Kaminuza ya UTB yibutse Jenoside yakorewe Abatutsi, abanyeshuri basabwa kuzirikana ubutwari bw’abayihagaritse

Yanditswe na Habimana James
Kuya 14 Kamena 2019 saa 11:26
Yasuwe :
0 0

Abanyeshuri n’abayobozi ba Kaminuza y’Amahoteli, Ubukerarugendo, Ikoranabuhanga n’Ubucuruzi (UTB) bibutse ku nshuro ya 25 Jenoside yakorewe Abatutsi mu 1994, abanyeshuri bahiga basabwa guharanira kuzaba intwari nk’abayihagaritse.

Ni igikorwa kuri uyu wa Kane cyabimburiwe n’urugendo rwo Kwibuka, rwahereye ku cyicaro cya UTB ahazwi nka Sonatubes rugera ahitwaga Eto Kicukiro hiciwe Abatutsi benshi muri Jenoside, hanashyirwa indabo ku rwibutso rwa Jenoside rwa Nyanza ya Kicukiro.

Umuyobozi Mukuru wungirije ushinzwe Amasomo, Ubushakashatsi n’Imyigire muri UTB, Prof Dr. Tombola Gustave, yavuze ko mu gihe cyo Kwibuka ari ngombwa gukomoza ku bugwari bwaranze abanyarwanda bamwe ariko bakanibuka abagize ubutwari.

Ati “Turibuka ubugwari bwa leta yateguye igashyira mu bikorwa Jenoside yakorewe Abatutsi, turibuka kandi ubugwari bw’abanyarwanda bashishikajwe no kwica bagenzi babo bakanabyemera, iyo umuntu aje kwibuka si ugukora urugendo gusa ajye azirikana yibuke ubwo bugwari bw’abo bantu.”

“Iyo wibutse ibigwari biba bivuze ko uzarahanira kutaba ikigwari, twese uko turi aha icyo tugomba kuzirikana ni uko tutagomba kuzaba ibigwari. Ikindi twibuka ni ubutwari bw’abana b’abanyarwanda, ingabo zari iza FPR-Inkotanyi zahagaritse Jenoside. Iyo tubwibutse bituma tuzirikana ko ubugwari aho buva bukagera tugomba kubwanga.”

Yavuze ko kwibuka muri Kaminuza babifata nk’ikintu gikomeye kuko bibaha n’inshingano zo kwandika amateka kugira ngo abazabakomokaho bazayamenye, aho kuyandikirwa n’abandi.

Perezida w’Itorero ry’Igihugu, Bamporiki Edouard, witabiriye uyu muhango, yaratiye aba banyeshuri ubutwari bwaranze abanyarwanda bo hambere, ariko agaruka ku bwaranze Perezida Paul Kagame, avuga ko urubyiruko rw’uyu munsi rufite amahirwe yo kugira umuyobozi ubanisha abaturage, basabwa kuzaba intangarugero nka we.

Ati “Ndabasabye mujye byibuze mufata umunsi umwe mujye kuri interineti murebe impanuro umukuru w’igihugu agenda atanga, izo ndangagarico muzishyire mu buzima bwanyu kandi bizatuma muba abantu bazima kandi bafatiye igihugu akamaro.”

“Buri munsi mujye mwicara mutekereze ngo ese twiteguye gute gukomeza ibyo Umutoza w’Ikirenga yatugejejeho n’abasirikare bafatanyije kubohora igihugu? ni umuruge mwiza dufite kandi dukomeje gukurikiza.”

Kayigamba Francois Xavier warokokeye mu cyahoze ari Eto Kicukuro, yatanze ubuhamya bw’uburyo Abatutsi bahahungiye bizeye ubufasha bw’ingabo za Loni ariko zikabasiga, ari nabwo Interahamwe n’abasirikare barindaga Perezida Habyarimana babiraragamo bakabica, abandi bakajya kubicira i Nyanza ya Kicukiro.

Yashimye ubutwari bwaranze ingabo zari zirangajwe imbere na Perezida Kagame, ko kuba hari bamwe baharokokeye ari ukubera ko zabatabaye zigaha n’ubuvuzi abakometse, asaba aba banyeshuri guharanira kuba intwari z’igihugu.

Aba banyeshuri basabwe guharanira kuzaba intwari z'u Rwanda
Abanyeshuri n’abayobozi bakoze urugendo rwo Kwibuka rwahereye ku cyicaro cya UTB rugera ahahoze Eto Kicukiro
Umuyobozi Mukuru wungirije ushinzwe Amasomo, Ubushakashatsi n’Imyigire muri UTB, Prof Dr. Tombola Gustave, yavuze ko kwibuka ari inshingano y'ikiremwamuntu
Abayobozi ba UTB bashyize indabo ku rwibutso rwa Jenoside Nyanza ya Kicukiro
Abayobozi ba AERG muri UTB bitabiriye uyu muhango
Bamporiki Edouard na we witabiriye uyu muhango muri UTB, yabwiye aba banyeshuri ubutwari bwaranze abanyarwanda ba kera, anagaruka ku bwaranze Perezida Paul Kagame
Iradukunda Jerome wari uyoboye umuhango wo Kwibuka muri UTB
Lt Col Rwasanyi Sam wari uhagarariye ingabo
Umuyobozi mukuru akaba ari nawe washinzwe UTB, Mukarubega Zulfat yasinye mu gitabo cyo ku rwibutso rwa Nyanza ya Kicukiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza