Kwamamaza

Kaminuza ya Kigali yafunguye ishami ry’icungamutungo

Yanditswe kuya 19-11-2016 saa 22:43' na Tuyisenge Jean Pierre


Kaminuza ya Kigali(UoK) yafunguye ku mugaragaro amasomo y’icungamutungo n’ibaruramari inasobanurira abafatanyabikorwa bayo imikorere y’ikigo gitanga amahugurwa y’igihe gito ku guteza imbere ibigo bya Leta n’ibyigenga (Centre for Economic Governance and Leadership) byombi bigiye gufasha abanyarwanda kuba abacungamutungo bakomeye ku rwego mpuzamahanga.

Ubuyobozi bw’iri shuri butangaza ko bajya gutangiza aya masomo, bwashakaga guhuza ubumenyi n’isoko ry’umurimo, ndetse no gushyira Abanyarwanda ku ruhando mpuzamahanga mu rwego rw’icungamutungo.

Umuyobozi Mukuru w’Inama y’abashinze iyo kaminuza, Prof Nshuti Manasseh yavuze ko nyuma yo kubona ko u Rwanda rukeneye abahanga mu icungamutungo kugira ngo rutere imbere biruseho, batangije amasomo y’umwuga azafasha kurugeza ku ntera ishimishije.

Yagize ati “Twatangije muri iyi kaminuza amasomo yatuma umuntu yihangira akazi ariko twongeraho ishami ry’icungamutungo kugira ngo abanyeshuri bajye ku rwego mpuzamahanga ndetse babe bafite ubumenyi bukenewe aho wajya hose ku Isi ube wakwemerwa nk’umucungamutungo. Twasanze u Rwanda rutatera imbere rudafite abacungamutungo babigize mwuga, dufata iya mbere dutangiza aya masomo.”

Prof. Manasseh avuga ko bifuje gutanga ubumenyi burenze ubwo abanyeshuri bakura muri kaminuza zisanzwe.

Abayobozi b’iri shuri batangaza ko basanze na none hari abakozi ba Leta, n’abandi bikorera ku giti cyabo ariko baba bakeneye kugira ubumenyi bwihariye mu icungamutungo, niyo mpamvu ngo bashyizeho n’ikigo gitanga amahugurwa y’igihe gito ku guteza imbere ibigo bya Leta n’ibyigenga (Centre for Economic Governance and Leadership).

Iki kigo kivuga ko hari abantu baba barize ariko bakeneye kuba abahanga mu gucunga umutungo.Umuyobozi wungirije wa University of Kigali, Prof. Udai Lal Paliwal, yavuze ko bagamije kugira abantu abadogiteri mu gucunga umutungo.

Ati “ Twashyizeho izi gahunda kugira ngo dufashe abanyarwanda kuba adadogiteri mu Icungamutungo, bazajya bamenya aho ibintu bipfira, tugiye guha amahugurwa abo bantu kandi bizatuma igihugu kirushaho kugira abacungamutungo babigize umwuga byihutishe iterambere.”

Ubu bunyamwuga Kaminuza ya Kigali izanye mu Icungamutungo ry’u Rwanda nibwo bwatumye Umunyabanga wa Leta muri Ministeri y’Uburezi ushinzwe amashuri abanza n’ayisumbuye, Isaac Munyakazi, ashimira by’umwihariko iyi kaminuza avuga ko bazanye amashami u Rwanda rukeneye.

Yagize ati “ Nkuko tubizi twese, icyerekezo u Rwanda rwihaye cya 2020, gikeneye abantu bafite ubuhanga mu gukora ibyo bashinzwe, niyo mpamvu nshimira by’umwihariko Kaminuza ya Kigali kuba yaratekereje gutoza abahanga mu icungamutungo, ni ingenzi kandi kuri Minisiteri y’Uburezi kubona higishwa ibishobora gufasha mu iterambere ry’igihugu.”

Kaminuza ya Kigali itanga impamyabumenyi zitandukanye harimo iza CPA (Certified Public Accountant), CIFA (Certified Investment Financial Analyst), ACCA (Association of Chartered Certified Accountants), na CAT (Certified Accounting Technician). Izi zituma uyisohokamo aba ari umucungamutungo wemewe ku rwego mpuzamahanga, bikamufasha kuba yakora aho yagera hose ku Isi.

Iyi kaminuza kandi irateganya gushyiraho uburyo bwo korohereza abashaka kuyigamo basanzwe ari abakozi, aho mu kwezi kwa Gatandatu 2017, bazajya biga mu mpera z’icyumweru.

Prof Nshuti Manasseh aganira na Isaac Munyakazi
Umuyobozi wungirije wa University of Kigali, Prof. Udai Lal Paliwal
Umuyobozi Mukuru w’Inama y’abashinze iyo kaminuza, Prof Nshuti Manasseh
Umugenzuzi w'Imari ya Leta, Obadiah Biraro
Umunyamabanga wa Leta muri MINEDUC ushinzwe amashuri abanza n'ayisumbuye, Munyakazi Isaac

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved