Kaminuza zo mu Rwanda zigiye guhangana n’ubushomeri nyuma y’amasomo zigiye ku Birwa bya Maurice

Yanditswe na Ferdinand Maniraguha
Kuya 13 Ukwakira 2017 saa 10:14
Yasuwe :
0 0

Kaminuza zo mu Rwanda zasabwe gukorana n’abikorera mu mitegurire n’imyigishirize y’amasomo yazo kugira ngo zibashe guhangana n’ikibazo cy’ubushomeri gihangayikishije igihugu.

Ikigo cy’Igihugu cy’Ibarurishamibare (NISR) giheruka gutangaza ko mu bushakashatsi bushya bugaragaza uko imirimo ihagaze mu gihugu hagendewe ku bipimo bishya by’abafite umurimo, abashomeri ari 606 997.

Ubu bushakashatsi bugaragaza ko umubare w’Abanyarwanda badafite akazi uri kuri 16.7 % ubariyemo n’abahingira amaramuko, mu gihe ubushomeri mu rubyiruko (hagati y’imyaka 16-30) buri 21 %. Benshi mu bafite ubushomeri ni abarangije Kaminuza kuko 6 % y’abo aribo bafite akazi.

Mu gukemura iki kibazo, Inama Nkuru y’Amashuri Makuru na Kaminuza (HEC) yifashishije Komisiyo Ishinzwe Amashuri Makuru mu Birwa bya Maurice yahurije hamwe abayobozi b’amashuri makuru na za Kaminuza mu Rwanda, harebwa isomo bakwigira kuri icyo gihugu mu kwigisha ibizagirira abanyeshuri akamaro nibarangiza amasomo.

Imibare y’Ikigo gishinzwe Ibarurishamibare mu Birwa bya Maurice igaragaza ko mu 2016 ubushomeri muri icyo gihugu bwari kuri 7.3 %.

Kuri uyu wa Kane, tariki ya 12 Ukwakira 2017, Umuyobozi wa Komisiyo y’Amashuri makuru mu Birwa bya Maurice, Prof Sid Nair, yahuguye abayobozi ba Kaminuza zo mu Rwanda, uburyo zagira uruhare mu kugabanya umubare w’abarangiza kwiga bakabura akazi kuko ibyo bize bidakenewe ku isoko ry’umurimo.

Umuyobozi Mukuru wa HEC, Dr Emmanuel Muvunyi, yabwiye IGIHE ko Kaminuza zo mu Birwa bya Maurice zikorana n’abikorera ku buryo abanyeshuri barangiza ibyo bize bihuye n’ibikenewe ku isoko ry’umurimo ari nabyo bashaka mu Rwanda.

Yagize ati “Ni kibazo cyo kuvuga ngo Kaminuza zirigisha ariko abantu bakabura akazi kuko ibyo bize bitajyanye n’isoko ry’umurimo. Baduhaye ubunararibonye by’uburyo kaminuza zikorana n’abikorera ku buryo mu gihe cyo gutegura gahunda z’amasomo na bo baza bakabitangaho ibitekerezo noneho mu gihe cyo kwigisha, umunyeshuri akagira amasaha yo kujya gukorera mu bigo by’abikorera.”

Hasinywe amasezerano y'ubufatanye hagati ya HEC na Komisiyo y'amashuri makuru mu Birwa bya Maurice

Dr Muvunyi yavuze ko mu Rwanda bitakorwaga cyane ariko ko basabye buri Kaminuza kugirana amasezerano n’umukoresha runaka, aho abanyeshuri bazajya bigira bitewe n’amasomo bakurikirana.

Yagize ati “ Twasabye buri Kaminuza kugirana amasezerano n’abikorera. Buri porogaramu zose zigomba kugira amasezerano n’umukoresha runaka. Porogaramu nshya kugira ngo tuyemere tuzajya dusaba ko atwereka ayo masezerano, nitujya kubagenzura tuzajya tureba ko ahari kandi ko bayubahiriza.”

Prof Nair yavuze ko imirimo ihari ahubwo ikibazo ari abantu bafite ubushobozi bwo kuyikora.

Ati “Ubushomeri mu barangije kaminuza ni ikibazo gikomeye. Ntibivuze ko nta mirimo ihari ahubwo igenda ihindura isura, umunyeshuri yarangiza agasanga itandukanye n’ibyo yize. Uburezi rero bugomba guhinduka bukajyana n’ibyo aho twerekeza hifuza.”

HEC kandi yagiranye amasezerano y’ubufatanye na Komisiyo Ishinzwe Amashuri Makuru mu Birwa bya Maurice (Tertiary Education Commission) arimo guhanahana inzobere, kohererezanya abanyeshuri n’ibindi.

Dr Muvunyi yavuze ko hari byinshi babonye bakwigira kuri iki gihugu gifite Kaminuza icumi za Leta na 45 zigenga, mu kunoza ireme ry’uburezi muri Kaminuza zo mu Rwanda.

Aya masezerano azafasha ibihugu byombi kuba byanohererezanya abanyeshuri
Prof. Nair yavuze ko ku isi atari akazi kabuze ahubwo habuze abashoboye kugakora
Abayobozi ba Kaminuza zo mu Rwanda bahuguwe uko amasomo akwiye kujyana n'ibikenewe ku isoko ry'umurimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza