’Ubutegetsi bw’Igihugu, Prof Shyaka Anastase, amaze kwibonera ibyo bagezeho yabasabye gukomereza aho no kudatezuka ngo basubire inyuma abemerera inka y’imihigo.

Ati “Buri karere gafite umudugudu wa mbere ariko mu midugudu umunani y’intara yose Kaburanjwiri yongeye kuza ari iya mbere kubera urugendo bakoze mu gihe gito. Tuzabaha inka y’imihigo; ni inka nziza cyane izakamwa menshi, inka idateka, inka ijyanye nyine n’umudugudu watsinze imihigo.”

Prof Shyaka avuye gusura umudugudu wa Kaburanjwiri yagiranye ibiganiro n’bayobozi b’inzego z’ibanze mu Ntara y’Amajyepfo bibera muri Kaminuza y’u Rwanda ishami rya Huye.

Muri ibyo biganiro hahembwe indi midugudu ntangagrugero yo mu tundi turere tugize Intara y’Amajyepfo naho Ikigo Ikigo Nderabuzima cya Sovu cyo mu Karere ka Huye gishimirwa kugira uruhare rukomeye mu kurwanya imirire mibi mu bana bato.

Umudugudu wabaye uwa kabiri ni uwa Nyarurama wo mu Karere ka Huye; uwa gatatu ni Ruramba mu Karere ka Kamonyi; uwa kane ni Karama yo muri Ruhango; Gisake yo muri Nyanza ni uwa gatanu; uwa gatandatu ni Njamena wo muri Muhanga; uwa karindwi ni Mpinga wo muri Nyaruguru; naho Kigarama yo muri Nyamagabe iba iya munani.

Iyo midugudu yose yemerewe inkunga ya Miliyoni imwe y’amafaranga y’u Rwanda kugira ngo yunganire abaturage mu iterambere.

Minisitiri Shyaka yavuze ko imidugudu yose yemerewe ibihembo ari ishimwe rya Perezida wa Repubulika kandi bazabigezwaho bidatinze.

Abana bahawe amata nk'ikimenyetso cyo kurandura imirire mibi no kugwingira
Abana nabo bigishwa indangagaciro nyarwanda hakiri kare
Abayobozi mu ifoto y'urwibutso hamwe n'abaturage bo mu Mudugudu wa Kaburanjwiri
Bamuritse ibyo bagezeho birimo umusaruro ukomoka ku buhinzi
Bamwe mu baturage bo mu Mudugudu wa Kaburanjwiri bavuga ko biyemeje gushyira hamwe mu kuzamura imibereho yabo no kwiteza imbere
Guverineri w'Intara y'Amajyepfo, CG Gasana Emmanuel
Ibiro by'Umudugudu wa Kaburanjwiri
Ingo zose zo mu Mudugudu wa Kaburanjwiri zifite amashanyarazi akomoka ku kirasire y'izuba
Ingo zose zo mu Mudugudu wa Kaburanjwiri zifite uturima tw'igikoni duhunzemo imboga
Minisitiri Shyaka aganira n'umuyobozi w'Umudugudu wa Kaburanjwiri
Umuyobozi w'Ikigo Nderabuzima cya Sovu ashyikirizwa igikombe cy'imihigo
Minisitiri Shyaka ashyikiriza igikombe cy'imihigo umuyobozi w'Umudugudu wa Kaburanjwiri
Minisitiri Shyaka yasabye abaturage bo mu Mudugudu wa Kaburanjwiri kutazasubira inyuma
Minisitiri Shyaka yeretswe imihigo y'Umudugudu wa Kaburanjwiri n'uko yeshejwe
Minisitiri w’Ubutegetsi bw’Igihugu, Prof Shyaka Anastase aganira n'abaturage bo mu Mudugudu wa Kaburanjwiri
Minisitiri w’Ubutegetsi bw’Igihugu, Prof Shyaka Anastase, yishimiye uko abaturage bo mu Mudugudu wa Kaburanjwiri bafatanya mu kwesa imihigo
Umuyobozi w’Umudugudu wa Kaburanjwiri, Nteziryayo Sanuel, yereka Minisitiri Shyaka imihigo bahize
Umuyobozi w’Umudugudu wa Kaburanjwiri, Nteziryayo Sanuel, ashyikirizwa igikombe cy'imihigo
Umuyobozi w’Umudugudu wa Kaburanjwiri, Nteziryayo Sanuel
Umuyobozi w'Akarere ka Gisagara, Jerome Rutaburingoga ashimira abaturage besheje imihigo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza