IGIHE.com > Amakuru > U Rwanda
Kacyiru : Abaturage barasabwa kwirinda ibikomeretsa abacitse ku icumu

Kacyiru : Abaturage barasabwa kwirinda ibikomeretsa abacitse ku icumu


Yanditswe kuya 14-04-2013 - Saa 15:31' na Richard Dan Iraguha

Mu mugoroba wo kwibuka ku wa 12 Mata 2013, mu murenge wa Kacyiru hatangiwe ubuhamya, abayobozi batandukanye basaba abaturage kwirinda ingengabitekerezo ya Jenoside n’ibindi bikorwa byo gukomeretsa abarokotse Jenoside yakorewe Abatutsi.

Umunyamabanga Nshingabikorwa w’Umurenge wa Kacyiru, Nsabimana Vedaste, yasabye abaturage kwirinda ingengabitekerezo ya Jenoside aho igaragarira hose, haba mu mvugo cyangwa mu nyandiko no mu bindi bikorwa bisesereza.

Yagize ati “Icyo dusaba abanyarwanda muri rusange ni ikintu gito ; ni ukwirinda ibikorwa bikomeretsa abacitse ku icumu, ikindi ni ugukomeza kubafata mu mugongo dukora ibibaganisha ku kwigira.”

Nsabimana Vedaste yongeye gutangaza ko mu murenge ayoboye nta ngengabitekerezo yari yahagaragara, avuga ko impamvu ari uko abaturage bitabiriye cyane ibiganiro by’icyumweru icyunamo.

Lt. General Jack Musemakweri, umukuru w’ingabo uyobora Diviziyo ya mbere, yasabye abaturage ba Kacyiru ndetse n’abanyarwanda muri rusange guhangana n’ingengabitekerezo ya Jenoside, ngo kuko imaze iminsi itutumba mu bice bimwe by’u Rwanda, ariko anahumuriza abacitse ku icumu rya Jenoside ko ingabo z’u Rwanda nk’uko zabatabaye zizakomeza kubarinda, zitazabatererana na rimwe.

Francois Kanimba, Minisitiri w’Ubucuruzi n’inganda wari umushyitsi mukuru, yasabye abari aho mu biganiro ko kwibuka bigomba bigomba kubaho buri gihe, ati “Kwibuka nyako kugira umumaro, iyo bimaze kuba umuco.”

Umugoroba wo kwibuka mu murenge wa Kacyiru wabimburiwe n’urugendo rwo kwibuka, kuva Rond point ya Kacyiru kugera imbere y’ahari ibiro bya Perezida w’u Rwanda .

Mu murenge wa Kacyiru haguye abatutsi barenga 600, ariko ngo hari n’abandi batari bamenya aho imibiri yabo iherereye nka Dr Kayijamahe.

Umurenge wa Kacyiru urimo gukora ibikorwa byo gufasha abatishoboye babaha ibibatunga, kubasanira amazu no kubakira ku badafite aho baba mu rwego rwo kubafasha kwigira.

Lt. General Jack Musemakweri, umukuru w’ingabo uyobora Diviziyo ya mbere
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO